ladies_beauty_parlour_business

Aaj hum beauty ke business mein ladies beauty parlour ka business kaise shuru karein iske bare mein baat karenge. Ye business module aapko ladies beauty parlour ka business shuru karne se lekar uske profit ke bare mein detail mein btayenge. Is module mein hum har us pehlu pe baat karenge jo aapko ladies beauty parlour business karne ki shuruwat se anth tak ki saari jankari dega.

Is article mein hum aapko batayenge –

Ladies beauty parlour mein business ke awasar 

Kitna profit kama sakte hain 

Kya qualification honi chahiye

Beautician courses hindi mein 

Market ki jankari

Punji aur infrastructure

Kanuni prakriya

Marketing kaise karein

Executive summary

India mein beauty and wellness sector ajkal kaafi bulandi pe hai. India puri duniya mein beauty products or services ke consumption mein 2nd number par aata hai. FICCI aur KPMG dwara di gayi ek report ki maane toh India beauty and wellness industries ki ranking mein Top 5 countries mein se ek hai aur 2020 tak ye industry INR 1,50,000 Crores tak ka business kar sakta hai. India mein beauty aur wellness business ka growth karib 18% tak hua hai. Infact, India mein ye business kewal growth par nahi hai balki estimate lagaya ja raha hai ke ye business next 5 years mein triple ho jayega.

Toh ye kehna galat nahi hoga ke agar aap bhi is industry se impressed hain aur is field mein koi business shuru karna chahte hain toh aapko ye kaam jarur karna chahiye. Beauty and wellness industry mein beauty, nutrition, physical fitness, aur alternative streams of therapy aur rejuvenation jaise multiple business options hain.

Beauty care ka business kaafi grow kar raha hai Indian market mein. PWC dwara di gayi report ki manei toh ye industry 20 – 25 percent pe agey badha hai. Aur beauty and cosmetic product ke bad Salons ka hi business sabse jyada preference mein hai.

Beauty aur wellness sector ka divisionBeauty aur Wellness Sector ka preference ke according division

Source – PWC Report

Ladies beauty parlour mein business ka awasar

Ajkal logon ka view wellness aur beauty ke taraf badal raha hai. India ke middle class se lekar upper middle class tak log ajkal desh videsh jyada ja rahe hain. Aur abroad mein beauty products aur bhi varieties mein available hote hain jiski wajah se abroad se wapis aane par logon ka beauty products mein interest aur badh jata hai and so demand bhi usi tarah badh jati hai.

India ki 1.3 billion population mein se 47% population, under 25 age ke hain. Is age group ka apni sehat aur khubsurti ke taraf rujhaan sabse jyada hota hai. Isme social media ka bhi kaafi bada role hai. Kayi saare bade naam hain jo ki beauty and wellness field mein hi apna career bana chuke hain aur kaafi famous hain. Example ke taur par sabse famous Shehnaz Hussain ko hi le lijiye.

Toh jis rate mein logon ka khubsurti ke taraf rujhaan badh raha hai aur social media ka craze unchai pe hai, beauty aur welness industry kaafi agey jaane wali hai aur is field mein shuru kia gaya chhota se chhota business bhi aapko kaafi benefit dega.

Ladies beauty parlour business me kamai

Ladies beauty parlour business mein aaj ke lifestyle ke according dekha jaye toh kabhi kami nahi aane wali. Isliye is business mein profit kamana aur business ko acche se grow karna bhot mushkil nahi hai. Magar fir bhi, is business mein profit hona kaafi alag alag factors pe depend karta hai, jaise aapka parlour kon se area mein hai, aap kon kon si services provide kar rahe hain, aapke rates bakiyon ke comparision mein kitna hai, competition kitna hai, time etc.

Still, agar saare factors ko dhyaan mein rakhte hue, maan lijiye, aap mahine mein 3 lakh ka business karte hain toh aapko 50% ka profit mil sakta hai. Yani agar ek mahine mein aap 1 lakh ka business karte hain, toh 50,000 ka munafa kama sakte hain.

