achar ka business plan

Achar ya pickle ek aisa product hai jiska sevan bharat ke har ghar mein hota hai, achar ka upyog poore bharat mein hone ke kaaran iss business ke chalne ki sambhavana, na chalne ki sambhavana se kahi zyada hai. Iss business ko khada karne ke liye sabse zyada zaruri hai achar banane ki vidhi. Agar apka achar ek achhi aur swadisht vidhi se banega tabhi ve grahako mein apni chaap chodh sakta hai.

Achar ya pickle business bina kisi khaas investment ke aap apne kitchen se hi shuru kar sakte hai. Iski demand market mein humesha hi rehti hai ,isliye iss business ke chalne ki apar sambhavna hai. Agar aapka achar ek baar customers ko pasand aa gaya toh phir aapka business bahut tezi se badhega.

Iss article mein hum aapko batayenge

Kya hota hai achar ka business

Kaise shuru karein achar ka business

Market ki jaankari

Laagat aur infrastructure

Kitna profit ya munafa kama sakte hain

Kanuni prakriya (license)

Achar ki packing kaise karein

Achar business ki Marketing kaise karein

Achar Business ki best tips

Achar business ke awasar

FAQs


Kya hota hai achar ka business

Achar business ya pickle business se humara matlab ye hai ki koi akela insaan ya koi company achar bana kar, uski packing aur marketing kar ke, usko market mein bechkar munafa kamaye. Ye business ya toh ek prakar ka achar bana kar ya ek se zyada prakar ke achar bana kar kiya jaa sakta hai.

Yeh ek aisa business hai jisme kam laagat hai aur munafa bhi asani se kamaya jaa sakta hai. Aur iss business ki khaas baat ye hai ki aap ye business ghar baithe baithe bhi shuru kar sakte hain.

Iss business ke liye sabse zaruri hota hai achar banane ki vidhi ya recipe. Ek achhi recipe aapke business ko nayi unchaiyon par lekar jaa sakti  hai. Achhi recipe hi grahak ko aapka achar khareedne keliye lubha sakti hai. Grahak aapka achar tabhi khareedenge jab unko aapke achar mein ek alag aur acha swaad aaye jo market mein kahi aur available nahi hai. Agar aap ve achar bechte hain jiski market mein demand hoti hai tab bhi aapka business achhe se chalega.

Pickle industry ek badhti hui industry hai. Anumaan hai ki 2024 tak iss industry mein bahut achhi growth ho jayegi.

Source : Mordor Intelligence

Kis prakar ke achar bana sakte hain?

Aap chahe toh ek ya ek se zyada achar bana kar bech sakte hain. Iske liye aapko ye pata lagana hoga ki aapki market mein sabse zyada kis achar ki demand hai.

Generally aam aur neembu ka achar zyada bikne wala achar hai. Iske alawa aap gobhi, karela, amla, adrak, mirchi, gajar, kathal, lehsun,meat, chicken, fish, mixed, aur kayi achar ke prakar bana sakte hain. Meetha achar aur murrabbe ke bhi kayi prakar ban sakte hain. Mausum ke anusaar bhi alag alag achar market mein pasand kiye jaate hain. Aap seasonal achar bana kar bhi achhi kamai kar sakte hain.

Sahi pricing hai jaruri

Apne achar ki sahi pricing karna bhi bahut zaruri hai. Apko iss baat ka dhyan rakhna hoga ki aapki saari cost bhi cover ho jaaye aur grahak ko iska price zyada mehenga na lage.

Kyonki aapka naya business hai toh aapko baaki existing competitors se kam daam rakhna chahiye taaki apke kam prices ki wajah se grahak ko apka achar khareedne ka mann kare. Jaise ek kilo (1 kg) aam ke achar ka daam market me lagbhag Rs. 90 se Rs. 110 hai. Toh aap apne aam ke achar ka daam Rs. 90 se kam rakhein taaki log apka achar khareedein.

Kaise shuru karein achar ka business

Achar making business shuru karne se pehle aap apna achar apne dosto, rishtedaaro aur moholle walo se taste karvaaye, unke feedback ki madad se aap apni recipe achhi kar sakte hai aur apna business badha sakte hain. Iss feedback se ye bhi pata chal sakta hai ki konsa achar sabse zyada pasand kiya jaa raha hai aur konse achar ki demand sabse zyada ho sakti hai.

