Tea Stall Business Plan In Hindi

tea_stall_business

Tea stall ka business ya chai ki dukan ka business ‘ek garama garam business hai jo kabhi thanda nahi hota’. Agar aap aaj ke time mein kam laagat mein aacha munafa kamana chahate hain, toh iss ka sabse acha aur saral upaay hai ki aap apna khud ka business shuru karnein. Iska ek udhaaran hai chai ki dukan kholne ka business. Iss article mein aapko woh har ek cheez milegi jisse aapko apna tea stall business karne mein madad mile.

Iss article mein hum jaanenge:

Tea stall business kaun khol sakta hai

Tea stall business kahan khole

Tea stall business ka saaman aur nivesh

Tea stall business se munafa

Tea stall business ki marketing

Tea stall business kaise badha sakte hain

Tea stall business tips

Tea shop business

Tea stall business yani ki chai ki dukan ka business ek aisa business hai jo Bharat mein bahut munafa dila sakta hai. Humare desh mein chai ki mehatwata kaafi zyada hai. Hindustan duniya ki dusri sabse bari chai ki utpaadak hai, jissse ek mota andaza lagaya jaa sakta hai ki humare desh mein chai ko kitna pasand kiya jaata hai.
Source: Livemint

Bharat mein 10 mein se 8 log aaj bhi chai ko coffee ki tulna mein zyada pasand karte hain.

Tea stall business kaun khol sakta hai

Tea stall business koi bhi khol sakta hai, agar usse ek acchi aur svaadissht chai banani aati hai. Tea stall business kholne ke liye koi degree ya qualification ki bilkul bhi jarurat nahin hoti hai.

Aap chai ki dukan ke alawa ek chai ka stall bhi khol sakte hain, jissmein kam nivesh lagta hai par uska munafa bhi kam hota hai.

Tea stall business kahan khole

Chai ki dukaan ke liye ek sahi jagah ko dhoondna bahut jaruri hai jahan aap aapna business start karna chahate hain. Sahi jagah ka matlab hota hai ki ek aissi jagah jahan logon ki aabaadee zyada ho, chai ki duakne kam ho. Ye kuch jagah hai jaha aap api chai ki dukan khol sakte hai:

1.    College, Office / Factory ke bahar

College aur office ke bahar aapko bhaari matra mein graahak mil sakte hain, jinko aap apni chai bech sakte hain.

2.    Courts ke bahar

Supreme court, high court aur district court mein jo anekhon ki sankhaya mein  logon ki aabaadee aati hai jaisse ki sarkari karamcharee, vakeel, police aur baki nagrik, unko aap apna graahak bana sakte hain.

3.    Bus stand / Train station, Cinema

Inn public places par bhi ek hi din mein hazaron ki sankhya mein log aate hain, yeh log bhi bhari matra mein chai ka sevan pasand karte hain.

  • Inn sabh ke alawa bhi aapko ek area/market research karna zaroori hai, uss jagah ka jahan aap apni dukan kholna chahate hain. Area ki research ke baad aapko pata chalega ki uss area mein aapko kitne graahak mil sakte hai, aapke kitne competitors hain, aapke saaman ke suppliers uss jagah mein kitne aache hain ya nahi aur kaafi aur cheezein.

Tea stall business ka saaman aur nivesh

Ek dhoodh/milk ki chai ka cup banana ke liye joh aam taur par saaman ki zaroorat hoti hai, woh hai:

  1. Chai patti
  2. Sugar
  3. Milk
  4. Ginger/Long/Elaichi

Milk chai ke alawa aur alag prakaar ki chain bech ke aap graahakon ko aakarshit kar sakte hain

  1.   Masala chai
  2.   Green chai
  3.   Pudina chai
  4.   Lemon chai
  5.   Black chai
  6.   Tandoori chai

Aur cheezein beche chai ke saath (complementary goods)