Yahi business shaadiyon ke season mein aur bhi jyada kamai karti hai. Aur ajkal shaadiyon mein, har koi, chahe lower middle class se lekar upper middle class aur high class, sabhi ko ladies beauty parlour ki jarurat padti hai. Toh wo ek esa time hai, jab aap kaafi jyada profit kama sakte hain aur apne business ko agey badha sakte hain.

Execution – Kaise shuru karein ladies beauty parlour business

Kya qualification honi chahiye

Ladies beauty Parlour kholne ke liye jyada qualification ki jarurat nahi hoti hai. Ye ek esa business hai jo har wo insaan kar skata hai jiska beauty aur wellness mein interest ho aur is field mein koi mukaam pana chahta ho.

Magar aj ke daur mein jab competition aur quality service ka demand itna badh gaya hai toh waise mein, kewal tajurba kaam nahi ayega. Isiliye is business ko shuru karne se pehle aapka kisi beauty course se certified hona jaruri ho gaya hai. India mein pehle ke comparision mein kaafi saare naye aur valuable beauty schools khul chuke hain jo aapko beauty and wellness related course aur certification provide karte hain.

Ladies beauty parlour courses hindi mein

Ladies beauty parlour courses yani beautician course kayi tarah ke hote hain aur aap inmein se apne interest ke according koi bhi course kar sakte hain jaise –

  • Skincare courses – Skincare aur aesthetics professionals wo hote hain jo logon ke skin related issues jaise acne, blemishes etc. mein madad karte hain.
  • Makeup Artist Course – Makeup Artists ki demand make up ke liye hoti hai aur ye ek kaafi valuable course hai.
  • Hairstylist course – India mein khubsurat balon ko kaafi saraha jata hai aur isiliye hairstylist ek evergreen course hai jisme aapko balon ke liye alag alag style sikhaya jata hai.
  • Cosmetology course – Ye course professional makeup artist banne ke liye foundation hai.
  • Nail beauty aur Nail art courses – Nail beauty and are course se aap nails par designing karna sikhte hain.
  • Spa Courses – Spa course mein aap massage aur physiotherapy related chizen sikh pate hain.

In mein se kisi bhi course ko karne ke bad aapki credibility aur bhi badh jati hai aur aapke business aur customers par iska kaafi positive prabhaw padta hai.

India mein ye course provide karne wale kayi institutes hain. Pehle ye institutes kam hua karte the par ab har ek seher mein institues khul gaye hain. Brand aur quality of course ke hisab se dekha jaye toh waise toh kayi saare institutes hain. Magar India mein Top level pe kuch institutes hain jaise –

Pearl Academy – Pearl Academy India ke Top 5 beauty and wellness institutes mein se ek hai. Inki branches Delhi, Noida, Mumbai aur Jaipur mein hai jahan aap courses kar sakte hain. Kuch courses jo aap yahan sikh sakte hain –

  • Hair Styling
  • Drama Makeup
  • Beauty Makeup
  • Celebrity Makeup and Bridal Hair
  • Massage etc.

Pearl academy mein admission process, courses, duration aur jyada jankari ke liye aap unke official website se puri jankari pa sakte hain. Jyada jankari ke liye yahan click karein.

Shahnaz Husain Beauty Academy – Shahnaz Husain, beauty industry mein jana mana naam hai. Shahnaz Husain Beauty Academy professional beauty training mein pioneer hai. Course jo aap yahan kar sakte hain wo hain –

  • Shahnaz Husian Professional Diploma In Cosmetology
  • Basic Diploma In Beauty Culture And Therapy
  • Diploma in Skin Therapy
  • Diploma in Hair Designing (basic & advance)
  • Post-Graduation in Skin etc.

Shahnaz Husain Beauty Academy mein admission process, courses, duration aur jyada jankari ke liye aap unke official website se puri jankari pa sakte hain. Jyada jankari ke liye yahan click karein.

Lakme Academy – Lakme academy India mein beauty treatment mein leading chain hai, jo ki 60+ cities mein available hai. Lakme academy se jo course aap kar sakte hain –

  • Beauty Therapy
  • Nail Art
  • Cosmetology
  • Skin Care
  • Hair Care

Lakme Academy mein admission process, courses, duration aur jyada jankari ke liye aap unke official website se puri jankari pa sakte hain. Jyada jankari ke liye yahan click karein.