Agar aapke ghar mein achar sukhaane aur rakhne ki jagah ho toh ye business ghar se shuru kiya jaa sakta hai. Naye business ke liye ye zaruri hai ki woh shuruvat mein zyada nuksaan na de. Iss business mein kam laagat hoti hai jiske kaaran iske nuksaan bhi kam ho sakte hai.

Agar aap thode bade level par ye business karna chahte hain toh do-teen logo ko kaam par rakh kar bhi iss business ki shuruvat  kar sakte hain.

Yeh business shuru karne se pehle ye zaruri hai ki aap apne local sabzi wale se pehle hi dealing karke rakhe. Kyonki apko lagatar unn sabziyo ko khareedne ki jarurat rahegi. Achar ka business profitable tabhi hoga agar aapka achar grahak ko pasand aaye aur unko apni demand ke anusaar milta rahe.

Kon shuru kar sakte hai

Mahilaayo ke liye yeh bahut achha awasar hai. Achar ka business housewifes ke liye bahut achha hai aur unn logo ke liye bhi achha option hai joh ghar se kaam karna chahte hain. Agar aapko apna naya karobar kam laagat mein shuru karna hai toh ye business aapke liye kaafi fayedemand saabit ho sakta hai. Iske liye kisi degree ki koi zaroorat nahi hai. Agar apko tarah tarah ke achar banana aate hain toh aap ye business asani se kar sakte hain.

Aajkal mausum ke anusaar bhi achar bahut pasand kiye jaate hain jaise gobhi, mooli, gajar, matar etc. Anek companies ye seasonal achar bana kar bech rahi hain lekin inki demand ki wajah se ve apne orders poore nahi kar paa rahi. Isliye mausum ke anusaar aap achar taiyar kar sakte hain.

Agar aap badhiya achar bana lete hain toh apko market mein jaakar bechne ki bhi jarurat nahi hogi. Aap ghar se orders lekar  bhi apne business ko badha sakte hain.

Apni recipe develop karein

Pickle business mein sabse important step hai apni khud ki recipe develop karna. Logo ke paas aapka achar baar baar khareedne ka koi kaaran hona chahiye. Ye recipe aapke grahak ke taste ke anusar develop honi chahiye.

Purani recipes jaise ki dadi aur nani ke nusko se bhari recipe sabko pasand aati hai. Logon ko ghar mein bana hua achar bahut pasand aata hai kyonki usme unko ek apnapan sa lagta hai. Isliye homemade achar ki demand bhi zyada hai. In baaton ko dhyan mein rakhte hue aap homemade achar recipes ko apne business mein istemaal karne ki koshish karein.

Lekin agar apko achar banana nahi aata ya aapke pas koi khaas recipe nahi hai toh aap government institutes se bhi training lekar ye business shuru kar sakte hain. Aisa hi ek institute hai Micro Small Medium Enterprise Development Institute. Iss institute mein pickle making ka certificate course available hai . Ye course karne ke liye aapko 8th pass hona zaruri hai. Ye couse 6 weeks ka hota hai. Iss course aur institute ka form bharne ke liye neeche diye gaye link par click kar sakte hain. Micro Small Medium Enterprise Development Institute
Aap chahe toh online jaakar bhi aap achar banane ki alag-alag recipes seekh sakte hain. TarlaDalal , IndoBase , ArchanasKitchen , VegRecipesOfIndia jaisi websites par bhi ye recipes available hain.

Market ki jaankari

Recipe decide karne ke baad agla decision aata hai location choose karne ka. Agar aap chahe toh achar ka business ghar se bhi shuru kar sakte hai, lekin iss baat ka khayal rakhna hoga ki ghar mein jagah ki kami na ho aur achar ko sukhane ke liye koi khula area jaise ki rooftop (chhat) area ho jaha dhoop aa sake .

Agar aap ghar se business nahi karna chahate toh aap koi jagah kiraye par le sakte hai ya khareed sakte hai. Jagah ka chayan anye factors ko dhyan mein rakh kar karna chahiye jaise :

  • Raw material ki availability
  • Market area
  • Business ka level
  • Agar aap ek nayi dukan khol rahe hain toh apni dukaan ko kisi aise area mein kholein jahan aapke competetors kam ho.