Aap chai ke saath saath kuch khaane peene ki cheezein bhi bech sakte hain kyunki log chai ke saath kuch khaana pasand karte hain. Jaise ki:

  • Biscuit
  • Namkeen
  • Rusk
  • Chocolate
  • Cold drinks
  • Paani ki bottle
  • Juice
  • Chips
  • Chewing gum
  • Toffee

Yeh saaman aapko apne local kirane wale ke paas bhi badhe aaram se mil sakta hai, magar aur sasta saaman aapko wholesale ki dukanon par hi milega. Iss saman ki quality jo hogi wohi aapki chai ko svaadisht banane mein aur business ko munafa kamaane mein madad karegi.

Baaki saaman jo aapki duka ko chalane mein madad kareinge

 saaman

 Quantity

  (approx.)

 Price (INR)

  (approx.)

 Gas stove

 1

 Rs 600- Rs 900

 Cylinder

 1

 Rs 500 (approx.)

 Saucepan

 1

 Rs 150 (approx.)

 Ketalee

 1

 Rs 300 (approx.)

 Spoon stainless steel

 15-20

 Rs 15 per spoon (approx.)

  Container

  Stainless steel     

 2-3

 Rs 200 (approx.)

 Tray plastic

 3-4

 Rs 150 per tray (approx.)

 Tong steel

 1

 Rs 200 (approx.)

 Strainer plastic (Channi)

 1

 Rs 200 (approx.)

 Paper glass

 100

 Rs 1 per cup

 Cup glass

 15-20

 Rs 50 per cup (approx.)

 Total laagat

 Rs 3000

Iske alawa jo bhi saaman chahiye uska nivesh alag hoga. Jaise

Saaman

Quantity

Price (INR)

(approx.)

Fridge/  bottle cooler

(cold driks ke liye)

1

Rs. 5,000- Rs. 10,000

Plastic containers

(biscuits,etc ke liyt)

2-3

Rs. 100- Rs. 200

Furniture

Agar aap chai ka stall khareedna chahate hain toh aapka furniture sirf woh stall hi hoga jo aapko Rs 4000- Rs 6000 mein mil jaayega.
Aapko apni chai ki dukan ke saaman ke alawa aur bhi kuch cheezein rakhni hongi jo apki dukan mein chai bechne mein madat karegi.

Naam

Quantity

(approx.)

Price (INR)

(approx.)

Table plastic

4-5

Rs 800 (approx.)

Chair plastic

16-20

Rs 100 (approx.)

Dustbin plastic

2-3

Rs 150 (approx.)

Total laagat

Rs 6450

Rent

  1. Ek chai ki dukan ka rent kum se kum Rs. 10,000- Rs. 15,000 tak hota hai. Par ye uss area ke dammon par bhi depend karta hai.
  2. Ek tea stall business ka rent kam se kum Rs. 6,000- Rs. 8,000 tak hota hai.

Saaman, infrastructure aur rent ko mila ke jo poori laagat banegi woh aapka nivesh hoga jo aapko apna business ko start karne ke liye chaiye hoga.

Total nivesh (Final Investment)

STALLDUKAN
Rs. 16,000- Rs. 18,000Rs. 23,000- Rs. 25,000

Tea stall business se munafa

Chai ki dukan me jo main laagat hoti hai woh dukan ko khare karne mein lagti hai yani ki shuruwat mein, uske baad bas chote mote kharche hote hai jo dukan chalane ke liye mehatvapoon hote hai. Issliye chai ki dukan ka munafa zyada tar aapki mehnat par depend karega. Isske saath aapki chai ki quality bhi acchi honi chaiye jisse aapke graahak baar baar aapki dukan par aaye. Ek stall se chai ka munafa ek dukan ki chai ke munafe ki tulana mein kam hota hai.Kyunki ek chai ki dukan aur ek chai ke stall par chai ke jo daam hote hain woh alag alag hote hain.

