tailoring_business

Tailoring business yani silai ki dukaan ek aisa business hai jismein kaafi kam lagat aur bina kisi mushkil ke aasani se kaam shuru kia ja sakta hai. Agar aapko kapde silai katai ka gyaan hai toh aap bhi ek tailoring business shuru kar sakte hain. Is business ko shuru karne ke liye aapko na toh jyada kanuni prakriya se hoker gujarna hota hai aur na hi jyada investment chahiye.

Toh ayiye is article se jaante hain ke kin jaruri chizon aur lagat ke sath aap bhi apna ek tailoring business shuru kar sakte hain.

Is article mein hum apko batayenge –

Tailoring business kon shuru kar sakte hain 

Kon sa course kar sakte hain – Tailoring course 

Tailoring business ki jaruratein aur lagat 

Tailoring business mein munafa

Locality aur area ke liye research karein 

Apne business ki marketing kaise karein

Tailoring business kon shuru kar sakte hain

Agar aap un logon mein se hain jo kam lagat mein ek aisa business shuru karna chahte hain jise shuru karne mein jyada dikkat na aye aur kamai bhi acchi ho toh aap bhi ek tailoring ka business shuru kar sakte hain. Tailoring business yani silai ki ek chhoti si dukan kholne ke liye jo sabse jyada jaruri hai wo hai aapka is business mein hunar.

Tailoring ek aisa kaam hai jo ki aap apne ghar se bhi shuru kar sakte hain ya ek chhote se kamre se bhi shuru kar sakte hain. Agar aapko silai katai, aur fashion ka thoda bhi gyaan hai toh aap bhi ek tailoring business shuru kar sakte hain. Ab baat aati hai ke kaise aap apne aap ko is business ke liye taiyyar kar sakte hain. Toh ayiye jante hain ke kaise aap apne silai katai ke skill ko aur agey badha sakte hain.

Kon sa course kar sakte hain – Tailoring course

Tailoring ka business ke liye waise toh aapko kisi yogyata ki jarurat nahi hai, bas aapko ye kaam aana chahiye, magar ek accha tailor banne ke liye agar aap silai katai ka course kar lete hain toh ye aapko kaafi fayeda dega. Ek accha tailoring ka business aap tabhi chala sakte hain jab aapke hath mein kapde silne ki kalakari ho.

Tailoring mein course

Agar aap 8th, 10th ya 12th pass hain aur kapde silai aur katai mein interest rakhte hain toh aap bhi tailoring course kar sakte hain. Kbhi kabhar aapse graduation bhi manga ja sakta hai magar wo tabhi hoga jab aap tailoring ke sath sath fashion desgining bhi sikhna chahenge.

Tailoring mein course aapko tailoring aur stiching se judi puri jankari deta hai. Is course mein aapko puri training di jaati hai ke tailoring mein kya kya kia jata hai, silai kaise ki jati hai, kapdon ka naap kaise lia jata hai aur baki har wo chiz jissey aap ek accha tailor ban sakte hain.

Ye courses aap apne locality ke kisi bhi training centre se le sakte hain. Agar aapko online search karna aata hai toh aap apne phone se search karke apne area ke local training centres ka pata kar sakte hain aur wahan admission le sakte hain.

Maan lijiye ke aap Delhi mein rehte hain aur kisi local trainer se tailoring sikhna chahte hain toh JustDial se number pata kar sakte hain. Jyada jankari ke liye yahan click karein – Tailoring classes in Delhi

Course duration: Tailoring mein diploma course 3 mahine se lekar 2 saal tak kiya ja sakta hai. Ye course har institute mein alag alag duration ka hota hai. Agar aap simple stitching ka course karna chahte hain toh aap 3 mahine se lekar 6 mahine ka course kar sakte hain. Aur agar aap stiching ke alawa fashion aur desgining ke bare mein bhi sikhna chahte hain toh ye course 2 saal tak ka hoga.

