Job interview kya hai aur zaruri interview tips in Hindi

0
626
Job interview kya hai aur zaruri interview tips in Hindi

Is article mein aap interview kya hota hai aur interview tips ke baare me poori jaankari paa sakte hai.

Aap niche diye gaye section par click karke apna topic asani se padh sakte hai

Interview kya hai?

Interview kitne type ke hote hai?

Telephonic Interview kya hai?

Telephonic Interview ke tips

Face to face Interview kya hai?

Face to Face Interview mein kya kare

Face to Face Interview mein kya na kare

 

Interview kya hai?

Kisi bhi job ko paane ke liye sabse zaruri hai interview clear karna. Toh sabse pehle jaanege ki aakhir interview ka matlab kya hota hai?

Naukri dene wale aur naukri khojane walo ke beech mein formal baat-chit ko ‘Interview’ kehte hai. . Job interview lene walo ko ‘Interviewer’ ya ‘Recruiter’ bolte hai aur interview dene walo ko Interviewee’ bolte hai.

Interviewer interviewee se unke baare mein kuch sawaal karte hai jaise ki self introduction, education, interest, job aur career related. Interview mein zayadatar job aur career se related hi sawal pooche jaate hai. Iss article mein aap jaanenge ki Job interview kitne prakar ke hote hai aur usmein kya karna chahiye aur kya nahin. Interview hota kya hai iske baare mein toh aap upar jaan hi chooke hai.

 

Interview kitne type ke hote hai?

Interview waise toh bahut type ke hote hai lekin sabse popular 2 type ke hi maane jaate hai:

1.Telephonic Interview

2.Face to Face Interview

 

1.Telephonic Interview

via GIPHY

Telephonic interview ka matlab hota hai phone ya mobile ke through interview hona. Aajkal companies candidates ko face to face interview par bulane se pehle unka telephonic interview leti hai. Ye sabse pehla interaction hota hai interviewer aur interviewee ke beech mein.

Telephonic interview employer aur candidates ke liye interview process ko asan kar deta hai aur iske kaafi fayde bhi hote hai. Ye dono ke liye cost saving aur time saving hota hai. Telephonic interview face to face interview se kam time mein ho jaata hai aur iske liye kahi jaana bhi nahi padhta hai.

Telephonic Interview Tips 

Telephonic interview ko face to face interview ki tarah hi seriously le. Yaad rakhe telephonic interview mein candidates ka screening hota hai aur joh candidates isme accha perform nahi karte unhe interview process se eliminate kar diya jata hai, toh iss ke liye acche se prepare kare.

Interview tips jinpar khaas dhyan dene se aap telephonic interview ko pass kar sakte hai: 

tips for successful telephonic interview in hindi

1.Phone ko full charge karle, phone ko network area mein rakhein aur phone ka volume tez rakhein. Interview ke time ka reminder/alarm pehle hi set karle taaki aap interview ka time na bhulein.  

2.Interview dene ke liye Headphones ka use kare.

3.Telephonic interview ke liye ek shaant aur acchi jagah chunen. Generally companies pehle se hi telephonic interview ki timings bata deti hai. Isliye interview ke liye ek shaant room pehle hi chunle taaki interview ke durran koi shor na ho. Pehle hi TV, Radio ko band karde aur ghar me agar bacche hai toh unko dur le jaye. Interview ke duraan room ko andar se lock karle aur ghar me sabko bata de ki interview ke duraan koi aapko disturb na kare. Agar aap interview ke timings ke duraan ghar par nahi hai toh ek shaan jagah dekhe jaha zayda log na ho aur nahi shor ho.

 

what to keep in a telephonic interview

4. Interview ke time apne CV/resume ki hardcopy aur notes likhne ke liye pen aur notebook samne rakhe.

5. Agar interview ke dauraan aapka call kat jaaye toh turant aap call back kare, agar koi dusra call aa jata hai toh usse na uthaye.

