swiggy_delivery_boy_job

Aaj ki duniya ke paas paise toh hai lekin usse kharch karne ka samay nahi hai. Ve chahte hain ki unhein har cheez ghar baithe baithe mil jaaye aur unko uske liye bilkul mehnat na karni pade. Issi situation ki wajah se aaj kal internet businesses aur delivery companies bahut trend mein hain kyonki yeh suvidha dete hai ki aapko har cheez ghar baithe baithe mil jaaye. Yeh trend itna chal gaya hai ki har chote se chote shehar mein bhi ye companies apni services dete hain,aur iss trend ke chalne ke karan aajkal delivery boy ki naukari bahut demand mein hain. Yeh ek aisi job hai jisme aap bina kisi khaas qualification ke bhi ek achhi salary kama sakte hain. Toh agar aap janana chahte hain ki aap Zomato ya Swiggy delivery boy job kaise kare toh yeh blog aapko ,aapke saare sawaalo ke jawab dega.

Iss article mein hum aapko batayenge

Delivery boy kon hote hain

Delivery boy kaise bane

Zomato ya Swiggy delivery boy job ke liye kaise apply kare – step by step guide

Swiggy ya Zomato delivery boy job karne ke liye jaruri documents

Delivery boy ke types

Zomato ya Swiggy delivery boy job mein salary

Delivery Executive job se jude kuch khaas sawaal


Delivery boy kon hote hai

Delivery executive ya delivery boy woh hote hain jo koi bhi courier ya koi packed product jaise ki khaana, kapde, bags, shoes etc. customers tak pahuchate hain. Delivery boys, sellers se package lekar customer ki provided location par pahuchate hain. Delivery karte samay yeh unn delivery boys ki zimmedari hoti hai ki ve customers ke packages sahi time par sahi salamat pahuchaye. Ye executives customer se payment lete hain aur uss paymnet ko seller tak pahuchate hain.

Kayi companies jaise Zomato ya Swiggy apne khudh ke delivery boys employ karte hain jaise ki, wahi dusri taraf kayi aisi companies bhi hai jo kisi courier company ho hire karte hain jo unka samaan deliver kar sake, jaise ki Myntra, Amazon, Flipkart etc. Toh aayiye janante hai ki Swiggy delivery boy ki naukri ke liye kaise apply kare.

Swiggy ya Zomato delivery boy job karne ki eligibility

Swiggy ya Zomato delivery boy job karne ke liye kisi khaas eligibility ki jarurat nahi hoti. Kaafi aisi companies hain jo 10th pass ya 12th pass ko bhi delivery boys ki full time ya part time job offer karte hain. Lekin har company ka eligibility criteria alag hota hai. Aisi bahut saari companies bhi hai jo graduates ko hi delivery executives ki jobs dete hain. Behtar yehi hoga ki aap apni particular company ke office jaakar unka eligibility criteria dekh le.

Har company apne delivery boys ko sahi kaam karne ki training dete hain. Iss training mein ve aapko batayenge ke aapko unka product kaise handle karna hai aur kaise delivery karni hai. Iss training ke alawa aapko koi aur course ya training leni ki jarurat nahi hai.

Swiggy ya Zomato mein delivery boy job karne ke liye zaruri hai ki aapke paas apni khudh ki bike ya scooty ho aur woh aapke naam par ho. Bike ya scooty hona isliye jaruri hai kyunki iss job mein aapko delivery karne ke liye kaafi alag alag locations par jana hoga. Aapke paas ek smartphone aur ek active internet connection hona bhi zaruri hai taaki aapko delivery karte samay customer ki location ke hisaab se chal sake aur company ko apki location ka pata chalta rahe.

Delivery Executive kaise bane ?

Delivery executive banane ke liye liye aap apne man pasand company ke office mein jaakar apply kar sakte hain. Aaj kal bahut saari Internet based companies hai jinko delivery executives ki jarurat hoti hai. Delivery executive banane ke do tareeke hain.

  1. Aap chahe toh online form bhar sakte hain.
  2. Company mein directly jaakar form bhar sakte hain.

Lekin dono hi option mein form bharne ke baad ka poora procedure unke company office mein hi hoga.

Zomato ya Swiggy delivery boy job ke liye kaise apply kare – step by step guide

Ab hum aapko batayenge ki kaise aap online jaakar recruitment form bhar sakte hain. Aapki asaani ke liye hum Swiggy ka example le rahe hain, aap chahe toh apni man pasand company mein apply kar sakte hain.

Step 1: Online apply karne ke liye neeche diye gaye steps follow kare:

Step (i): Registeration process shuru karne ke liye aapko sabse pehle Swiggy ki official website par jana hoga. Swiggy ki official website par jaane ke liye yaha click kare. Ek baar website par jaane ke baad aapko neeche scroll karna hai, aur waha ‘contact‘ head ke neeche ‘ride with us‘ ke icom par click karna hai.