Fees: In courses ki fees har institute ki alag alag hoti hai. Course ke anusar bhi fees alag alag hoti hai. Jyadatar ye fees kaafi kam hota hai. Khadi gramudyog mein ye fees 100 rs ke prospectus ke alawa 200 rs/ month hoti hai. Agar yahi training sarkar dwara di jati hai toh kayi bar mahilaon, differently abled, anusuchit jati walon ke liye fees maaf bhi hoti hai.

Dekha jaye toh kisi private institute se training lene pe aapki fees 1000 rs se lekar 15000 rs tak ja sakti hai. Ye ek anuman hai, jab aap khud kisi training institute pe jayenge aur fees pata karenge tabhi aapko course ke anusar fees ki jankari mil payegi.

Tailoring mein training

Agar aapko tailoring mein course karne mein koi bhi dikkat hai, toh bhi aap ek accha tailor ban sakte hain. Iske liye aap apne area ke kisi bhi tailoring ki dukan mein kuch din ke liye naukri karke silai ka kaam sikh sakte hain.

Iske alawa kayi saare private institutes ya aise tailors hote hain jo kuch fees lekar aapko training dete hain. Issey aap ek already professional tailor ke under kaam karke tailoring sikh sakte hain.

Tailoring business ki jaruratein aur lagat

Tailoring business shuru karne mein aapko in kuch chizon ki jarurat hoti hai jo ki aapka kaam shuru karne ke liye aniwarya hain –

  • Ek kamra – Tailoring ya stitching ke business ko shuru karne ke liye aapko sabse pehle jarurat hogi ek kamre ki jahan baith kar aap apna kaam kar sakein. Aap chahe toh ek kamra apne ghar mein hi use kar lein aur apni dukaan wahi se chala sakte hain. Ismein apka fayeda ye hoga ke aapko tailoring ke saaman ke alawa aur koi kharcha nahi dena hoga, jaise rent, maintenance etc.

Aur yahi kamra aap rent par kisi market area mein ya kisi locality mein bhi le sakte hain. Agar aap rent pe kamra lete hai toh aapko kamre ka rent aur maintenance bhi dena hoga jo apke kharche mein jud jayega. Ye rent aapke kamre ka area aur kamre ke size pe depend karta hai jo ki kam se kam Rs. 3000 ya jyada se jyada aapke jarurat ke according ho sakta hai.

  1. Ek silai machine (Sewing machine)- Agar aapne apna business bilkul naya shuru kia hai toh aapko sujhao hai ke pehle aap akele hi is business ko agey badhyein. Iske liye aapko ek sewing machine yani ek silai machine ki jarurat hogi. Waise toh shuruwat mein aap ek silai machine se hi kaam shuru kar sakte hain jo ki pico ke liye bhi use ki ja sakti hai, magar bad mein ek picco machine aur ek interlock machine ki jarurat padegi.

Ek simple magar acchi silai machine lene mein karib 2000 tak ki lagat ajayegi. Ye lagat kam ya jyada bhi ho sakti hai. Lekin agar aapke pas 2000 tak ki punji hai toh aap bade aasani se ek silai machine le sakte hain. Silai machine ke sath sath aapko silai machine ka stand bhi lena hoga jo ki tailoring ka business shuru karne ke liye kaafi jaruri hai. Ye stand karib 2500 se lekar 3000 tak ayega. Aapko fir bata dein, ye price humne research karke nikala hai, isliye esa bhi ho sakta hai ke aapke area mein silai machine aur stand dono ka daam diye gaye price se kam ya jyada ho.

Saaman Number Price
Silai machine 1 Rs. 2000 (Approx.)
Silai machine table 1 Rs. 2500 – 3000 (Approx.)

Ye silai machine apko apne area ke kisi bhi silai machine ki dukaan par mil jayega. Agar aap silai machine ke thok bikreta se ye machine kharidte hain toh aapko normal market price se kam mein hi ye machine mil jaani chahiye.

Note: Ajkal market mein alag alag tarah ki silai machine aagyi hain, magar tailoring ke liye lohe ki sewing machine hi sabse best option hota hai. Jab aapke pas kaafi matra mein kapde silne ke liye orders aane lagenge tab aapko ek accha aur majbut silai machine chaiye hoga. Niche humne picture mein dikhaya hai kaisi silai machine ek tailoring shop ke liye sabse best rahegi.