6.Agar aapko interview ke beech me dusra call aa raha ho toh uss call ko na uthaye.

7.Telephonic interview me smile karte hue, calm aur bina chilaye baat kare. Apni tone ko balanced rakhe. Baat karte hue Ok, Yes Sir/Madam jaise words use kare taaki interviewer ko pata rahe ki aap dhang se baat sun rahe ho.

8.Telephonic interview mein communication skills par bahut dhayan diya jaata hai toh apni baat karne ka tarika accha rakhe. Professionally baat kare. Fake accent mein baat na kare. Agar aapko English mein baat karne mein dikkat hoti hai toh interviewer ko pehle hi bata de.

9.Interviewer ko interrupt na kare. Jab vo bol rahe ho toh unki baat ko beech me na kaate. Unko pehle apni poori baat karne de aur uske baad hi aap apni baat bole.

10.Agar aapko interview mein koi baat samjh na aaye to sach bole ki ‘aapko samjh nahi aaya’ hai aur interviewer ko request kare ki wo us point ko repeat kare.

 

2. Face to Face Interview

via GIPHY

Face to Face interview ka sabse popular aur purana tarika hai interview conduct karne ka. Ise ‘personal interview’ bhi kehte hai. Iss type ke interview mein employer aur candidate aamne samne baat chit karte hai. Lag bhag har job me face to face interview dena hota hai.

Face to face interview ka maksad yeh hota hai ki interviewer aapke baare me achhe se jaan sake. Interviewer aapki personality, attitude, work experience aur yeh dekhta hai ki kya aap us company me achhe se yogadaan de sakte hai ya nahin. Is interview mein candidate ke pass bhi mauka hota hai ki vo apne saare sawaal pooche aur job role ke baare me achhe se jaane.

Do’s and Don’ts (Interview tips)
Job interview dene me aksar bahut logo ko darr lagta hai. Log bahut nervous hojate hai interview dene ke naam se aur iss nervousness ke chakkar me bahut si galtiyaa kar baithathe hai jisse interview clear nahi ho paata. Interview dete waqt kuch zaruri interview tips ka agar dhyan rakha jaaye to interview accha hota hai aur job milne ke chances badh jaate hai.
Interview me kya kare? 

Niche kuch zaruri interview tips jinka dhyan rakhne se interview clear karne ke chances badh jaate hai:

 1) Professionally dress up ho

Interview me interviewer par accha impression banana bahut zaruri hai aur sabse pehle joh interviewer ek candidate mein dekhte hai vo hai unki dressing. Dressing aapki personality ko reflect karta hai aur kyunki interview ek professional setup hota hai toh isme candidate ki dressing bahut important hoti hai. Koi bhi interview ho, humesha formally dress up ho kyunki ye interview ka ek golden rule hai.

Professional wear for Women (Formals)

  • Women Indian ya western formals dono me se ek option pick kar sakti hai job ke basis par

 

i) Indian Formals: Kurta with Salwar/Palazzos/Leggings, Saree

ii) Western Formals: Formal/Semi Formal shirt with Trousers, Formal Dresses knee length tak ki ya Blazer

    ( Formals subtle colours ke hone chahiye jaise ki white, light pink, peach, light blue, grey, black etc…)

iii) Formal Footwear: Formals heels, bellies, flats

iv) kam se kam makeup hona chahiye

 

 

Interview mein kya chize nahi pehnani chahiye?

i) Bright ya loud colours jaise ki bright red, orange, pink etc.. nahi pahanane

ii) Deep neckline, transparent clothes se bache.

iii) Sports shoes, slippers nahi pahanani chahiye.