Tea stall business mein jo profit margins hain woh 50% ke hote hain, matlab aapki kamaee mein se 50% aapka munafa hota hai.

Chai ko garmi ke mausam mein log kam peena pasand karte hain, iska ek upaay hai ki:

Garmi mein complementary goods ki madad se aap apna munafa kharab hone se bacha sakte hain, jaise ki jab garmi mein aapki chai ki bikari kum ho jaye tab aap uski jagah apni dukan pe cold drinks ki bikaree se apna munafa badha sakte hain.

Tea stall business ki marketing

Jo chai ki dukan ka business hota hai woh ek chote astar pe bhi shuru kiya ja sakta hai, issliye aapko apni chai ki dukan ka prachhar khud hi karna hoga. Yeh ek kaafi lambi prakriya hai jissme log aapki dukan pe dheere dheere aana shuru karte hai, aur aapki chai ki dukan ka prachhar dusare logon mein karte hain, isse aapke graahak dheere dheere badhte hain.

Isske alawa jo marketing ke tarike hain woh hai:

  • Shuruaati dinno mein aap apni chai ka rate baki dukanon se kam rakhein, isse sasti aur achi chai peene ke liye zyada se zyada graahak aapki dukan par aayenge. Phir dheere dheere jab aapka kaam badhne lag jaye toh aap apni chai ka daam badha sakte hain. Magar apne daamon ko aap market ke mein jo daam chal rahe hain unko dimag mein rakh kar badhaiye.
  • Aap apne business ka ek card bhi banasakte hai jissme dukan ka naam, number aur address likha ho. Iss card ko aap apne aas paas ki dukano,office, factory aur anek jagahon pe baath sakte hain, isse zyada logon ko aapki dukan ke baare mein pata chalega, aur zyada se zyada aapke graahak banege.
  • Aap apne business ki marketing online bhi kar sakte ho, online marketing aaj kal sabse labh dayak marketing hai, jisse aap zyada se zyada graahakon ko apne business ki jaankari de sakte ho. Aap apne chai ke business ka facebook pe page bana sakte ho jahan doosre log aake apke business ke bare mein jaan sakte hai, aapke page ko like kar sakte hain. Aise hi aap doosre social media platforms pe bhi apne business ka prachaar kar sakte ho.
  • Aap aas paas ki khane ki dukandaaron se baat karke bhi apne business ko promote kar sakte hai. Jisse woh dukandaar apne graahakon ko apke business ke bare mein prachaar karein.
  • Aap apni chai ke business ke stalls alag alag events mein, jo aapke shahar mein ho rahe hon, wahan pe laga sakte hain. Isse ek shahar ke kaafi logon ko aapki dukan ke bare mein jaankari millegi.
  • Aap apna chai ka business google ke My Business Google tool, jo ki muft hota hai, par daal kar apne business ka free offline prachhar kar sakte hain. Isska fayeda yeh hai ki jabhi koi Google pe search karega chai ki dukanon ke liye aapke aas paas ke area mein toh usse bare hi aaram se aapki dukan ki jaankari mil jaayegi. Yeh tool aapki shop ka naam, shop tak pahunchne ke liye directions, aapki shop ka phone number, aapki shop ke timmings, aapki shop ke upar doosre logon ke vichar, shop ke ratings, shop ki tasveerein, aur baki jaankariyan ek hi jagah pe aasani se bata deta hai.

Google my business pe account bana ek bahut hi saral prakriya hai, jiske bare mein jaane ke liye click karein.