Silai machine

  1. Silai ki chizein – Iske alawa humein silai ke liye aur bhi kuch chizon ki jarurat hoti hai jaise –
Saaman Number Price (Approx.)
Inchi Tap 2 Rs. 60 – 120
Scissor (Kainchi) 2 Rs. 150 – 200
Tailor chalk 2 Rs. 10 – 100
Bukram Rs. 10-15 / meter
Sui and Threads (Dhage) Rs. 5 – 10 / piece
Scale 1 Rs. 20 – 100/ piece
Notebook aur pen 1 Rs. 20 – 40 / piece
Press 1 Rs. 300 – 800 / piece
  1. Furniture

Tailoring business shuru karne ke liye aapko table ki jarurat hogi jo ki kapde ko kaatte waqt kaam aata hai. Ye table lakdi ka ho sakta hai jisko aap ek kapde se cover kar dete hain. Iske alawa aapko kam se kam do chair rakhna hoga, jismein se ek aap apni silai ke liye use karenge aur ek kisi customer ke liye rakh sakte hain.

Iske alawa aap chahe toh apne shop mein ek rack bhi lagwa sakte hain, jismein aap silai kiye hue kapdon ko rakh sakte hain taki wo gande ya kharab na ho jaye. Toh dekha jaye toh furniture mein in chizon ke alawa aapko aur kisi chiz ki khas jarurt nahi padegi.

Furniture Quantity Price (Approx)
Table (Lakdi ki mej) 1 800/pc
Chair/Stool 2 100-250/piece
Rack 1 1000/piece

Iske alawa aapko ek naya tailoring business shuru karne mein kisi aur chiz ki khas jarurat nahi padegi. Toh kul milakar dekha jaye toh ghar se hi ek tailoring business ko shuru karne ke liye apki lagat lag sakti hai –

Puri Lagat Rs. 7500-9000 (Approx)

Aur agar yahi business aap kisi shop ko rent par lekar shuru karte hain toh ismein kam se kam 3000 aur jyada se jyada jaisa aapke area ka rent hai utna kharcha aajayega.

Tailoring business mein munafa

Tailoring business mein jo bhi lagat lagti h wo dukaan shuru karne mein lagti hai. Uske bad sabse jyada jaruri hai aapki mehnat. Aap kitne time mein kitne kapde sil lete hain, wahi aapke liye munafa ka kaam karega.

Kyunki ismein aapko investment bas silai ke chhote chhote saamanon ke liye lagana hota hai, toh aapka munafa wahi hoga jo aap apne mehnat ke liye kamate hain. Andaza lagaya jaye toh, ek mahine mein ek silai machine se aap 5 – 10 hazar rupaye tak kama sakte hain. Ye kamai apke hunar ke anusar aur kisi tyohar ke dauraan aur bhi badh sakti hai. Isiliye apni kala ko aur ubharein taaki log aapse hi apne kapde silwane ayein.

Inke alawa kuch aur bhi tips hain jissey aap apna kaam kamyab bana sakte hain –

  1. Shuruwat mein aap apne silai ka daam kam rakhein. Issey grahak aapke shop pe hi apna kapda dena chahenge. Grahak banana aapke business ke liye bahut jaruri hai toh agar shuruwat mein jyada kamai na bhi ho toh bhi jyada dhyaan grahak banane mein hi rakhein.
  2. Kabhi bhi utna kaam na le lein ke aap time pe grahak ko kapde wapis na kar payein. Har koi naye kapde ko lene ke liye utsahit hota hai aur jab aap usey time pe kapde nahi de pate hain ussey grahak ke dimag pe ek galat impression padta hai. Aur grahak ko naraz karna aapke hit mein nahi hoga.
  3. Shuruwat mein aap akele hi kaam shuru karein. Magar baad mein jaise jaise kaam badhne lage, toh kosish karein ke ek karmchari aap apne sath rakh lein taki kaam mein apki madad ho sake.
  4. Tyohar ke waqt toh ek karmchari ka apke sath hona jaruri hai. Ye wo time hota hai jab kaafi log naye kapde silwate hain. Is samaye aapka kaam badhega aur munafa kamane ka ye accha time hota hai.
  5. Agar aap ek mahila hain jinhone apna tailoring ka kaam shuru kia hai toh koshsih karein ke apne sath aap ek purush helper ko rakhein, taki koi purush aapke yahan kaam dene aye toh usey koi jhijhak na ho. Usi tarah agar aap purush hain toh ek mahila helper ka rakhna aapke liye fayedemand hoga.