In institutes mein training lena aur course karna aapke professional beauty career ke liye kaafi accha rahega, par agar aap in institutes se courses na bhi kar paye, toh bhi apne seher ke kisi bhi acche institute se course kar sakte hain. Jyada important ye hai ke aapko accha kaam aana chaiye aur beauty related har chiz ki knowledge honi chaiye.

Iske alawa Google pe kayi Applications bhi available hai jismein video ke madhyam se aasani se aap make-up, hair style, aur kayi sari beautician courses or tips hindi mein sikh sakte hain. Inmein se ek aap hai jo sabse jyada pasand kiya gaya hai us App ka naam hai “Beauty Parlour Course” or ye kuch is tarah ka dikhta hai –

Beauty parlour courses hindi meinBeauty parlour course hindi meinBeauty parlour course hindi mein

Ye App ya toh aap apne phone mein play store mein jaker download karein. Download karne ke liye Play Store pe search karein “Beauty Parlour Course” ya fir niche button pe click karke download karein –

App download karne ke liye yahan click karein

Market ki jankari

Ladies beauty Parlour kholne se pehle market area ko lekar kayi saare factors hain jinko aap dhyaan mein rakhein. In factors pe hi decide hoga ke apki shop kaisi honi chahiye aur kon se area mein acchi chalegi.

  1. Existing parlour kharidein ya naya parlour kholein

Ek independent parlour kholne ke liye ya toh aap kisi pehle se existing parlour ko kharid sakte hain ya fir apna khud ka parlour shuru kar sakte hain. In dono tarike ke alag alag fayede aur nuksan hain.

Existing Parlour

Fayeda

  • Bana banaya parlour aur consumer base paye
  • Purane staff ko apne sath rakha ja sakta hai
  • Bhot jyada advertisement ki jarurat nahi padti

Nuksan

  • Established parlour ko kharidna mehnga hota hai
  • Kharidne ke liye jyada loan lene ki jarurat pad sakti hai
  • Parlour jahan hai wahin aapko apna business shuru karna hoga

Naya Parlour

Fayeda

  • Naya parlour khada karne mein investment kam lagti hai
  • Kam paison mein bhi parlour shuru kia ja sakta hai
  • Apne mann chahe location pe parlour shuru kar sakte hain

Nuksan

  • Nayi dukaan kholein aur naye consumers ko attract karein
  • Naye staff ko hire karne ki jarurat hai
  • Consumers badhane ke liye advertisement ki kaafi jarurat hogi
  1. Locality aur area ke liye research karein

Area aur locality ke bare mein jankari nikalne par aapko ye samajh ajyega ke esi kya chiz ya facility ya offer hai jo ki sirf aapka parlour provide kar sakta hai jo ki baki nahi kar pa rahe, jaise offers, jyada se jyada services, etc. Research karte waqt in kuch baton ka dhyaan dein –

  • Is baat ki research karein ke aapke area mein kis age group ke log jyada rehte hain. Jaise ki jis area mein teenage students, working professionals, youngsters, college students jyada honge, us area mein parlour ki demand bhi jyada hogi kyunki is age group mein logon ko apne aapko maintain karke rakhna accha lagta hai.
  • Apne locality ki economic status ke bare mein pata karein. Agar aapki locality ke logon ka economic status niche hain toh aapko apne parlour ke rates ko bhi kam rakhna hoga. Aur agar economic status accha hai toh aapko aasani se ek resonable rate mein kaafi business mil jayega.
  • Dhyaan rakhein ke apke area mein kitne ladies beauty parlour hain. Jitni hi jyada shops aapke chune hue locality mein hongi aapke liye competition utna hi badh jayega aur aapko utni hi jyada mehnat karni hogi sabse agey badhne ke liye. Ye namumkin nahi hai magar mushkil jarur hai.
  • Aas pas ke business aapko ye andaza de sakte hain ke wo area business shuru karne ke liye fayedemand hoga ya nahi. Jaise ki agar koi bada brand apke chune hue area mein apna business chala raha hai, iska matlab hai ke us brand ne bhi kaafi research kia hoga aur uske bad hi apna business shuru kia hoga. Matlab wo area apke liye bhi fayedemand ho sakta hai.
  • Ye bhi pata karein ke kya aapke chune hue area mein koi aur bhi parlour the jo ki recently band ho gayi ho. Agar haan, toh kya karan tha jiske wajah se wo dukaan band hui. Kya pata wo karan aapke dukaan ko nuksaan se bacha de.

