Email Kya Hota Hai Aur Kaise Use Karte Hai?

Email Kya Hai aur Kaise Use Karte Hai

Email ek aisa tool hai jo aajkal sabhi log use karte hai. Jobs par apply karne ke liye, professional exams application, entrance exams application, social media in fact har internet related service mai use kiya jata hai email. Email kya hota hai yeh hum iss article ke dwara detail mai jaanege. Email mai kya likha jaata hai, Email address kya hota hai, Gmail kya hai aur Gmail account kaise banaye yeh bhi dekhenge.

Bohot saari companies free email service provide karti hai. Example Gmail, Yahoo mail, Rediff mail etc. Aur kuch companies business ke liye apna khud ka email service bhi use karte hai.

Par ye email aakhir hota kya hai? Aur ise kaise istemal karte hai? Hum is baat ko detail mai jaanenge.

Email Kya Hota Hai?

Email is short for “electronic- mail”. Naam se hi hume ye pata chal jaata hai ki email ka matlab hota kya hai. Yeh “mails” yani ki dak (letters) hote hai jo “electronically” yani ki internet dwara bheje jaate hai. 

Is tool se hum duniya ki kisi bhi kone se dursre kone mai message bheja jaa sakta hai.  Mails ke sath files bhi send ki jaa sakti hai! Aage hum janenge ki emails se related sabhi important components.

Email Address Kya Hota Hai?

Ab mail bhejna hai toh address toh hona hi chahiye na? Postal mail ke liye postal address aur emails ke liye Email Address use kiya jaata hai.

Aap jab bhi kisi email service ko join karte ho tab aapko ek id provide ki jaati hai. Yeh aapka email address hota hai aur isi address par aap mails receive aur isi se send kar sakte hai.

Email address do parts mai divide kiya jaata hai – username aur domain name. Username aur domain ke bich me “@” symbol use karte hai. Ek important baat note kar le, Email address mai koi space nahi ho sakti. 

Example:- [email protected]

Yaha ankit ek “username” hai  aur “gmail.com” ek domain hai. Inhe “@” se separate kiya jata hai.Isse read karte waqt ya bolte waqt “ankit at gmail dot com” aise bola jata hai. 

Yeh dhyan rakhe ki agar jobs, exams etc ke liye email bana rahe ho to email id professional ho. Resume par email id [email protected] hoga toh unprofessional dikh kar aaega! 

Ab hume yeh bhi pata chal gaya hai ki email address kya hota hai.

Email Use Karne Ke Components

Email kaise use karte hai ye jaan lene se pehle hum email components ko samajh le. Iss se email kaise aur kaha use karna hai ye jaan lene me aasani hogi.

Email Format 

Hume email kaise check kare aur email kaise bheje, yeh jaan ne ke pehle kuch important cheeze jaan lete hai. Iss se hume email kya hota hai yeh detail mai pata chal jaega.

Emails ka ek standard format hai jo sabhi services mai use kiya jaata hai. 

Jab bhi aak koi email inbox mai kholte hai ya kisi ko email bhejne ki koshish karenge. Tab aap notice karenge ki email ke top mai aapko kuch fields dikhenge jaise ki From, To, Subject, CC, BCC.

 Aap soch mai pad gaye honge ki email me CC ur BCC hota kya hai? Hum in saare fields ka importance jaan lete hai. 

Email mai kya likha jaata hai

From

Ye email sender ka email address hota hai. Jisne aapko mail bheja hai, uska address yaha display hota hai.

To 

Yeh field mai email kise bheja hai, ya kise bhejna hai unka email address aata hai. Email un logo ke liye intended hota hai.

CC 

Ap soch rahe honge ki CC hota kya hai ? CC ka matlab “Carbon Copy” hota hai. Jin logon ko CC me rakha jaata hai unhe email ki ek carbon copy send ki jaati hai.

CC mai un logo ka email address rakhte hai jin logo ko email ke baare mai informed rakhna hota hai kyoki email unse related hota hai par email unke liye inended nahi hota.

Example :- Aapne apne boss ke kehne par aapne client ko email bheja. Aur CC mai apne boss ko rakha. Isse aapke boss ko is email ki jaankari hogi.

Email Me BCC Kya Hota Hai

BCC ka matlab “Blind Carbon Copy” hota hai. Iska function CC ki tarah hi hota hai. Bas ek chota sa important difference hota hai.

Jin logo ko BCC mai rakhte hai un logo ko pata nahi chalta ki ye email aur kin logo ko send kiya gaya hai.

Yeh tool digital marketing via email blast mai bohot hi useful hota hai. 

Email Ka Subject Kaise Likhe 

Email kis topic par bheja jaa rha hai, us topic ko isme likha jaata hai.

Subject ek one liner hota hai jo hume yeh andaaza deta hai ki email mai hai kya.