Aap apne area mein achar business ki shop lene ke liye neeche diye gaye sites se rates pata kar sakte hain –

·     Magic Bricks

·     99Acres.com

·     OLX

Location ke baad aati hai baari company ke naam ko chunne ki. ye step zaruri isliye hai kyonki ye naam aapke registeration certificate par aur Packing par humesha aata hai. Naam sochte waqt in baaton ka dhyan rakhe:

  • Naam easy aur chota hona chahiye taaki logon ko dukaano mein maangne mein asaani ho.
  • Pickle business se relate karta hua naam hona chahiye, bina kisi relation ke naam rakhne se uski uniqueness kho jaati hai.
  • Kisi aur badi company se milta hua nahi hona chahiye, ye aapke liye problem khadi kar sakta hai.

Pickle ya achar business ke kuch naam : achar addict, amma’s achar etc.

Achar Kaha beche

  • Achar bechne ki shuruvat apne dosto, rishtedaaro aur parichit logo se kar sakte hain
  • Retail shops aur kiraane ki dukaan par jaake apna achar wholesale mein bech sakte hain
  • Aaj kal har cheez online mil jaati hai, aap apna business online bhi kar sakte hain. Online orders lekar aap ek delivery boy ko hire karke saare orders deliver karva sakte hain. Ek baar naam prasidh ho jaane par aap ghar baithe order bhi le sakte hain.
  • Apne aas-pass ke hotel, restaurants, canteens aur food joints par bhi achar bech sakte hain

Laagat aur infrastructure

Ye ek aisa business hai jo ghar baithe hue ek insaan akele bhi kar sakta/sakti hai, jiske liye kam se kam Rs. 20,000-40,000 ki laagat hogi. Ghar mein business shuru karne se pehle ye baat dhyan mein rakhein ke aapke pas achar sukhaane ki aur rakhne ki jagah honi chahiye.

Agar aap chote level se start kar rahe hai toh aapko zyada cheezo ki jarurat nahi hogi. Raw material jaise sabziyan (vegetables), oil, masale etc. ka stock humesha rakhe. Agar aap ek achar se hi shuru kar rahe hain toh aapko sirf ek hi sabzi khareedne ki jarurat hai. Lekin aapko business shuru karne se pehle local sabziwale se sa kisi wholesale mandi mein jaakar dealing karni padegi taaki apki sabzi ke stock ki kami na ho aur aapko sabzi saste mein mile.

Stock lete samay iss baat ka khayal rakhein ki aap utna hi stock le jitne ka achar bana sakte hai, taaki sabziyaan ya achar, dono mein se kuch bhi kharab na ho.

Iske alawa aapko achar banane ke liye bade bartan, barne(jars) aur kuch packing material ki bhi jarurat hogi.

MaterialQuantityShuruvaati Laagat
Sabziyaan 50-100 kg Rs. 3000-6000
Oil ( sarso ka tel)50-100 litresRs. 5000-10000
Sirka ( vinegar)20-30 litres Rs. 2000-4000
Masale  (quantity)20-30 kg Rs. 4000-7000
equipment( bade bartan, jars, cutting material)5 bade bartan50 jars 1 cutting machine
Rs. 7000-11000
Packing machine and some packing material( as required)1 machine Rs. 4000-8000
total
Rs. 25000-45000

Agar aap loan lekar ya badi investment karke apne pickle business ki shuruvat karna chahte hai, toh aapke pass ye saare options available hai:

Sarkari loan

Aap chahe toh Startup India ke tehat sarkaar se loan le sakte hai.
Iss organization me aisi scheme hai jo small scale businesses ko aage badhane mein madad karti hai, jiska naam hai Mudra scheme. Mudra loan sceme ek collateral free loan scheme hai jisme interest bhi kam charge hota hai. Iss scheme ke andar 3 tarah ke plans hai:

Mudra scheme ka funding support in chaar prakaar ka hota hai.