Punji Aur Infrastructure

Punji (Investment)

Ladies beauty parlour business shuru karne se pehle aapko decide karna hoga ke aap kis level pe parlour kholna chah rahe hain. Yani, kon se area mein kholna chah rahe hain, kitne number of staff hire kar rahe hain, kon kon si facilities de rahe hain, kitna equipment laga rahe hain aur kitna bada parlour kholna chah rahe hain. Ye saari chizen aapke budget ko decide karengi ke kitna investment aapko parlour ke liye chahiye hoga.

Iske alawa aapke shop ke area ki baat kia jye toh, kam se kam 100-1000 Sq. ft. ka area kisi bhi parlour ko kholne ke liye jaruri hai. Is area ke barabar shop lene par uska price aapke area ke economic status pe depend karega. Jaise agar aap 500 sq. ft. ka parlour kholte hain aur agar aapka area kaafi mehenga hai toh aapko jyada rental charges lagenge aur agar sasta hai toh kam charges lagenge. Aap apne area mein parlour lene ke liye niche diye gaye sites se rates pata kar sakte hain –

Investment ke liye aap in 3 tarikon mein se koi bhi choose kar sakte hain –

Ladies Beauty parlour business mein investment

Personal Investment – Personal investment yani apne hi paison ko apne shop ke liye invest karna sabse best option hota hai. Karan, issey apko loan lene ki jarurat nahi padegi jo ki aapko future mein wapis pay karna hoga. Iske alawa, agar future mein kisi aur se investment karani pad jaye, toh aapki khud se ki gayi investment aapke investor ke liye ek trust point ban jayega ke aap apne business ke bare mein serious hain.

Angel Investor – Angel investors wo log hote hain jo ke kaafi rich hote hain aur wo chhote businesses mein directly invest karte hain. In investors ko generally kaafi experience hota hai aur aapke business ko badhane mein wo aapki kaafi madad kar sakte hain. Angel investors ko aap internet par apne state ke according dhund sakte hain.

Dhyaan rakhein, in investors ko approach karne se pehle apne shop ko kholne ke liye pura plan taiyyar rakhein aur ek document bana lein jo aap unhe samjha sakein.

Bank Loan – Bank loans kisi bhi small ya medium sized business ke liye kaafi important role play karta hai. Agar aapke pas apna khud ka investment nahi hai toh aap bank se loan sanction karwa sakte hain. Bank se loan sanction karwane ke liye aapko kuch chizon ki requirements hongi jaise –

  • Aapki age limit 21-65 years ki honi chahiye
  • Aapko ek profit margin dikhani hogi jo bank ko trust provide karega. Profit kam se kam 1,50,000 INR ki honi chaiye
  • Ek proper business plan dikhana hoga jo ki loan provider ko aapke business ke bare mein puri jankari de sake

Finance mein ek aur kaafi important factor hota hai aapke shop ki insurance ka. India mein log insurance pe jyada dhyaan nahi dete hain, jabki aapko kabhi kisi bhi nuksaan, jaise chori ya koi accident, se bachane ke liye shop ki insurance karwana kaafi jaruri hai. Insurance ke liye bhi aapko kisi insurance company se contact karna hoga. 

Infrastructure

Ab baat karte hain ke ek parlour kholne mein kon kon se important equipments hain aur unko lene mein kitna paisa lagega.