Iss se aap inbox mai aaye emails ko priority de sakte hai.

Email Body 

Email message ki body bohot hi jyada important hoti hai. Aap mail mai kya bhej kar type kar rahe ho unka acche se dhyan rakhna chahiye. Email ke tone par bhi humara dhyan hona chahiye. Boss ko “yaar” nahi bola karte email mai !

Email message ko hum three parts mai divide karte hai . Isse hume ye sikhne mai aasani hogi .Toh yeh parts hai Greetings, Message Aur signature 

  • Greetings:- Yaha aapka email jise intended hai usse address karna hai yani ki sambodhit karna hai. Kisi individual ke liye hai toh unke naam se kar sakte hai. Agar mass email bheja hai toh pure team ko bhi address kar sakte hai.

For ex:- Hi Karan, Hello Team, Hi all, Hello Mr.Patel etc

  • Message:- Ab aapne jise email bhejna tha unhe address bhi kiya. Ab message ki bari. Ab aapko email karne ki wajah likhni hai. Jo aapka message hai woh aapko acche se likhna hai. Jaise ki maine pehle hi kaha tha email ka tone accha hona chahiye.Professional email to the point hona chahiye. Grammatical errors na ho iska bhi dhyan rakhe.
  • Signature:- Signature yeh basically logo ko batata hai ki email kiske taraf se aaya hai. Professional environment mai kabhi kabhi aapko apne team ke behalf par mail karna padta hai.  Iska format bhi simple hi hota hai. 

Eg 1 :-  Regards,             

            Amit Tripathi

Eg 2 :-  Regards,

            Amit Tripathi

            Editor-in-Chief   

Iss tarah humne jaana ki email me kya likha jata hai. Professional environment mai kuch email etiquettes hote hai. Aapko isse detail mai yaha jaan lena chahiye.

Attachments

Humne pehle jaana tha ki files ko bhi email dwara bheja jaa sakta hai. In files ko attachments kehte hai. Jab aap ek email compose karte hoi, tab aapko niche ek Attachements aka paperclip jaisa icon dikhta hai. 

Jab aap is option par click karoge to ek new window open hogi. Is window mai aapki file browse ki jiye aur select kar use open ki jiye. 

Iss se aapki file attach ho jaati hai. Aur email jisne recieve kiya hai usse yeh file mil jaati hai.

Iss baat ka dhyan rakhe ki email ke message mai yeh jarur likhe ki aapne file attach ki hai. Iss se email receiver ko aasaani hoti hai.   

Date

Email ki date email kab bheja ya receive hua hai yeh batata hai.

Inbox

Aapko bheje gaye emails aapke inbox me dikhayi dete hai.Yeh email aapko kisne bheja, aur uss email ka subject aapko dikhayi deta hai.

Aapko inbox me receive huye emails ek list mai dikhayi dete hai.

Kisi bhi email par click karoge, toh aapka email open ho jaega.

Jo email aapne pehle open na kia ho use “Unread” tag hota hai. Jo mail aap kholte ho unhe “Read” mark kiya jaata hai.

Iss tarah humne yeh jaana ki email kholte kaise hai

Sent

Sent items mai woh emails aate hai ho aapne kisi ko bheje ho.Iss se aapke paas ek record rehta hai ki aapne kise emails bheje hai.

Drafts

Drafts ek email service ka bohot hi useful tool hai. Aap jab bhi koi email compose karte ho, aur woh send nahi karte, tab woh email as a Draft save ho jaata hai. 

Sunne par yeh bohot hi sadharan tool lagta hai. Par work environment mai iske bohot fayde hai. Iss se hum ek email pehle hi bana kar rakh sakte hai. Aur jab sahi samay ho, tab woh send kar sakte hai. 

Iss se tool ko time management ke liye istemaal kiya jaa sakta hai.

Outbox

Jab aap koi email send karte ho, aisa ho sakta hai ki kuch reasons ki wajah se woh deliver na hua ho. Jaise ki aapne send kiya, aur tabhi hi internet disconnect ho gaya. 

Wo emails temporarily Outbox mai store hote hai. 

              Inbox, Outbox, Sent Items Kya Hota Hai

Email Use Karne ke Fayde

Aapko yeh pata hai ki email ka matlab hota kya hai. Email address kya hota hai. Aapne yeh bhi jaan liya ki email kaise use karte hai. Ab aap jaanenge email use karne ke fayde. Aakhir aisa kyu hai ki email itna popular service ban gaya hai ? Iss baat ko hum samajh lete hai.

Speed 

Email ek bohot hi fast service hai. Iske dwara hum ek mail duniya ki ek kone se dusre kone tak jhat se pohocha sakte hai. 