  • Chai ka business ek aisa business hai jiske baare mein log online se zyada offline prachhar karne ke tareekon ke maadhyam se jaankari paate hain. Apne business ka offline prachhar karne ka ek acha maadhyam hai hoardings. Yeh hoardings aapki chai ke businsess ke baare mein kaafi logon ko batati hai.
  • Apne business ke prachhar ke aur acha tareeka hai ki aap apne graahakon ko aisi chai aur service dein ki woh baki logon mein khud hi jaake aapke chai ke business ka prachhar kar dein. Issliye  humesha koshish karein ki ek graahak ka aapki dukan par bitaaya gaya samay yaadgar bane.
  • Aap api dukan ya stall pe flex board laga ke bhi zyada se zyada graahakon ko aakarshit kar sakte hain.
NaamSize Rate per sq/feetTotal Laagat
Flex board5*3 (approx.)Rs. 50(approx.) Rs.600- Rs.800
PrintingSameIska daam depend karega ki aap kya print karane chahate hain.Rs25- Rs 30 (approx.)Rs.350- Rs.400

Matlab ek flex board ki laagat aapko lag bhag Rs 1000- Rs 1200 tak padegi.

LICENSE

Agar aap chai ka stall kholte hain toh aapko koi bhi license ki zaroorat nahi padegi, magar agar aap ek dukan ke doowara apni chai bechna chahate hain toh aapk0 FSSAI license ki jarurat padegi.

License ke liye jaruri kaagajaat:

Dukaandar ke dastaavez (documents)

  • Passport size photo
  • Email id
  • Phone number

Identity proof ke liye dastaavez

  • Ration card
  • Voter id card
  • PAN card
  • Driving license
  • Passport
  • Aadhar card

FSSAI  license application online bharne ke liye click kare

FSSAI License se aur bhi zyada jaankari vistaar mein pane ke liye padhein humara blog FSSAI License.

Tea stall business kaise badha sakte hain

Ek baar jab aapki chai ki dukan aachha munafa kamane lag jaye tabh aap apni chai ke business ke future ke bare mein bhi soch sakte ho. Lekin aapke business ke vikaas mein nivesh ki laagat badh jaayegi magar saath hi saath aapka munafa bhi badh jaayega.

  • Dukan ka size badhana: Aap apni chai ki dukan ka size bara kar sakte ho jaise ki aap baithne ki jagah bahra sakte ho, jissse zyada graahak aapki dukan pe aakar baith sakte hai.
  • Niyukt karna logon ko : Aap doosre logon ko apni chai ki dukan par rakh sakte ho, jo aapki madat ke liye honge jab aapka business bhadhne lag jaye. issse aapka kaam bhi kum ho jaayega aur aap kum se kam time mein apni chai apne graahakon ko bech paoge.
  • Naye dukanen: Agar apne ek jagah ki graahakon ki market par kabja kar liya ho toh aap naye naye location par apni doosri dukane khol sakte hai. Isse apke business ke graahakon ka size badhta rahega.
  • Chai truck: Aap apni chai ko truck ke doovara bhi bech sakte hai, iska faayda yeh hai ki abh aapki dukan ek jagah tak simat nahi hai, aur abh aap apni chai wahan bech sakte hai jahan aapko zyada graahak mile.
  • Contract: a) Aap apne aas paas ke area ki  companies aur factories ke saath baat kar ke contract le sakte hain ki unke karamchaareon ko chai pilane ka, isse aapka business aur tezi se badh jaayega.
    b) Issi tarah se aap apne area ke colleges se baat karke unke sath ek contract le sakte hain jisse aap unke colleges mein chai bech sakte hain, specially unki canteens mein.

Tea stall business tips

In tips ke duwara aap apne business ko majboot aur safal bana sakte hai.