  • Micro Credit Scheme (MCS) , 1 lakh tak ke finance ke liye
  • Commercial Banks / Regional Rural Banks (RRBs) / Scheduled Co-operative Banks ke liye refinance scheme
  • Women Enterprise programme
  • Loan portfolio ka securitisation

Mudra scheme ke baaki mein aur jaankari ke neeche diye gaye link par click karein Mudra Loan Scheme

Bank Loan

Aap chahe toh bank se loan lekar bhi apne kaam ki shuruvat kar sakte hain. Bank loans kisi bhi small ya medium sized business ke liye kaafi important role play karta hai. Agar aapke pas apna khud ka investment nahi hai toh aap bank se loan sanction karwa sakte hain. Bank se loan sanction karwane ke liye aapko kuch cheezon ki requirements hongi jaise –

  • Aapki age limit 21-65 years ki honi chahiye
  • Aapko ek profit margin dikhani hogi jo bank ko trust provide karega. Profit kam se kam rs. 1,50,000 ki honi chahiye
  • Ek proper business plan dikhana hoga jo ki loan provider ko aapke business ke bare mein puri jaankari de sake

Business ke liye loan ki jaankari ke liye click kare

Medium scale business ki laagat

Medium scale business ke liye aapko neeche diye gaye equipments ki zarurat hogi.

  • Grinder
  • Pickle Mixer
  • Weighing scale
  • Packaging unit
  • Labelling machine
  • Utensils etc.

Iske alawa aapko ek badi jagah ( lagbhag 2500 sq. ft.), raw material, manav shram ( labour) aur government subsidised electricity

MaterialQuantityShuruvaati laagat
Sabziyaan 500-1000 kg Rs. 30000-50000
Masale 200-300 kg Rs. 20000- 40000
Machinery Upar di gayi machinery
Rs.  10,00,000-15,00,000
Tel aur sirka 500-1000 litresRs. 1,00,000-2,00,000
Packing material500-1000 jars
Plastic material
Labels
Rs 50000 – 1,00,000
Manav shram (labour) aur salary10-15 workers
Aur delivery boys
2,00,000-3,00,000 ( per month)
rent (factory aur outlet)1 factory
1 outlet
2,00,000-5,00,000 (area to area change ho sakta hai )
Total
16,00,000-26,00,000

Kitna profit ya munafa kama sakte hain

Achar ka business ek aisa business hai jiski demand kabhi kam nahi hoti hai. Kisi bhi function mein ya restaurant ke menu mein achar ka hona pakka hi hai. Isliye iss business mein kamai karna aur iss business ka grow hona koi mushkil kaam nahi hai.

Agar aapke business mein Rs. 30,000-50,000 ki lagat aur marketing ki gayi hai toh iss business mein lagbhag 30-40% tak ka profit ya munafa ho sakta hai. Iska matlab shuruati samay mein hi company ko Rs. 10,000-20,000 tak ka munafa ho sakta hai.

Achha  business jamne ke baad har mahine Rs. 30,000-50,000 tak ka munafa hona sambhav hai. Yani saalana aap Rs. 4,00,000-7,00,000 tak ka profit kama sakte hain.

Ye sab aapki marketing par nirbhar karta hai. zyada marketing karne par zyada grahak milte hain jisse munafa bhi zyada hota hai. Iske alawa munafa aur kayi cheezo par nirbhar karta hai jaise product ki demand, packing, tarah-tarah ke achar, market area, achhi marketing. Isliye ek successful business chalane ke liye aur zyada se zyada munafa kamane ke liye apko in sabhi baaton ko dhyan mein rakhna hoga.  

Kanuni prakriya (License)

India mein kisi bhi business yaa koi shop kholne ke liye aapko kayi saari registration processes se gujarna hota hai. Agar achar making ke business ki baat ki jaye toh aapko pehle toh apne business ka registration karwana hoga, jiske liye pehle aapko apne company ka brand name register karvana zaruri hai. Achar business shuru karne ke liye neeche diye gaye licenses ki bhi zarurat hoti hai.

FSSAI license                                                                     

Yeh ek food related business hai, aur Kisi bhi food related business ke liye Food Safety and Sandard Authority of India (FSSAI) se license prapt karna zaruri hai. Ye license prapt karne ke liye License Authority ko ek application send kar sakte hain. Ye license lene ke liye aap online form bhar sakte hain. Registration hone ke baad aapke business ko ek FSSAI number diya jata hai. Ye FSSAI number aapke har product ke packaging par mention hona chahiye.