Cost

Jaisa ki humne pehle hi discuss kiya hai, most popular email services free of cost hoti hai. Iss se logo ka bohot hi fayda hota hai. 

Accessibility 

Email ek aisi service hai jo ki easily accessible hoti hai. Aapke paas bas internet connection aur ek modern smartphone ya computer hona chahiye. Aj kal smart phone hona bohot hi common baat hai.

Jin logo ke paas smartphone ya computer nahi hota hai, unke liye bhi email access karna itna mushkil nahi. Woh loh Cyber Cafe, school/college computers ka bhi istemaal kar sakte hai.

Convenience

Email service use karne mai bohot hi conveninent hoti hai. Hume post office ya courier office band hone ka darr nhi hota. As long as aapke paas internet access hai, aap yeh service use kar sakte hai.

Reliability

Emails ki reliability ek proven fact hai.Tabhi toh yeh service itni jyada use ki jaati hai.

Emails hardly fail hote hai. Aur agar hote bhi hai, toh uska reason mostly bad email address hota hai.  

Attachments

Humne pehle hi jaan liya hai ki attachments hote kya hai. Yeh feature emails ko bohot hi powerful banata hai. Hum bohot saari files attach karke email kar sakte hai.

Files ke size par email pohoch ne ka time decide hota hai. Badi size ki files upload kar ke send karne mai time lagta hai. Choti size ki files aasani se send ho jaati hai.

Gmail kya hai aur Gmail par email account Kaise Banaye 

Humne yeh toh jaan liya ki email hota kya hai. Humne yeh bhi jaan liya ki email address hota kya hai. Ab hum ye bhi janenge ki Gmail kya hai aur Gmail account kaise banaye aur ek email id kaise hasil kare. Gmail sabse popular email service provider hai. Iski parent company Google hai. Yaha aap ek free personal email id bana sakte hai. Hum ab ye dekhenge ki Gmail par email id kaise kholte hai.

Gmail Kya Hai

Pehle aapko Gmail ke website par jaakar account register karna hoga. Yaha jaakar aap “Create Account” par click kare.

Phir ek new tab open hoga jaha aapko apne details daalne honge. Aapka First Name, Last Name Aur ek Email Id choose karna hoga. 

Dhyan rakhe ki email id simple hi rakhe toh badiya hai. For example [email protected]. Yaha aap apna naam aur lastname aur uske aage 2-3 digits daal sakte hai. Jaise ki [email protected].

Yaha aapko jyada fikar karne ki jarurat nahi kyuki google aapko email ids suggest karta hai. Aap apne hisaab se ya suggestion mai se koi ek use kar sakte hai.

Phir aapko ek password choose karna padega. Yeh Password aapko account login ke samay istemaal karna hoga isliye aisa password chune jo aapko acche se yaad bhi rahe, aur koi easily guess nam kar paaye! Password choose karne ke baad use Confirm bhi karna padta hai. 

Dono passwords match hone chahiye warna website error degi.

Security reasons ke liye gmail ek particular format use karta hai aur password usse ke hisaab se rakhna hoga. Jaise ki password minimum 8 characters jitna lamba hona chahiye etc. 

Kuch sites password ko ek combination ke roop me accept karti hai. Jaise ki password mai ek Capital letter, Ek number aur ek special character yani ki symbol hona chahiye.

Password choose karne ke baad Aapko next par click karna hai. Next page par aapko apna birth date aur gender select karna hai. Yaha aapka mobile number daalna optional hai.

Bas yeh sab details enter karne ke baad next click kare. Fir aapko google ki privacy terms ko accept karna hoga aur bas, aapka khuda new email id ready hai. Isse karne mai aapko 10 minutes se kam samay lagega!

Aasha karta hu ki is article ko padh kar aapne email ke basics jaan liye hai!

Email ko professionally kaise use karna hai janne ke liye yaha click kare.

Join Josh Skills Basic Computer Skills Course

Aaj kal computer ka zamana hai. Har voh kaam jisme pehle bahut time,effort aur money waste hota tha abh asani se computer pe kiya ja sakta hai. Computer ka istamaal aaj kal har taraf kiya jata hai. Basic computer skills ana aaj ke waqt mai bahat hi zaruri hai. Basic computer skills sikhna isliye zaruri hai take aap apne worklife ko easy aur efficient bana sako. Aur is computer technology ka wisely istamaal kar sako.

Is course mai aap Computer ke Basics pe gaur denge jaise:

  • Basics of a Computer system and it’s operation.
  • Internet Technology
  • Email and Communication
  • Use of Microsoft word, Microsoft Powerpoint and Microsoft Excel
  • Introduction to Advanced Computer skills and tools
  • Jobs that require computer skills

Toh aaj hi shuru kare apni learning journey Josh Skill ke courses ke sath.

LEAVE A REPLY

Please enter your comment!
Please enter your name here