hair_salon_business

Aapko aaj hum iss article mein apna khud ka hair salon ka business kaise shuru karne se judi saari baatein batayenge jisse ki aapko poori tarah se ek idea mil jaaye iss business ke har pehlu ke baare mein aur phir aap apna decision le sakein. Iss business ki demand market mein humesha rehti hai aur isiliye yeh ek bahut hi zyaada profitable business hai.

Hair Salon Business Plan Ke baare mein hum janenge ki:

Hair Salon Business Kya Hota Hai

Salon Mein Services

Hair Salon Kaun Open Kar Sakta Hai

Market Ki Jaankari

Salon Ke Liye Saman

Business Mein Investment Ya Laagat

Salon Business Mein Profit

Kanuni Prakriya

Marketing Kaise Kare

Salon Business Ke Liye Tips

Salon Business Ko Kaise Badhayein

Hair Salon Business Mein Awasar

Iss badhti mehngai ke zamane mein kya aap bhi chaahte hain ki aap ek sthayi income kamayein? Iske liye best upay hai apna khud ka business karna and ismein se hi ek business hai hair salon ya nai ki dukan shuru karne ka.
Nai ki dukan shuru karne ke liye zaroori nahi hai ki aap 10th ya 12th pass ho. Koi bhi aadmi jismein kuch apna karne ki chaahat ho aur jo uske liye mehnat karne ke liye taiyaar ho,wo yeh business kar sakta hai.
Ek nai ki dukan ya hair salon aap different scales pe khol sakte hain jaise ki,


1. Ped ke neeche ek kursi lagake bhi aap nai ban sakte hain,aur kyunki koi bhi kaam chhota nahi hota isliye aap yeh kar toh sakte hain, par shaayad yeh wo kaaran nahi hai jiss wajah se aap hamara yeh article padh rahe hain.

2. Ya phir aap ek proper aur achha business set up kar sakte hain,aur ek aisi dukan khol sakte hain jismein zyaada se zyaada log aayein and ek baar nahi baar baar aayein.


Hair Salon Business Kya Hota Hai


Hair salon ya nai ki dukan ek aisi jagah hoti hai jahan log kai saari services ka laabh uthaane aate hain jaise ki hair cutting,shaving,massage aur bahut kuch. Yeh ek aisa business hai jiski demand humesha rehti hai and ek sthaayi aamdani ka bahut achha source hai.
Hair salon mein ek aadmi ek-do mahine mein ek baar toh pakka aata hai aur yeh sab depend karta hai aapke business ke services ki quality pe aur aapke grahak ke experience ke upar, kyonki yeh bahut hi zyaada important hai ki aapke grahak aapki services se khush ho aur khud toh waapas aayein hi aayein par saath saath apne doston aur parivar waalon ko bhi aapke baare mein batayein,toh chaliye dekhte hain aap ek achha hair salon ka business kaise shuru kar sakte hain.

Salon Mein Services

Hair Salon mein hair cutting ke alawa aur bhi bahut saari suvidhaayein uplabdh hoti hain jaise ki –

  • Shaving
  • Massage
  • Hair Spa
  • Oiling
  • Head Massage
  • Hair Wash
  • Hair Colouring

Inn saari services ke liye ho sakta hai aapko ek aur helper ko rakhna padega jisse ki aap sab kuch aasani se sambhal paayein.

Aap inn services ke liye alag alag price charge kar sakte hain and hum aapko yahan ek sample price sheet denge jisko dekhke aapko ek idea mil jaaye ki kaunsi service ke liye kitna daam wajib hai.

ServicePrice(₹)
Hair cutting50-100
Shaving40-60
Head Massage20-50
Face Massage70-100
Hair wash100-150
Hair colouring70-120

Hair Salon Kaun Open Kar Sakta Hai (Qualification)

Iss business ko karne ke liye waise toh 10th ya 12th pass karna aawashyak nahi hai but agar aapko ek professional hair stylist banna hai toh phir yeh basic padhai aniwary ho jaati hai.

Issi ke saath aap mein kuch aisi skills honi chaiye jo aapko ek achha barber/hair stylist bana sakti hai, jaise ki creative hona, aapko logon se achhe se baat karna aana chaiye kyonki aapko apne graahak ko sirf ek achha hairstyle hi nahi but unko ek achha anubhav bhi dena hai jisse ki wo baar baar aapki dukan par aayein.