  • Chai banane ke liye aap do prakar ke milk ka isstamal kar sakte hai ek hai jo dairy se ata hai aur doosra jo local farm se ata hai, seedha bhens aur gaay se. In dono milk mein kaafi antar hota hai, bharat ki jo janta hai woh gehri chai peena pasand karti hai, iska matlab milk mein fat ki matra zyada ho. Aur fat ki matra local gaay aur bhens ki milk mein zyada hoti hai.
  • Chai patti aur sugar ke jo daam hote hai woh poore saal mein badalte rahete hain, alag alag season ke hissab se, toh aapko inn daamo ko bhi dimag mein rakhna hoga apni chai ko bechne se pehle.
  • Chai ki dukan ka jo naam hona chaiye woh aissa hona chaiye jo zyada se zyada graahakon ko aakarshit kare.
  • Chai ki dukan jo honi chaiye woh saaf aur sudhri honi chaiye jisse jo chai ki quality hai woh achi rahe aur aapke graahak dukan mein ana aur baithna pasand kare.
  • Apne graahakon ke saath ek dukandar ko humesha ache se vyavahaar karna chaiye, kyonki jitne zyada graahak utna zyada munafa. Issiliye ek graahak aur vyavasaayee ke beech ka sambandh bohot mazboot rehna chaiye.
  • Aapko apna milk aur sugar wholesalers ke paas se khareedna chaiye isse aapke saaman ke kharche kaafi kum rehenge.
  • Aap apni chai ki dukan mein jo glass, cups, plates aur baki saaman isstamaal kiye jaate hain unko humesha saaf aur sudhra rakhein.
  • Agar aapki ki chai ki dukan mein kisi graahak ki ya graahakon koi shikaayat hoti hai, tabh aapko usse aache se sunna chaiye aur business behtar karne ki koshish karni chaiye.
  • Aap apni chai ki dukan ke karamchaareon ko apne business ki logo wali uniform pehna sakte hai.
  • Apni chai ki dukan kholne se pehle aapko kisi aise chai ke dukandaar se salah mashwara karna chaiye jo pehle se hi iss business mein hai aur acha khasa munafa kama leta hai.
  • Jab aapka business badhne lag jaye tabh aapko aur logon ko kaam pe rakh lena chaiye isse aapke business ki raftaar aur munafa badhega.
  • Koshish karein ki aap apni chai ki dukan kisi cigarette/panvadhi ki dukan ke saath mein khole, kyunki generally jo log cigarette peene aate hai woh uske saath chai bhi peena pasand karte hain.
  • Aapko apne graahakon ko iss tarah treat karna chaiye, jiss tarah aap kisi dukan mein khud treat hona chahte hain.
  • Jo aapke aasantusht graahak hote hai, woh appke seekhne ke liye sabh se acha mauka hote hain, unki shikaayaton aur mushikalon ko humesha suniye aur future mein unn par kaam kijiye.
  • Iske alawa chai ki dukan ki andar ki diwaarein saaf sudhri aur sundar honi chahiye. Diwaaron pe papadi ya seelan nahi honi chahiye, isse aapki dukan kaafi achi aur sundar dikhegi.
  • Aap apne business ki branding flex board ke duawara bhi kar sakte ho jiss pe aap LED lights laga ke apni dukan/stall ko sundar bana sakte ho.

Iss article ke zariye se humari taraf se ek koshish ki hai ki aapko har woh baat batane ki koshish karein jo aapko ek acha aur safal chai ki dukan ka business chalane mein madat kare.

Agar aapko aur koi baat jaanani ho ya aur koi sawal ho jo aapke chai ke business se jura ho toh aap nieche diye hue comments section mein likh ke humse pouch sakte hain, hume bahut khushi hogi aapke jawabon ka uttar dene mein, aur hum aasha karte hai ki aapka chai bechne ka business bahut taraki kare aur aap acha khasa munafa kaamane lagein. Humme apna kimti waqt dene ke liye bahut bahut shukriya.

3 COMMENTS

  1. Mujhe apka article bahut hi achha laga me ek tea shop start karne ki soch raha hu mene ek city chorahe pe shop dekha hai jiska rent 300 rupey per day hai kya me ek shop khol sakta hu kitna invest karna padega start me shop chalane ke tips bataye thank you

LEAVE A REPLY

Please enter your comment!
Please enter your name here