FSSAI registration ki puri jaankari ke liye yaha click kare

Small scale achar ya pickle business ke liye zaruri documents

Aur jaankari ke liye FSSAI ki website par jaa sakte hai.

License ke liye apply karne se pehle aapko ye decide karna zaruri hai ki aap kis type ka business chalana chahte hai. Aapko apne business ke structure ke anusaar ye decision lena hoga, yani ye iss baat par nirbhar karega ki aap apna business kis scale par kholna chahte hai. Aapke pas teen options hai:

  • Ek proprietorship : ye ek aise type ka business hota hai jo ek insaan dwara chalaya jaata hai. Sole proprietorship mein business ke maalik(owner) aur uske business me koi legal difference nahi mana jata.
  • Ek partnership : ye ek aisa business hai jo do ya do se zyada log milkar chalate hai. Jinte bhi owners hain, ve saare business ke munafe, nuksaan aur zimmedariyon ke barabar ke hissedar hote hain.
  • Ek Private Limited Company/Corporation: ye ek aisa business hai jo apne maalik(owners) se legally alag hota hai. Yeh ek separate legal identity hai jiske liye owner sirf ek limit tak hi liable ya zimmedar hote hai.

Tax Compliance

Har business ko apna GST registeration complete karna jaruri hai aur uske saath ek GSTIN/SGST number lena bhi zaruri hai. Ek business ka GST number lene ke liye  neeche diye gaye documents ki bhi jarurat hoti hai.

GST registration ke liye aapko GST ki official website par jana hoga. GST ki official website par jane ke liye yahan click karein – Goods and Service Tax

Iske alawa GST form kaise bharein janne ke liye yaha click kare.

Shops and Establishments Act ke tehat registration

 Achar ka business ya phir koi bhi food business kholne se pehle usko shop and establishment act ke under register karvana zaruri hai. Chahe aap ghar se kaam karte hain ya phir kisi factory ya shop se, ye license lena sabke liye jaruri hai. Ye registeration certificate ek form, required documents aur fees pay karke prapt kiya jaa sakta hai.

Shop and Establishment Act License ke liye required documents

  • Pan Card
  • Identity Proof
  • Address proof of the proprietor, partner aur the company
  • Details of the employees

Shop and establishment act ke baare me aur jaankari ke liye yaha click karein

·     Health Trade License

 Ye woh license hai jo ek business ko unn particular items ka vyapaar karne ki anumati deta hai jiska asar seedha customers aur public ki health par padhe. Jis business ke pass ye Municipal Corporation ka license hota hai woh business hygiene aur safety standards ko meet karta hai. ye health trade license vo State Municipal Corporation ya Health Department issue karta hai jis state mein ye business kiya jaa raha hai.

Required documents for health trade license

  • Sanction aur Completion (Includes Ownership proof, Rent agreement aur landlord aur padosi ki NOC )
  • Site plan aur layout ki teen copies
  • Rs.100 ka indemnity bond
  • Structural Engineer dwara sign kia hua Structural Stability Certificate
  • Power aur Water ke paid Bills
  • Sewer Connection kaProof
  • Water Testing Reports
  • Apni jagah ka sahi plan
  • Property Tax ka proof
  • Workers ka medical fitness certificate

Achar ki packing kaise karein

Achar ki packing aapke business ke liye ek bahut important step hai. Agar achar theek se nahi store kiya gaya toh uske kharab hone ke chances hai. Isse market mein le jaane ke liye aur bechne ke liye achhi packing bahut zaruri hai. Achar ko hygeinic packaging mein rakhna hota hai taaki woh lambe samay tak chale aur grahak ko shikaayat ka koi mauka na mile.

Aap chahe toh neeche diye gaye tareeko mein apna achar pack kar sakte hai.

  • Glass ya mitti ke containters mein achar store kare. Aluminium ya kisi aur material mein store karne se uske kharab hone ke chances zyada hojate hai.
  • Aap ek kilo(1 kg), do kilo(2 kg), paanch kilo(5 kg) aur dus kilo (10 kg) ke glass containers mein achar pack kar sakte hai
  • Kam quantity jaise 250 grams, 500 grams aur ek (1)kg ke liye aap transparent plastic pouches ka bhi use kar sakte hai.
  • Bade containers ko surakshit rakhne ke liye aap ek outer box packing (cardboard ka box) bhi de sakte hai.