Aap inn skills pe kaam kar sakte hain kyonki yeh sirf iss dukan ke liye hi nahi, aapki zindagi mein bhi kaam aayengi. Iske alawa aap hair cutting/hair dressing seekhne ke liye ya toh kuch time ke liye kisi aur barber/hair stylist ke saath kaam kar sakte hain ya kisi college se hair dressing/styling mein diploma kar sakte hain.

Aur agar hum hair salon mein available baaki suvidhaaon ki baat kare jaise massage,hair spa aur skin care services toh phir inke liye bhi professional courses available hain.

Hair salon business karne ke liye aap kuch professional courses bhi kar sakte hain, jaise ki hair styling and hair dressing ka course hai. Yeh courses aapko Pearl Academy aur JD Institute of Technology mein aap hair cutting aur hair styling mein aap diploma kar sakte hain.Iski adhik jaankari ke liye yahan click kare.

Agar aap chahein toh aap apne ghar pe baithe baithe bhi online courses kar sakte hain jaise ki Udemy.com and wahan se bhi yeh sab seekh sakte hain.

Market Ki Jaankari

Aapki dukan ki jagah bahut maayne rakhti hai kyonki yahi decide karega ki aapke hair salon mein kitne grahak aayenge aur kis time aayenge. Agar aapki dukan kisi residential area mein hai toh usmein bahut saare grahak aayenge and agar aap yeh kisi aisi jagah pe kholte hain jahan bahut saari dukanein hain but hair salon nahi hai toh aapke salon ke chalne ki sambhaavna bahut badh jaati hai.

Aap apna salon ek aisi jagah par bhi khol sakte hain jahan bahut saare offices ho, par agar aap isse kisi aisi jagah pe kholte hain jahan pehle se hi koi hair salon hai toh phir iska chalna thoda sa mushkil hai kyoni aapka competition ek aisi dukan se hai jo kaafi pehle se uss jagah pe hai isliye aapko yeh sab dhyaan rakhna padega koi bhi jagah ko choose karte hue.

Agar aapke paas pehle se hi jagah available ho toh phir aapka kharcha kam hoga kyunki aapko rent nahi dena hoga par agar hum yeh maane ki aapke paas jagah pehle se nahin hai aur aapko jagah rent pe leni padegi toh aapko kam se kam ek 100-1000 sq ft. ki jagah ki zaroorat padegi. Apne area mein available jagahon ke liye aap yeh online sites pe check kar sakte hain,jaise ki

Salon Ke Liye Saman

Apne hair salon ko setup karne mein aapko bahut saare saman ki zaroorat padegi jaise ki counter,kursi,kaichiyan,shampoo aur bhi bahut kuch. Yeh saare saman hain-

Furniture and Appliances

FurnitureQuantityPrice(₹)
Full size mirror14,000-8,000
Salon chair15,000-20,000
Fan11,500-5,000
Hair Dryer1500-3,000
Hair Straightener1500-3,000
Comb1 set300-1,500
Scissors/kaichiyan1 set300-1,500
Trimmer1500-3,000
Razors1500-2,000
Blades1 set300-600
Shaving brush1300-700
Hair clips1 set200-500
Hair salon cape1200-500
Hand Towel1 set250-400

Cosmetics

Cosmetic ItemQuantityPrice(₹)
Hair Shampoo1300-700
Face Cream and Lotion1300-800
Face Wash1300-500
After-shave1400-750
Hair Water Spray1 bottle200-500
Hair Gel1300-600
Hair Wax1300-600
Shaving Cream/Foam1400-900
Surgical gloves1 set300-500

Baaki kharcha

ItemPrice(₹)
Rent10,000-30,000
Staff salary(if any)10,000-15,000
Electricity charges2,000-3,000
Other unforeseen expenses3,000-5,000

Aapko yeh saara saman apni sheher ke kisi bade market mein jahan wholesale mein saman milta ho,wahan se mil jaayega,and agar aap online dekhna chahte hain toh aapko IndiaMart and Alibaba.com jaisi online sites pe bhi yeh saara saman mil jaayega.