Furnitures aur Appliances
Furnitures/AppliancesQuantityPrice (INR) – Approx.
Full-Size Mirror13500 – 8500
Parlour Rack15500 – 12,500
Parlour Chair12000 – 45,000
Shampoo Chair 14000 – 55,000
Automatic Hair Steamer12000 – 9000
Pedicure Foot spa Machine11500 – 6500
Hair Dryer1300 – 3000
Hair Straightener1500 – 3500
Hair Curler1500 – 3500
Wax Heater1250 – 1200
UV Sterilizer12500 – 5500
Make-up Brush1 Set300 – 3000
Comb1 Set200 – 1500
Scissors1 Set250 – 1500
Trimmer1500 – 3000
Miscellaneous0 – 2000
Total23,800 – 1,64,000
Cosmetics
CosmeticsQuantity (Approx.)Price (INR) – Approx.
Hair shampoo1 bottle70 – 350
Face cream and lotion190 – 1000
Aceton1 ltr50
Hair removing wax190 – 250
Hair spray1 bottle75 – 100
Hair Gel140 – 600
Sponge cotton1 pack20 – 30
Hand Towels150 – 150
Surgical gloves1 pairs25 – 50
Other cosmetics (Overall)10,000 – 20,000
Total10,510 – 22,580
Baki kharcha
1Electricity charges1000 – 2000
2Rent3000 – 20,000
3Telephone charges750 – 1000
4Other unforeseen expenses1000 – 1500
5Water charges250 – 300
Total6000 – 24,800
Staff
StaffNumberSalary (Per Head – Per month)
Beautician36000 – 18,000
Helper25000 – 8,000
Manager (Agar require ho)115,000 – 20,000
Total26,000 – 46,000
Pure Business ka Kharcha 66,310 – 2,57,380

Note: Ladies beauty parlour kholne ke liye aapko kaafi alag alag tarah ke cosmetics aur beauty products ki jarurat padegi. Isiliye ye sabse accha rahega ke aap ye sare products wholesale mein kharidein taki aapko market price se kam mein hi products mil jaye. Wholesale mein beauty products lene ke liye aap apne area ke kisi bhi wholesale dukaan par ja sakte hain ya fir Indiamart ke website se bhi quotes pata kar sakte hain. Jyada jankari ke liye yahan click karein.

Kanuni Prakriya (Legal process)

India mein kisi bhi business yani koi shop kholne ke liye aapko kayi sari registration processes se gujarna padta hai. Agar beauty parlour business ki baat kia jaye toh aapko pehle toh apne business ka registration karwana hoga aur ek TAX registration bhi karwana hoga. Agey vistar se jante hain ke ye dono registration kya hain aur kaise paya ja sakta hai.

Shop ki Registration

Agar aap apne state mein koi dukan ya business shuru karte hain toh aapko state government ke labour department mein Shop & Establishment Act ke under Shop ka registration karana hoga. Ye registrations online kia ja sakta hai aur registration ke liye aapko us state ke repective labour department ki website pe jaker Shop registration karana hoga.

Registration ke liye kuch information ki jarurat hoti hai jaise –

  1. Shop ka naam
  2. Shop ka address
  3. Manager ka naam
  4. Kis tarah ki shop hai, jaise, electronic, beauty parlour etc.
  5. Kitne employees kaam karenge

Registration ke liye ye documents lagenge

  1. PAN / Aadhar Card / Driving License/ Voter Id
  2. Photo of Owner
  3. Rent Agreement, if Rented
  4. Electricity Bill

TAX Registrations

Beauty parlour business mein tax registration ka matlab hai GST registration. Jab bhi India mein koi product ya kisi saaman ya kisi service ko business ke through dia jata hai toh uska GST registration karana hota hai. GST registration central govt. Ke under aata hai.

GST registration aap govt. Dwara provided official website se bhi kar sakte hai ya fir kisi private organization se bhi help le sakte hain. Govt. dwara provided website hai – https://www.gst.gov.in/. Iske alawa private organization jaise IndiaFilings pe jaker bhi aap GST registration karwa sakte hain. Niche diye gaye image se aap dekh sakte hain ke GST registration ke liye kya important documents jaruri hote hain.