Achar ki packing zaruri hoti hai kyonki ek food item hone ki kaaran iska hygiene level maintain karna bahut jaruri hai, iske alawa aapki packaging jitni sundar hogi utna acha hoga kyonki grahak usi ko dekh kar aapke achar ki taraf attract hota hai. Toh aapko apne achar ki packing creatively aur bahut sundar tareeke se karni chahiye. Aap neeche diye gaye packing tips ka istemaal karke apni packing ko aur effective bana sakte hai.

Achar business ki marketing kaise karein

Koi bhi business chahe wo chhota ho ya bada, usse aagey badhane ke liye uss business ki achhi marketing karna bahut zyada zaruri hai. Iske liye dhyaan rakhein ke aapke business ke according aise kon se marketing ke tarike hain jissey aap zyada se zyada logon tak apne business ko pahuncha sakte hain.

Ab baat ye hai ke aap apne baaki competitors ke comparision mein aisa kya kar rahe hain jo ki aapke achar ke busniess ko bakiyon se alag banayega aur aapke customers ki list badhyega. Aap neeche diye gaye tareeke use karke apne pickle business ki achhi marketing kar sakte hai

Offline marketing

  • Chote chote pouch mein apne achar ka sample ke taur par free de Achar ke business ko safal banane mein sabse bada haath hota hai achar ki recipe ka. Toh agar aap grahako ko free samples deke unse apna achar taste karvayenge toh ve pasand aane par apse achar zarur khareedenge.
  • Newspaper aur pamphlets ka use kare:  newspaper aur phamplets ke dwara apne local area mein aap apne naye business ki achhi marketing kar sakte hai.
  • Packaging acche se kare:   ye ek achha tareeka hai apne business ki sales badhane ka. Agar aapki packaging logo ko lubhaayegi tabhi ve aapka product khareedenge. aapko apni packinging par saari jaruri baatein likhni hongi taaki aapke customers apka achar safely aur bina kisidoubt ke istemaal kar sake.
  • Offers aur discounts dein: Iske alawa aap retail shopkeepers aur customers ke liye anye tareeke ke offers jaise discounts, festival offers aur buy get one one offer de kar apni company ki marketing kar sakte hai
  • Recipe booklet free mein dein : Bade retail orders jaise 5kg aur 10kg pickle jars ke sath aap ek general recipe booklet bhi de sakte hai. Apni special recipe ko na batate hue aap ek common aur easy recipe booklet de sakte hai jo koi bhi apne ghar par use kar sakte hain.

Online marketing

  • Social media par marketing kare jaise facebook, instagram, whatsapp etc.:  aajkal saara zamaana internet par basa hua hai. Har choti se badi khabar humein internet se mil jaati hai. Apne business ke bare mein aap facebook  par aur instagram par advertise kar sakte hai taaki logo ko iske bare mein ghar baithe pata chale. Ye kaam aap ek facebook page aur ek instagram account khol kar aur uspar apne achar business ke baare me regularly update karke kar sakte hain. Apne dosto, rishtedaro aur parichit logo ko apne business ki marketing whatsapp se kar sakte hai .
  • Yellow Pages – Yellow Pages ek directory hai jisme aapke seher ke har area ke chhote se lekar bade businesses ke numbers aur address hote hain. Yellow pages mein register karne aur jyada jankari ke liye yahan click karein.
  • Google mybusiness aur justdial (link): par apni business ko register kare aur uske baare mein likhe taaki logon ko apko contact karne mein koi dikkat na aaye. Isse aap apni ratings badha kar bhi apne business ka goodwill badha sakte hai.

Google Mybusiness : Google My Business Google ke taraf se ek free tool hai jissey aap apne business ko Google ki listing mein daal sakte hain. Iska fayeda ye hai ke jab bhi koi Google pe search karega ke aas pas achar manufacturing ya achar ki shop kahan hai ya fir sidha aapke naam se apki dukan dhundna chahega toh usey bhot aasani se apki shop ka sara detail Google par mil jayega.