Business Mein Investment Ya Laagat

Iske baad hum baat karte hain ki ek chhote se hair salon ko setup karne mein kitna paisa lagega. Iska budget Rs. 2,00,000-3,00,000 ke beech mein ho sakta hai aur ismein saare cost included hain jaise ki dukan ke liye land/jagah ka rent,salon mein zaruri saara saman aur agar aap apne saath kisi aur ko bhi kaam pe rakhte hain apni help karne ke liye toh uski salary. Issi ke saath aapko thoda paisa apni dukan ki marketing mein bhi kharcha karna padega jisse ki log aapki dukan aur umsien available suvidhaoon ke baare mein jaane aur aapke salon mein aayein.Itna saara paisa laane ke liye aap kaafi tareeke use kar sakte hain, jaise ki

Personal Investment – Personal investment yani apne hi paison ko apne shop ke liye invest karna sabse best option hota hai. Karan, issey aapko loan lene ki jarurat nahin padegi jo ki aapko future mein wapis pay karna hoga. Iske alawa, agar future mein kisi aur se investment karani pad jaye, toh aapki khud se ki gayi investment aapke investor ke liye ek trust point ban jayega ke aap apne business ke bare mein serious hain.

Bank Loan – Bank loans kisi bhi small ya medium sized business ke liye kaafi important role play karta hai. Agar aapke pas apna khud ka investment nahi hai toh aap bank se loan sanction karwa sakte hain. Bank se loan sanction karwane ke liye aapko kuch chizon ki requirements hongi jaise –

  1. Aapki age limit 21-65 years ki honi chahiye
  2. Aapko ek profit margin dikhani hogi jo bank ko trust provide karega.
  3. Ek proper business plan dikhana hoga jo ki loan provider ko aapke business ke bare mein puri jaankari de sake
  4. Finance mein ek aur kaafi important factor hota hai aapke shop ki insurance ka. India mein log insurance pe jyada dhyaan nahi dete hain, jabki aapko kabhi kisi bhi nuksaan, jaise chori ya koi accident, se bachane ke liye shop ki insurance karwana kaafi jaruri hai. Insurance ke liye bhi aapko kisi insurance company se contact karna hoga.

Salon Business Mein Profit

Aur iske baad sabse important cheez aati hai,aapke business ka profit. Jab aapki aamdani ya income aapke kharche se zyada hoti hai tab isse profit kehte hain and kisi bhi successful business ka profit margin zyada hota hai.Business shuru karne ke baad kuch time toh aapko profit kamane mein time lagega but jaise jaise aapka business badhta rahega aur grahak aate rahenge waise waise aapka profit bhi badhega and aapki aamdani bhi badh jaayegi.

Iss business mein profit ke kaafi chances hain kyonki ladke bhi aajkal apne hairstyle aur looks ko lekar kaafi serious ho gaye hain aur issi wajah se iss business mein grahak humesha aate hi rahenge aur yeh aapke liye ek bahut achha mauka hai kyonki isse ek aap bahut hi acchi income kama sakte hain.Ismein aapka aaram se 50% ka profit margin rahega kyunki kyunki jab aap kisi grahak ke baal kaatenge toh aapki sirf mehnat use hogi and jo bhi paise aap uss ek grahak se kamayenge woh aapki khudki kamai hogi. Iske saath hi jab aap ek baar apni initial investment karlenge toh uske baad ka kharcha zyaada nahi hoga aur aapki kamai hamesha aapke kharche se zyaada rahegi.

Kanuni Prakriya

Aksar log poochte hai ki dukan ka licence kaise banaye. Toh Kisi bhi dukan ko shuru karne se pehle aapko usse judi hui kanuni prakriya ko poora karna hota hai and waise hi iss dukan ke liye bhi sabse pehle aapko apni dukan ko Shop and Establishment Act ke under register karana hoga. Iske liye aap apne shahar ki labour department ki webiste pe jaa sakte hain and wahan apna business register kar sakte hain. Yeh registration aap online kar sakte hain, ismein inn sab details ki zaroorat hai-

1.Shop ka naam

2.Shop ka address

3.Shop owner ka naam

4.Shop ka business type(hair salon,electricity etc)

Documents jo registration mein lagenge-

  1. PAN/ Aadhar Card/Driving License/ Voter ID
  2. Photo of owner
  3. Rent Agreement,if Rented
  4. Electricity Bill

Iske alawa aapko apne dukan ka GST registration bhi karwana padega . Aap apni dukan ka GST registration government dwara provided website se kar sakte hain,jiska link yeh hai – GST ki Official Website aur iske liye humein inn documents ki zaroorat hai-

  1. Aapka PAN Card.
  2. Business Registration ka proof.
  3. ID & Address proof(photograph ke saath).
  4. Aapke business ka address proof.
  5. Bank Account Statement.
  6. Digital Signature.