GST registration ke liye important document

Source: IndiaFilings

Marketing kaise karein

Kisi bhi business chahe wo chhoti ho ya badi, use agey badhane ke liye us business ki acchi marketing karna bhot jyada jaruri hai. Iske liye dhyaan rakhein ke aapke business ke according ese kon se marketing ke tarike hain jissey aap jyada se jyada logon tak apne business ko pahuncha sakte hain.

Ab baat ye hai ke aap apne baki competitors ke comparision mein esa kya kar rahe hain jo ki aapke busniess ko bakiyon se alag bana raha hai aur apke customers ki list badha raha hai. Apne business ko agey badhane ke liye aapko in 3 baton ka dhyaan rakhna hoga – Shop ki Advertisement yani Prachar, Apka apne customers se behaviour yani customers se bartaw aur Customers ki benefits. Toh ayiye baat karte hain in teeno tarikon ke bare mein aur kaise aap apne business ko jyada se jyada logon tak pahuncha sakte hain.

  • Advertisement (Prachar)

Aap apne dukaan ka prachar kayi madhyam se kar sakte hain. Kuch tarike online kiye jayenge aur kuch offline. Baat karte hain in sare tarikon ke bare mein –

Online

Google My Business – Google My Business Google ke taraf se ek free tool hai jissey aap apne business ko Google ki listing mein daal sakte hain. Iska fayeda ye hai ke jab bhi koi Google pe search karega ke aas pas beauty parlour kahan hai ya fir sidha aapke naam se apki dukan dhundna chahega toh usey bhot aasani se apki shop ka sara detail Google par mil jayega.

Google pe kaise dhunde kisi business ko  Google pe kisi business ko kaise dhunde

Google My Business apke shop ka naam, shop tak pahunchne ka direction, Phone number, Reviews, Ratings, images aur details sab kuch ek hi jagah par apke customer tak pahuncha dega. Iske alawa agar koi kisi area mein apne aas pas ladies beauty parlour dhund raha hai aur apka parlour us area ke range mein aarai hai toh aapke shop ka naam aur detail bhi Google ki list mein ajayega. Issey aasani se apki parlour ko koi bhi online dhund sakta hai.

Google My Business mein account banana kaafi aasan hai. Niche diye gaye image ke steps ko follow karke aap aasani se apna account bana sakte hain –

Janiye kaise banate hain Google My business pe account

Google My Business ki jyada jankari ke liye yahan click karein.

Just Dial – Just Dial ek esa platform hai jo ki kisi bhi area ke local businesses ki information provide karta hai jo ki aapko ya toh internet ke madhyan se aapko milegi ya fir call ke through pata chalegi.

Just dial pe business ko kaise register karein

Just Dial mein bhi Google My Business ki tarah aapko apna busniess register karna hoga. Antar bas itna hai ke Just Dial mein aap do tarah ki listing kara sakte hain – Free listing ya fir Paid Listing.

Registration ka process kaafi simple hota hai aur ye aap online unki website se kara sakte hain ya fir aap 8888888888 pe call karke bhi registration kara sakte hain. Just Dial mein free listing karane ke liye yahan click karein – Just Dial Free Listing aur paid listing karane ke liye yahan click karein – Just Dial Paid Listing.

Offline

Hoardings – Ladies beauty parlour business esa business hai jo ki log jyadatar offline yani bina internet ke madhyan se dhundte hain, isiliye ye jaruri hai ke aap apne business ka prachar hoarding aur paper media ke madhyam se bhi karein. Hoarding ko lekar aapko kuch important baton ka dhyaan rakhna chaiye jaise –

  • Dukaan kholne se kuch dino pehle aap apne shop ke agey “Opening Soon” ka hoarding jarur laga dein. Taki aate jaate logon ko pata rahe ke ek naya beauty parlour shop unke area mein khulne wala hai.
  • Aap apne beauty parlour ki hoardings har un areas mein lagwa dein jahan logon ki bhid, jahan logon ko aapke shop ki jarurat hogi ya jahan market hai jaise Markets mein, colonies mein, cosmetic shops ke aas pas, apne area ke residential area ke aas pas etc.