Google My Business apke shop ka naam, shop tak pahunchne ka direction, Phone number, Reviews, Ratings, images aur details sab kuch ek hi jagah par apke customer tak pahuncha dega.

Google My Business ki jyada jankari ke liye yahan click karein.

Justdail : Just Dial ek esa platform hai jo ki kisi bhi area ke local businesses ki information provide karta hai jo ki aapko ya toh internet ke madhyan se aapko milegi ya fir call ke through pata chalegi. Just Dial mein bhi Google My Business ki tarah aapko apna busniess register karna hoga. Antar bas itna hai ke Just Dial mein aap do tarah ki listing kara sakte hain – Free listing ya fir Paid Listing.

Registration ka process kaafi simple hota hai aur ye aap online unki website se kara sakte hain ya fir aap 8888888888 pe call karke bhi registration kara sakte hain. Just Dial mein free listing karane ke liye yahan click karein – Just Dial Free Listing aur paid listing karane ke liye yahan click karein – Just Dial Paid Listing.

Achar business ke awasar

Achar business ek aisa business hai jo ki kam lagat mein chalne wala ek behtareen business hai aur kaafi zyada demand ke karan ek successful business idea bhi hai. Isiliye ye kehna galat nahi hoga ke ye business aaj ke daur mein aapke liye kaafi fayedemand ho sakta hai. Iske alawa, ek baar aapne ek successful achar business khol lia toh aapko future mein aane wale profit ke baare mein zyada sochna nahi padega.

Aur ek baar apki business chal jayegi toh aap usi ko chains ya branches mein bhi convert kar sakte hain jisme aap alag alag area mein usssi business ke naam par aur bhi manufacturing units ya outlets khol sakte hain.

Aap ek small scale business se medium ya large scale business mein convert ho sakte hai. Aur ghar se apna karobar badha kar ek proper factory khol sakte hai jiski investment lagbhag Rs. 15 Lakh se 25 Lakh tak ke beech mein aayegi, ye cost area to area bhi depend karegi. ye factoryya outlet kholne ke liye aapko ek badi jagah yani kam se kam 900 se 2500 sq. ft. ka area, automatic machines, packing machine, manav shram ( labour ya man power) ki jarurat padegi jiski liye startupindia ke tehat sarkaar se loan bhi liya jaa sakta hai.

Agar aap ye business bade level par kholna chahte hai toh iski kanuni prakriya bhi badh jaayengi jiske liye aap FSSAI ki website par jaa kar adhik jaankari prapt kar sakte hai. Lekin iss ane wala profit ya munafa bhi utna hi badh jaayega.

Achar business ki best tips

Kyonki ye business ek food related business hai toh in cheezo ka khaas khyal rakhna hoga.

  • Quality aur quantity se no compromise

Apke achar ka swaad humesha barkarar rehna chahiye, waqt ke sath quality aur taste mein fark nahi aana chahiye, quantity ka bhi khaas khayal rakhna hoga. Humesha customer ko sahi daam  par sahi quantity hi milni chahiye

  • hygiene (saaf safai) hi sahi mantra hain

Saara samaan safai se bana ho tabhi grahako ko apke achar par trust hoga aur ve usse tabhi khayenge, yaad rahe apko customer humesha ke liye banane hai na ki sirf ek single sale ke liye, isliye hygiene ka jitna dhyan rakhenge uthna achha hoga. Yani kitchen area aur packing area humesha saaf suthra rehna chahiye.

  • Packing aur Presentation zaruri hai

Agar aapki packaging sundar aur dilchazb hogi tabhi log usko dekh kar akarshit honge aur usse khareedne ka sochenge. Isliye presentation ko humesha achhe se achha rakhe. Inn packing tips ko humesha yaad rakhien:

  • Glass ya mitti ke container mein hi achar store karein, kisi aur material ka use na karein usse achar zyada din tak tik nahi pata.
  • Kisi bhi container mein achar daalne se pehle usse achhe se saaf yani sterlize karle aur container sukhne ke baad hi usme achar store karein
  • Container ko saaf karne ke baad ek katori mein heeng daalkar jalaye aur usme container ko ulta kar ke rakhde taaki heeng ka dhuan usme bhar jaaye. Isse container mein ek layer ban jaati hai jisse achar kharab nahi hota
  • Achar banane ke baad usse 3-4 din tak malmal ke kapde se cover karke dhoop mein rakhein , taaki achar ki nami nikal jaaye aur ye lambe samay tak kharab na ho.
  • Achar ki packing par humesha brand name, expiry date, manufacturing date, manufacturing address, ingredients, FSSAI number mention karein
  • Sirka ( vinegar) daalne se bhi achar ki shelf life badh jaati hai.