GST Registration kaise kare ki poori jankari ke liye yahan click karein.

Marketing Kaise Kare

Kisi bhi business chahe wo chhoti ho ya badi, use agey badhane ke liye us business ki acchi marketing karna bahut jyada jaruri hai. Iske liye dhyaan rakhein ke aapke business ke according ese kon se marketing ke tarike hain jissey aap jyada se jyada logon tak apne business ko pahuncha sakte hain.

Ab baat ye hai ke aap apne baki competitors ke comparision mein esa kya kar rahe hain jo ki aapke busniess ko bakiyon se alag bana raha hai aur apke customers ki list badha raha hai. Apne business ko agey badhane ke liye aapko in 3 baton ka dhyaan rakhna hoga – Shop ki Advertisement yani Prachar, Apka apne customers se behaviour yani customers se bartaw aur Customers ki benefits. Toh ayiye baat karte hain in teeno tarikon ke bare mein aur kaise aap apne business ko jyada se jyada logon tak pahuncha sakte hain.

Advertisement (Prachar)

Aap apne dukan ka prachar kayi madhyam se kar sakte hain. Kuch tarike online kiye jayenge aur kuch offline. Baat karte hain in saare tarikon ke bare mein –

Online

1. Google My Business – Google My Business Google ke taraf se ek free tool hai jissey aap apne business ko Google ki listing mein daal sakte hain. Iska fayeda ye hai ke jab bhi koi Google pe search karega ke aas paas beauty parlour kahan hai ya phir sidha aapke naam se apki dukan dhundna chahega toh usey bhot aasani se apki shop ka sara detail Google par mil jayega.

Google pe kaise dhunde kisi business ko  Google pe kisi business ko kaise dhunde

Google My Business apke shop ka naam, shop tak pahunchne ka direction, Phone number, Reviews, Ratings, images aur details sab kuch ek hi jagah par apke customer tak pahuncha dega. Iske alawa agar koi kisi area mein apne aas pas ladies beauty parlour dhund raha hai aur apka parlour us area ke range mein aarai hai toh aapke shop ka naam aur detail bhi Google ki list mein ajayega. Issey aasani se apki parlour ko koi bhi online dhund sakta hai.

Google My Business mein account banana kaafi aasan hai. Zyada jaankari ke liye yahan click kare.

2. Just Dial– Yeh ek aisa platform hai jo ki kisi bhi area ke local businesses ki information provide karta hai jo ki aapko ya toh internet ke madhyam se aapko milegi ya phir call ke through pata chalegi.

Just Dial pe business ko kaise register kare-

Iss platform mein bhi Google My Business ki tarah aapko apna busniess register karna hoga. Antar bas itna hai ke Just Dial mein aap do tarah ki listing kara sakte hain – Free listing ya phir Paid Listing.

Registration ka process kaafi simple hota hai aur ye aap online unki website se kara sakte hain ya phir aap 8888888888 pe call karke bhi registration kara sakte hain.

Offline

1. Newspaper Ad:  Aap apne business ka offline marketing karne ke liye uska Ad apne area mein bikne waale newspaper mein nikalwa sakte hain and iska poora laabh utha sakte hain.

2. Pamphlets: Aap apni dukan ke prachar ke liye pamphlets mein apna Ad dalwa sakte hain aur inn pamphlets ko papers mein ya phir logon ke ghar ghar jaake bhi dekar aa sakte hain.

3. Yellow Pages: Yellow Pages ek directory hai jisme aapke seher ke har area ke chhote se lekar bade businesses ke numbers aur address hote hain. Yellow pages mein register karne aur jyada jaankari ke liye yahan click kare.

4. Advertising coupons and discount offers: Agar aap apne grahak ko discount offers denge toh wo baar baar aapki dukan mein aayenge aur zyada se zyada suvidhaon ka anand uthayenge. Aap apne grahakon ke liye kuch services ke combination packages bana sakte hain aur unhein kam daam pe apne grahakon ko de sakte hain.