  • Professional wear for Men (Formals)

 

i) Western Formals: Formal shirt Trousers/Pants, Belt ke saath. Iske alava tie, blazer bhi pahena jaa sakta hai.

 ii) Shirt: Sirf subtle colours jaise ki blue, white, peach, grey, light pink etc..  

 iii) Trousers: Colours jaise ki black, beige, navy blue, grey etc.. 

 iv) Belt: Plain colour hi choose kare preferably black, dark brown aur navy blue colour

 v) Formal Footwear: Formal shoes (black, brown colour) socks ke saath

 

Interview mein Kya chize nahi pehnani chahiye?

i) Bahut bright ya chamkile colours jaise ki bright red, orange, pink etc.. bilkul na pahanane

ii) Leather jacket ya denims (jeans) bilkul na pahane kyunki vo informal garments mein aate hai

iii) Sports shoes, slippers nahi pahanani chahiye

iv) Bahut badhi beard na rakhe aur interview me jaanse se pehle trim aur neat karle

v) Hair chhote rakhe kyunki badhe baal unprofessional lagte hai

2) Time se pehle pahuche

via GIPHY

Koi bhi company kisi ko bhi hire karne se pehle kuch trait (gunn) dekhti hai jisme sabse zaruri trait hai ‘Punctuality’. Har company chahati hai ki uske employees time se office aaye taaki office me discipline maintain rahe aur efficiency bani rahe. Isliye interview ke liye time se pahuchna bahut zaruri hai. Agar koi candidate interview mein late pahuchata hai toh interviewer ko yeh lag sakta hai ki yeh candidate aaj late hue hai toh office bhi late hi aayenge jisse interviewer par kharab impression padh sakta hai. Toh dhyan rakhe, ki interview ke liye aap kam se kam 10 minute pehle pahuch jaaye.

3) Resume lejana naa bhule

via GIPHY

Interview mein jaane se pehle ye sunishchit karle ki aapke pass apka Resume/CV/Bio-data ki hard copy ready hai. Agar interviewer aapse aapka resume maange toh aapke paas resume ki copy honi chahiye. Resume ko fold na kare aur ek file me lekar jaaye.

Ek accha resume kaise banaya jaata hai iss baare me jananae ke liye yaha click kare

4) Mobile ko switch off ya silent kar de

Jab bhi aap job interview mein jaye to aap apna mobile silent par karna na bhoolein kyunki agar interview ke beech me aapko koi call aaya toh interview process disturb ho jata hai joh ki ek acchi baat nahi hai. Isliye achha yahi rahega ki interview se pahle aap apna mobile switch off karde ya silent par karke bag me rakhde.

5) Apni body language ko maintain kare

Interview ke dauraan aapki body language ko sahi rakhna bahut zaruri hai. Aapki body language yeh reflect karti hai ki aap kaisa mehsoos kar rahe hai. Interviewer ko aapki body language se aapke baare mein bahut kuch pata chalta hai toh isliye interviewer aapki body language ko bahut dhyan se dekhte hai. Isliye sahi body language maintain karna zaruri hai, interview clear karne ke liye.

 i) Tarike se baithe. Apne body posture ka khaas dhyan rakhe

ii) Handshake confidently kare

 iii)Interview dete waqt eye contact rakhe. Agar interview me ek se zyada log hai to sabse        eye contact maintain kare. Sabki taraf dekh ke hi baat kare

 iv)Apni tone ko audible (madhaym) aur balanced rakhe aur confidence ke saath baat kare

6) Smile karte rahe

via GIPHY

Interview me smile karte rehna chahiye. Interview me friendly smile se interviewer ko yeh pata chalta hai ki aap comfortable aur utsaahit (confident) hai interview ke liye. Smile ek pleasent envrionment bana deti hai aur interview joh ki ek stressful process ho sakta hai usse asaan kardeti hai. Par ek chiz ka dhyan rakhe, zarurat se zayda bhi koi chiz acchi nahi lagti.