Pamphlets – Apne shop ki advertisement aap pamphlets ke through bhi kar sakte hain. Isey ya toh aap khud aane jane wale logon ko dein ya fir apne area ke local newspaper wale ko kuch paise dekar bhi ghar ghar tak pahuncha sakte hain.

Yellow Pages – Yellow Pages ek directory hai jisme aapke seher ke har area ke chhote se lekar bade businesses ke numbers aur address hote hain. Yellow pages mein register karne aur jyada jankari ke liye yahan click karein.

  • Behaviour yani Bartaw 

Ek kaafi jaani maani kahawat hai –

ऐसी बानी बोलिए, मन का आपा खोय |

औरन को शीतल करै, आपहु शीतल होय ||

Kehne ka matlab hai ke logon se is tarah se baat karein ke auron ke sath sath aapko bhi khushi mile. Aapke behaviour ka logon ke mann par kaafi asar padta hai. Agar ek tarah koi aapse buri tarah se baat kare aur ek tarah koi aapse prem se baat kare, toh ye pakka hai ke aap agey se prem se baat karne wale vyakti ke pas hi jayenge.

Usi tarah agar aap apne customers se pyaar se baat karenge aur unhe behtareen service provide karenge toh log aapke shop mein bar bar ayenge.

Iske alawa wo log khud hi aapke shop ki reference apne janne walon ko denge, jo ki aapke shop ko bakiyon se alag aur naam badhane mein kaafi madad karega.

  • Customers ko benefit 

Aap jitna jyada apne customers ka dhyaan rakhenge aapka business utna hi jyada logon ke bich mashoor hoga. Isliye customers se judi in kuch baton ka dhyaan rakhein –

  • Apne customers ko aasan aur easy service provide karne ki kosish karein. Jitni aasani se aur kam samaye mein apki shop se log services le payenge, utna hi jyada log aapki shop par aana pasand karenge.
  • Dusre ladies beauty parlour ke comparison mein dhyaan rakhein ke esi kon si services ya products hain jo ki aap logon ko de sakte hain. Jaise, week mein kisi din apni service ko ghar par bhi jaker dena, offers aur discounts dena, beauty products bhi rakhein etc.
  • Jab bhi koi customer aapke shop par aaye, usey respect dein. Kayi bar customers aapke shop par aata hai aur usey koi attend karne wala nahi hota, ese mein kuch customers aapka vywahar pasand nahi karte hain aur wapis aapki shop par aana pasand nahi karte hain.
  • Kosish karein ke bakiyon ke comparision mein aap apne customers ko jyada se jyada aur acche discounts offer karne ki kosish karein. Agar aapke offers acche honge toh log aapki shop par aana jyada pasand karenge.

Iske alawa jab bhi aap offer ya discount dein, toh usey advertise jarur karein. Advertise karne ke liye aap apne beauty parlour ke bahar board laga sakte hain aur apne har customers ko bhi batayen ke aap apni services par offer/discount de rahe hain. Issey apke customers aur bhi logon ko offer ke bare mein batayenge aur aapka apne aap hi prachar ho jayega.

  • Discount offers ke alawa aap kuch certain amount kharch karne par coupons bhi provide kar sakte hain. Ussey coupons ke liye log utni service lene ki sochenge aur aapka sale pehle se behtar ho jayega.
  • Aur ek bhot hi important point hai, payment ka tarika. Aaj ka daur digitalisation ki aur badh raha hai. Aise mein koshish karein ke aapke customers ko payment karne mein koi dikkat na aye. Card payment se lekar online jitne bhi madhyam hain, unhe apni shop mein available rakhein taki log aasani se kisi bhi mode mein payment kar sakein.

Hair salon business kholne ki puri jaankari ke liye click kare

Hume umeed hai is business plan se aapko samajh agaya hoga ke kaise aap kaise ek beauty parlour business shuru kar sakte hain. Agar aapke mann mein iske alawa aur bhi koi sawal hai toh comment karke humse jarur pucchein.

Iske alawa agar aap medical store business ki bhi puri jankari chahte hain toh ye article jarur padhein – Medical store business plan

4 COMMENTS

LEAVE A REPLY

Please enter your comment!
Please enter your name here