Locality aur area ke liye research karein

Tailoring yani silai katai ka business kaafi easy business hai, aur ismein jo sabse jyada jaruri chiz hai wo hai aapke hath ki safai. Yani aapki silai kitni acchi hai aur aap time pe apne customers ko kapde sil kar de dete hain ya nahi. Waise toh is business mein kaam ki kami nahi aani chahiye magar fir bhi apni shop kahan shuru karein uske liye in kuch baton ka dhyaan rakhein –

  • Kosish karein ke apni shop aap aise area mein kholein jahan ghar jyada ho. Tailoring ki jyada jarurat ladies ko hoti hai, toh jis area mein ghar jyada honge wahan mahilaon se aapko jyada kaam milega.
  • Aapka kaam accha hai magar aap ek nayi dukan khol rahe hain toh apni dukaan ko kisi aise area mein kholein jahan aapke competetors kam ho. Koshish karein ke pehle aap apne shop ko establish yani acche se chala lein.
  • Agar aap apni shop, kisi kapde ke dukan ke aas pas kholenge toh bhi aapki dukaan pe jyada business aane ke chances hain. Log kapde kharidne ke baad stiching ke liye sabse nearby jo bhi acchi shop dikhti hai wahin jate hain.
  • Ye bhi pata karein ke kya aapke chune hue area mein koi aur bhi tailor ke shop the jo ki recently band ho gayi ho. Agar haan, toh kya kaaran tha jiske wajah se wo dukaan band hui. Kya pata wo karan aapke dukaan ko nuksaan se bacha de.

Apne business ki marketing kaise karein

Ek tailoring ka business bahut hi chhote astar pe shuru kia ja sakta hai, isliye apne dukan ka prachar aapko khud hi karna hoga. Dheere dheere jaise hi apka kaam agey badh jayega, aapke shop ki jankari logon ko khud hi ho jayegi. Magar tab tak aap in kuch tarikon se shop ki marketing kar sakte hain –

  1. Naye dukan ko kholne se kuch din pehle hi apne shop ke bahar ek board lagwa dein ke yahan ek tailor ka shop khulne wala hai. Issey aate jate logon ko ek khabar ho jati hai ke area mein ye dukan shuru hone wali hai.
  2. Shuruwat mein apni silai ka rate baki jagahon se kam rakhein. Jahan bhi kam daam mein accha kaam mailega log wahan jyada ayenge. Baad mein jab apke pas kaam badh jaye toh aap apna rate thoda badha sakte hain.
  3. Ek simple sa card bhi banwa ke rakh lein jispe apki dukan ka naam, phone number, aur address likha ho. Is card ko aap apne aas paas ke sabhi kapdon ki dukan mein de ayein taki jab bhi koi kapda kharidne aye, toh dukandar apke card ko usey de de jissey us vyakti ko apke shop ki jankari ho jayegi.
  4. Jyada se jyada naye designs aur fashion ke trends ka dhyaan rakhein. Logon ko akarshit karne ka ye ek kaafi accha tarika hai.
  5. Jo bhi apne banaya hai usmein se kuch saaman display mein rakhein yani aise rakhein ke aate jate log usey dekh sakein. Issey logon ka apke shop ke taraf rujhaan jyada banta hai.

Boutique kholne ke business plan ke liye click kare

Is article mein humne kosish ki hai ke aapko har wo baat batayen jo tailoring business shuru karne ke liye jaruri hai. Humein umeed hai ke aapko puri jankari mil gayi hogi. Agar apko is business se judi aur bhi koi jankari chaiye toh niche comment mein humse jarur pucchein, hum aapki puri madad karenge.

LEAVE A REPLY

Please enter your comment!
Please enter your name here