7) Dhyaan se sunkar answer kare

‘ Listening’ yaani sunana, sabse important point hota hai kisi bhi communication (baat karna),  jaise ki interview. Jab aap se koi baat karta hai toh samne wale ki baat sunana bhi utna zaruri hota hai jitni ki aapki baat zaruri hoti hai. Isliye interview me bahut dhyan se recruiter ki baat sunne aur dhyan de ki vo aapse kya puchh rahe hai aur uske baad hi soch samjhkar kar answer kare. Interview me jaane se pehle  apna mind clear karle aur kisi aur chiz ke baare me na soche kyunki vo ek distraction ho sakti hai jisase ki aapka interview kharab ho sakta hai.

Agar aapko koi point ya sawaal nahi samjh aaye toh aap interviewer ko sach bataye ki ‘aapko samjh nahi aaya hai aur vo uss point ko repeat karde’. Isse interviewer ko aapke baare me do chize pata chalegi ki aap ‘Attentive Listner’ ke saath ‘Honest’ bhi hai.

8) Confidently baat kare aur clearly answer de

Interview me confidence ke saath baat kare. Agar aap confident nahi toh yeh aapke interview me reflect karega aur koi bhi company aise candidate ko hire nahi karengi jisme confidence ki kami ho.

Ek aur point jiska dhyan rakhna zaruri hai voh yeh hai ki ghooma phiraakar jawaab naa de kyunki aisa karne se recruiter kuch bhi samajh nahin paayenge aur aapke liye pareshaani ho sakti hai. Isliye clearly aur to-the-point hi answer kare.

 

Interview me kya na kare?

Bahut log interview se ghabrate hai aur unko yeh jaankari nahi hoti ki interview kaise dete hai aur kin baaton ka khaas dhyan rakhna chahiye. Yahi wajah hai ki log interview me aisi chize kardete hai joh unko nahi karni chahiye aur inhi galtiyon ki wajah se unka interview clear nahi ho paata. Niche kuch interview tips hai joh aapko nahi karni chahiye interview ke dauraan: 

1) Casually dress up na ho aur untidy na dikhe

Interview mein casual kapadhe kabhi bhi na pahane. Interview mein aapne kya pahena hai is baat par khass dhyan diya jaata hai. Agar aap interview mein casual kapadhe jaise ki ‘jeans aur t-shirt’ pahenke jaate hai toh interviewer ko yeh lag sakta hai ki aap job ke liye bilkul bhi serious nahi hai kyunki aapke kapadhe aapki personality aur attitude dikhate hai.

Iske alava aap kaise dikh rahe hai is par bhi khaas dhyan de. Untidy look me interview dene kabhi bhi na jaaye.

Iske baare mein poori detail ke liye upar padhe

2) Phone use na kare

Interview mein kabhi phone use karne ki galti na kare. Phone ko table ya haath mein na rakhe. Agar aapko koi bhi call ya message aata hai toh usse interview khatam hone ke baad hi dekhe. Agar aap interview ke dauraan phone use karte hai toh aap interview process ko disturb kar dete hai aur yeh aapke liye negative ho sakta hai.

3) Jhooth na bole

via GIPHY

Kabhi bhi jhooth na bole. Apne aur apni abilities ke baare mein kuch bhi jhooth na bole. Resume mein sirf vahi likhe joh aapne sach me achieve kiya hai kyunki agar company ko pata chal jaaye ki aapne job paane ke liye jhoothi baatein boli hai toh aapke naukri milne ke chances khatam ho jaate hai. Iske alava companies verification bhi karti hai aur agar aapne interview mein kuch bhi jhooth bola hai toh unko pata lag sakta hai aur koi bhi company aise candidate ko nahi lengi joh honest na ho. Honesty bahut zaruri hoti hai aur yeh ek bahut imporant trait hai joh har company chahati hai apne employees mein.

4) Interviewer ko interrupt na kare aur ghamandee na bane

via GIPHY

Jab interviewer kuch bol rahe ho toh beech me bolkar unki baat ko kabhi na kaate. Interviewer ko unki baat poori karne de aur uske baad hi aap bole. Kabhi bhi interviewer ko interrupt nahi karna chahiye. Iske alava kisi bhi baat ko lekar ghamandee na bane. Yeh chize aapke khilaf ho sakti hai.