FAQs

FSSAI license ki jarurat kyu hai?

Ye license iss baat ka dhyan rakhta hai ki grahak ki safety par koi compromise na ho.

  • Grahak ka khaane ki safety aur quality ke prati confidence banane mein madad karta hai.
  • Alag alag regulations se chutkara paane mein madad karta hai.
  • Naye food products ko promote karne mein bhi madad karta hai.

Pickle packing machine ka minimum price kya hai?

Agar aap small scale pickle business kar rhe hai toh apko pickle machine ki jarurat nahi hai, sirf pouch sealingmachineki jaruratpadh sakti hai jo 1000-5000 tak ki miljaayegi, lekin agar aap medium ya large scale business krna chahte hai toh apko automatic packing machine ki jarurat padegi, jiski shuruvat 1 lakh se ho jaati hai. Agar aap pickle packing machines ke prices dekhna chate hai toh yaha click karein

Achar ko containers me pack kaise kare aur unn containers ko sterlize kaise kare?

Packing hamesha saaf suthri rakhni chahiye , adhir jaankari ke liye achar business ki best tips mein jaa kar packing aur presentation ki di hui tips ka istemaal kar sakte hain.

Achar ka business kholne ke liye kin license ki avashyakta hogi ?

Achar ke business kholne ke liye anya registeration processes se guzarna hota hai aur anya licenses prapt karne hote hain jaise FSSAI license, GST number, shop and establishment registeration, health trade license. Inn licenses ki detailed information ke liye kanuni prakriya (license) ke section mein jaayein.

Achar ki training kaha se le ya Achar banana kaha se seekhe ?

Achar ki training aap government institutes se, skill development centres se ya online jaakar bhi seekh sakte hai. Iske baare adhik jaankari ke liye yaha click karein

Achar banne ke baad packing ke samay usme 1 liquid dala jata he ,jisse ki achar zyada samay tak tika rahe. vo liquid ka naam kya hai?

Achar ko preserve karne ke liye vinegar yani sirke ka istemaal hota hai

Achar ko preserve karne ke leye kya karna chahye?

Namak ya vinegar, achar ke liye natural preservatives ka kaam karte hai. Aap chahe toh masalo ko achar mein daalne se pehle , alag se bhun sakte hai , uske baad usko dhoop mein sukhne ke liye rakh de taaki uski nami achhi tarah se nikal jaaye.

Packing machine kaha se khareed sakte hai?

Agar aap small scale pickle business kar rhe hai toh apko pickle machine ki jarurat nahi hai, sirf pouch sealing machine ki jarurat padh sakti hai jo 1000-5000 tak ki miljaayegi, ye aap online amazon se mangwa sakte hai ya apne shahar ki wholesale elecronics market mein se le sakte hai lekin agar aap medium ya large scale business krna chahte hai toh apko automatic packing machine ki jarurat padegi, jiski shuruvat 1 lakh se ho jaati hai. Agar aap pickle packing machines ke prices online dekhna chahte hai toh yaha click karein.

Humein umeed hai ke in information se aapko kaafi had tak samajh aagaya hoga ki India mein achar business ya pickle business kaise shuru kar sakte hain. Humne puri kosish ki hai ke shuruwat se ant tak aapko har sawal ka jawab mil jaye. Agar abhi bhi aapko kisi jankari ki jarurat ho toh comment mein jarur puchein. Hum aapki puri madad karenge.

She is a Bcom Hons. student of Shaheed Bhagat Singh College, University of Delhi. She is a senior member of Encode - the skill development society of SBSC, member of the Entrepreneur cell of SBSC and a member of Rotract Club Visioners League. She is a very positive person who always tries to contribute her bit towards the society She has also done a two month Digital Marketing internship with Josh Talks.

LEAVE A REPLY

Please enter your comment!
Please enter your name here