5. Word of mouth: Word of mouth ek aisa tarika hai jisse aapke hair salon mein logon ki bheed badhti hi jaayegi aur iss marketing ke tarike mein bilkul bhi paise nahi lagenge kyonki yeh poori tarah aapke kaam pe depend karta hai kyonki agar aapki service acchi hogi tabhi log ek doosre ko aapki dukan ke baare mein batayenge.

Salon Business Ke Liye Tips

Apne business ko ek successful aur behtar business banane ke liye hum aapko aaj kuch tips denge.

  • Saaf-safai ka dhyan rakhein: Aapke salon mein log baal katwane zaroor aate hain but log yahan waapas tabhi aayenge jab aap unhein ek behtareen service denge aur issi service ka ek part hygiene (saaf-safai) bhi hai. Apne salon ko agar aap saaf rakhenge toh wo logon ko dekhne mein bhi achha rahega aur sabse zaroori baat,ek saaf jagah ek swasth jagah hoti hai,isliye apne salon mein saaf-safai rakhna bahut zaroori hai.
  • Grahak ki satisfaction ka dhyan rakhein :Jab aapke grahak aapke salon ke kisi bhi suvidha ka laabh uthaayenge tab zaroori hai ki aap apna poora dhyaan apne kaam par rakhein and unhein best service dein aur issi ke saath apni dukan mein jo bhi staaf rakhein unko bhi apne grahakon se acchi tarike se baat karna sikhayein.
  • Reasonable price: Apne grahak se ek sahi aur reasonable price charge kijiye kyonki tabhi wo aapke paas waapas aayenge and agar aapke grahak ko yeh lagega ki wo bilkul hi wajib daamn de rahe hain aapki services ke liye toh unka aapke upar vishwaas aur badh jaayega.
  • Saari modes of payment: Aapko apni dukan pe saari modes of payment(payment ke tareeke) rakhne chaiye,kyonki aajkal zamana digital ka hai and agar aap digital modes of payment rakjhenge jaise ki PayTm and Google Pay toh log inn sabse aur bhi zyada akarshit honge.
  • Quality of products: Aapko apne business mein yeh dhyaan rakhna padega ki aap jo products use karein uski quality acchi honi chaiye kyonki issi se aapko grahak ko aapke upar bharosa hoga,aur issi wajah se aapko sasta aur low-quality saman nahi khareedna chaiye apne salon ke liye.

Salon Business Ko Kaise Badhayein

Agar ek baar aapka business chalne lag jaaye and aap achha khaasa profit kamaane lagein toh phir aap apne business ko expand karne ka soch sakte hain. Apne hair salon ke business ko expand karne ke bahut se tarike ho sakte hain,jaise ki:

  • Unisex Salon: Unisex salon ka matlab hota hai ek aisa salon jo ki ladies and gents donon ke liye hota hai,aur ismein investment thoda zyada hota hai,par jitna zyada investment utna hi zyada profit ke chances badh jaate hain.
  • Hair Salon Franchise: Aap apne hair salon ko kisi franchise ke saath jod sakte hain par ismein kharcha bahut zyaada hota hai kyonki inn hair salons mein jo saman aur cheezein use hoti hain wo bahut hi mehngi hoti hain,toh yeh aapke business ke kamsekam 3-4 saal hone ke baad aap yeh soch sakte hain.
  • Branch: Aap chahein toh apni dukan ke branches alag alag jagahon pe bhi khol sakte hain aur iske liye aapko aur bhi kaafi saare logon ko hire karna pad sakta hai but ek baar aapke grahak aapki dukan pe bharosa karne lagenge toh phir uske baad aapka business bahut acche se chalne lagega.
  • Mobile salon services: Ek aur tarika apne business ko badhane ka yeh hai ki aap logon ke ghar ghar jaake unko salon services dein,isse log aapke services ko bahut pasand karenge and aapko recommend bhi karenge.

Humein umeed hai iss business plan se aapko samajh aagaya hoga ki kaise aap apna hair salon business shuru kar sakte hain. Agar aapke mann mein iske alawa aur bhi koi sawal hai toh comment karke humse zarur puchein.

1 COMMENT

LEAVE A REPLY

Please enter your comment!
Please enter your name here