Step (ii): Ride with us par click karne ke baad aapke screen par neeche diya gaya page khulega. iss page par aap apne liye suitable language chune aur ‘Ride with us‘ ke orange icon par jaa kar click kare. Agar aap chahe toh neeche scroll karke Swiggy join karne ke benefits ke baare mein bhi padh sakte hain.

Step (iii): Agle page par Swiggy aapse aapki personal details maangega. Aapko apna naam, phone number, city, aur vehicle ki details daalni hongi. Uske baad aapko ek box ko tick karna hoga jisse yeh ensure hoga ki aap robot nahi hain. Inn sab details ke baad aap register par click kar sakte hain.

Step (iv) : Ek baar Swiggy par online registeration karne ke baad unke executive aapko call karke aapke details ko check karenge aur aapko aage ka procedure samjhayenge. Ek baar details ki confirmation aane par aapko unke office jana hoga.

Note: Aap chahe toh registeration ka process offline bhi kar sakte hain, aur iske liye aapko company office jaana hoga aur wahi ek form bharna hoga.

Step 2: Swiggy ke office jaakar aapko apne documents submit karne honge. Kyonki aap Swiggy ko represent kar rahe honge toh unke liye yeh bahut zaruri hai ki unke paas aapki saari information ho. Aapki personal information ke saath saath aapko apne vehicle ki bhi details company ko deni hongi.

Step 3: Apne documents submit karne ke baad company aapse Rs. 1000 ka security amount legi. Security amount woh amount hota hai jo aapko kisi particular product ke rent ke taur par dena hota hai aur yeh amount aapko ve product wapas karne par refund kar diya jata hai.

 Swiggy aapse Rs. 1,000 ka security amount leti hai aur uske badle mein aapko Swiggy ki t-shirt aur bag deti hai jismein aap product deliver karte hain. Yeh amount refundable hota hai yani agar aap yeh job chorte hain toh aapko aapke Rs. 1000 wapas dediye jaate hain lekin pehle ve yeh check karte hain ki t-shirt aur bag sahi salamat hai ya nahi, aur sahi hone par hi ve aapko aapke paise wapas karte hain.

Step 4: Security amount jama hone ke baad aapko delivery boy banane ki training di jaati hai. Yeh training session free of cost hota hai. Iss training session mein aapko poora delivery system samjhaya jata hai ki kaise Swiggy app ko operate karna hai, kaise location dekhni hai, customer se interact kaise karna hai etc. yeh session lagbhag 2-3 hours ka hota hai.

Ye training session aapke aur company , dono ke liye important hai kyonki agar aapne ache se delivery nahi kari toh aapki salary par penalty bhi lag sakti hai, aur isse company ka user experience aur reputation bhi down hoti hai.

Step 5: Iss training ke complete hone ke baad aap apni delivery boy job shuru kar sakte hain.

Swiggy ya Zomato delivery boy job karne ke liye jaruri documents

Kisi bhi company mein as a delivery boy job karne ke liye aapko apne kuch zaruri documents submit karne padte hai. Bina inn documents ke aapko job nahi milegi. Har company ki alag document requirements hoti hain, humari salah hai ki aap apni pasand ki company mein jaakar jaruri documents ke baare mein pata kare. Lekin humne aapki madad ke liye kuch aise documents meintion kare hain jo har company maangti hai.

  1. Adhaar card
  2. Pan card
  3. Personal driving license
  4. Cancelled cheque
  5. Pass book
  6. Kuch companies aapse aapka 10th ya 12th pass certificate bhi maangti hain

Apne personal documents ke saath saath aapko apni vehicle ke bhi kuch documents sumbit karne honge jispar aap product ki delivery karenge.

  1. Bike/scooty ka Registeration Certificate jo aapke naam par ho (RC)
  2. Agar aapki personal vehicle nahi hai toh aapko ek Non Objection certificate lana hoga jo ki vehicle ke owner ki taraf se hoga aur owner dwara signed hoga.
  3. Bike / scooty ki insurance copy

Delivery executive ke types

Yeh ek aisi job hai jo aap part time bhi kar sakte hai aur full time bhi kar sakte hain.

Full time job– Full time job ka matlab hai ki aap subha se sham take k hi kaam karte hai aur uske liye aapko salary milti hai. Yeh aisi job hoti hai jo aapka poora effort aur determination maangti hai. Agar aap Swiggy ya Zomato mein as a full time delivery executive job karte hain toh aapko din ke minimum 10 ghante kaam karna padhta hai jisme beech mein aapko break bhi diya jata hai. Generally full time delivery executive ke job ka time subha 10 baje se lekar shaam ke 8baje tak hota hai, par yeh time fixed nahi hota. Full time job karne walo ki salary baaki delivery executive se zyada hoti hai.

Part time job– Part time job ka matlab hai ki aap apni padhai ya kisi dusre kaam ke saath saath hi yeh job kar rahe hain. Part time job sirf kuch ghanto ka kaam hota hai. Mostly students hi Zomato ya Swiggy part time job karte hain taaki woh apne aap ko financially stable rakh sake. Agar aap Zomato ya Swiggy mein part time job karte hain toh aapko din ke 4 ghante kaam karna hoga, aap apne pasand ke 4 ghante select kar sakte hain. Part time job karne walo ki salary full time walo se kam hoti hai.