5) Apni purani company ke liye kuch bhi negative na bole

Jab bhi aap kisi nayi company mein interview dene jaata hai toh aapse apke boss aur aapki purani job ke baare mein puccha jaa sakta hai. Kabhi bhi apni company, boss ya co-workers ke baare me negative na bole. Agar aapko koi bhi dikkat hai toh uske baare mein interview mein bolne se bacche kyunki kuch bhi negative bolna aapke against ho sakta hai isiliye ‘positive points’ par hi focus kare.

6) Interview pe jane se pehle smoke ya drink na kare

Agar aap smoke karte hai toh yeh dhyan rakhe ki aap interview se pehle smoke na kare kyunki smoking karne se apke muh mein se smell aa sakti hai joh ki acchi baat nahi hai. Agar interviewer smoke karte hai aur aapse pucchte hai smoke ke liye toh aap tab bhi smoking na kare.

Interview mein aap kaise behave karte hai yeh bahut matter karta hai toh aisi koi bhi chiz na khaaye jisase apka impression kharab ho. Isliye smoking, tobacco, drinking jaisi chize bilkul bhi na kare. Iske alava interview ke dauraan chewing gum na khaaye.

7) Offensive words ka use na kare

Aap kaise baat karte hai aur aap kin kin words ka use karte hai, yeh sab interview mein dekha jaate hai. Isliye offensive ya abusive words ka use bilkul bhi na kare.

8) Religion, politics jaise topics ke baare mein baat na kare

Interview mein religion, caste ya politics jaise subjects ke baare mein bilkul bhi baat na kare. Agar aap kisi ek particular party ya religion ke supporter hai toh apne viewpoint ke baare mein interviewer se baat na kare. Yeh subjects bahut serious aur sensitive ho sakte hai.

9) Khud se salary, bonuses ya holidays ki baat na kare

Yaad rakhe, jab tak interviewer khud se salary, bonus ya holidays ki baat na kare tab tak aap iss baare mein bilkul na bole. Iske alava uss company ke employees se bhi unki salary ke baare mein kabhi na pucche. Agar aap inn sab baaton ke baare mein khud se baat karenge toh interviewer ko yeh lag sakta hi ki aap kaam karne se zayda paiso aur holidays me interested hai aur iss wajah se aap reject bhi ho sakte hai.

10) Body language ki mistakes se bacche

Aapki body language apke baare mein bahut kuch batati hai. Bahut log anjaane mein kaafi galtiyaan kardete hai interview mein apne baithane aur baat-chit karne ke tariko mein.

Body language interview tips joh aapko bilkul nahi karni :

via GIPHY

 body language for interview tips in hindi    

  • Pairon ko na hailae
  • Apne baalon se na khele
  • Fingers dikhake baat na kare
  • Haathon ko chest par cross karke na baithe
  • Table par haath rakh ke na baithe
  • Eye contact banaye rakhe
  • Niche dekhkar baat na kare kyunki isse aisa lagta hai ki aap bilkul bhi confident nahi hai
  • Lagatar apni watch ko na dekhe kyunki aisa karne se yeh lagega ki aapko interview khatam karne ki jaldi hai

Interview tips ke alava agar aapko job aur interview ke baare me aur jaankari chahiye jaise ki accha resume kaise banaya jaata hai, job kaise search kare, interview me kya puccha jaata hai toh in articles ko padhe.

Agar aap upar diye gaye articles ko dhyan se padhe aur unme batayi gayi tips par kaam karenge toh aapke job milne ke chances bahut badh jayenge.

via GIPHY

 

Koi bhi sawaal ho to comment zarur kare. Hum aapke sawaal ka jawaab dene ki koshish karenge.

LEAVE A REPLY

Please enter your comment!
Please enter your name here