Weekend shifts– Weekend shift jobs par aapko sirf Friday, Saturday aur Sunday kaam karna hota hai. Mostly students yeh job prefer karte hain taaki ve apni padhai ke saath saath kuch kama sake.

Zomato ya Swiggy delivery boy job mein salary

Har company dwara offered ki gayi salaries alag alag hoti hai. Kayi companies salary ke saath saath incentives bhi offer karte hain. Delivery executives ki salary neeche diye gaye basis par ho sakti hai

  • Weekly basis- Weekly basis mein aapke bank account mein har hafte aapki decided salary aati rahegi.
  • Monthly basis- Monthly basis mein mahine ke shuruwat mein ya end mein aapke bank account mein aapki salary aayegi
  • Commission basis- Commission basis ka matlab hai ki aapki salary , aapke deliver kiye gaye product ke number par depend karegi. Yani aap jitney products deliver karenge aapki salary utni zyada hogi.

Ek delivery boy har mahine kitna kamate hain?

Agar hum Swiggy ka example le toh har delivery ke liye aapko Rs. 30 se Rs. 120 tak milte hai. yeh amount depend karta hai aapke delivery location ke distance par, matlab ki jitna zyada location ka distance hoga aapko utna zyada amount milega. Jaise ki agar aap 4 km ke andar delivery karte hain toh aapko Rs. 30-40 per delivery milte hain, aur jaise jaise yeh distance badhta hai waise waise aapka amount badhta hai.

Toh agar aap part time job karte hain toh aapko din ke 10-15 order delivery karne hote hain, iska matlab aap mahine ke Rs. 12,000- 20,000 tak kama sakte hain.

Aur agar aap full time job karte hain toh aapko har din 25-35 orders deliver karne hore hai, iska matlab aap mahine ke Rs. 25,000-40,000 tak bhi kama sakte hain. Iske alawa bhi company aapko incentives deti rehti hain. Toh agar usse bhi incude kiya jaaye toh aapko ek achhi salary mil sakti hai.

Swiggy aur Zomato jaisi companies apne delivery boys ko weekly pay karte hain, yaani har week ke end mein unke pass unki salaries pahuch jaati hain.

Iss baat ka dhyan rahe hi yeh companies aapko koi bhi vehicle provide nahi karegi, aapko apni vehicle ka intezaam khudh karna hoga aur uske fuel ke pasie bhi khudh bharne honge. Lekin kuch companies aisi bhi hai jo aapko fuel ke liye kuch commission alag se bhi dedeti hain.

Delivery Executive job se jude kuch khaas sawaal

Q.1) Inn companies mein kaam karne ke working hours kya hote hain?

Ek delivery executive kitne ke working hours hote hain, ye depend karte hain ki ve konse type ki shift kar rahe hain. Aur jaankari ke liye yaha click kare

Q.2) Kya delivery boy banane ke liye apne personal vehicle ki jarurat hoti hai?

Haan, aapko apne vehicle use karna hoga aur uska Registration certificate bhi aapke naam ka hi hona chahiye , baaki documents ki jaankari ke liye yaha click kare

Q.3) Kya petrol ka kharcha hume khudh karna hoga ya companies dengi?

Kayi companies aisi hai jo aapko km ke hisaab se petrol ke liye commission deti hain, lekin kayi companies aise bhi hai jo aapke salary mein hi petrol ka kharcha include kar deti hain.

Q.4) Kya in companies ki koi uniform hoti hai?

Uniform hona ya na hona company to company depend karta hai lekin aisi bahut saari companies hai jismein kisi bhi type ka uniform compulsory nahi hai. Swiggy aur Zomato apne delivery boys ko unki company ki t-shirts deti hain lekin yeh unko yeh t-shirt lene ke liye Rs. 1000-1500 ka security amount dena hota hai.

Q.5) Kya inn companies mein koi part time job kar sakta hai?

Haan, bahut si companies jaise Swiggy, Zomato etc. apne delivery boys ko full time jobs ke saath saath part time jobs offer karti hain. Yeh jobs mostly sudents hi karte hain . Delivery boys ki alag alag type ki jobs dekhne ke liye yaha click kare

Q.6) Zomato ya Swiggy mein delivery boy job karne ke liye Qualifications kya hona chaiye?

Delivery boy banane ke liye kisi khaas qualification ki jarurat nahi hai. Kuch companies sirf 10th pass ya 12th pass ka certificate maangti hain. Eligibility ke baare mein adhik jaankari ke liye yaha click kare

Humein umeed hai ki iss information se aapko kaafi had tak samajh aagaya hoga ki India mein delivery boy kaise bane. Humne puri kosish ki hai ke shuruwat se ant tak aapko har sawal ka jawab mil jaye. Agar abhi bhi aapko kisi jankari ki jarurat ho toh comment mein jarur puchein. Hum aapki puri madad karenge.

1 COMMENT

LEAVE A REPLY

Please enter your comment!
Please enter your name here