Resume ya CV kya hota hai aur kaise banaya jata hai

0
418

Is article ko padh ke aapko pata chalega ki Resume ya CV ya Biodata kya hota hai aur kaise banaya jata hai.

Main aapko resume likhna sikhaunga aur resume ke format ke bare mein bhi bataunga.

Aapko pata chalega ki aap kahan se resume ke format template download kar sakte hai aur kaise aap asani se MS word pe resume kaise bana sakte hai.

Mera naam Ashutosh Bharadwaj hai aur main Josh Talks mein Marketing Head hoon. Maine apne 13 saal ke career mein hazaron resume dekhein hai aur darjanon logon ko job di hai.

Main jaanta hun ki naukri dene wale kaise sochte hai to main aapko bataunga Andar Ki Baat jo hain aise resume tips jo mere tajurbe se maine seekha hai.

Post ke content

Janiye resume ya CV kya hota hai

Aap janeinge

Resume ka format kaise banayein

Aap janeinge

Resume ka content likhe ka tareeka

Main aapko bataunga iasa mantra ya formula jisse aap asani se resume ka content banana sekeinge.

Resume MS word mein kaise banaye?

Main aapko bataunga kuch websites jahan se aap free main resume ke template download kar sakte hai aur unko MS word mein khol ke apna content lik sakte hai.

To pehle jante hai ki resume ya CV ya biodata hota kya hai aur iski kya zarurat hai?


Resume ya CV kya hota hai?

Jab bhi aap kisi naukri ke liye apply karte hai aapka CV maanga jata hai. Yeh ek document hota hai jis mein aapki professional aur personal qualifications hote hai. 

CV ki full form hota hai Curriculum Vitae jo ek Latin shabd hai. Hindi mein iska matlab hota hai “Jeevan ka saar” ya “Zindagi ki kahani”

Aapko resume mein woh sab kuch dalna chahiye jiski zaroorat job dene wale ko hoti hai jaise ki

  • Aapne kya kya padha kari hai
  • Apne kahan aur kya naukri kari hai (Agar aap fresher nahin ho)
  • Aapke paas kaun si woh khoobiyan ya skills hai jo naukri mein kaam aa sakte hai

Resume kya hota hai janne ke liye is mazedar video ko dekhein ↓↓

Resume aur CV mein kya antar hai?

Hamare liye dono ek hi cheez hai. Waise to resume CV ka sankshipt roop hota hai par aajkal donon shabdon ke beech mein koi antar nahi hai. Resume ko biodata bhi kaha jata hai.

#Andar ki baat Tip 1

‘Resume/CV ya Biodata ek page ka hi hona chahiye’

Kuch log kehte hai ki CV aur resume alag hote hai

kyuni CV ek page se zyada ho sakta hai.

Yeh galat hai. Resume, CV ya biodata ek hi page ka hona chahiye. 20 – 20 saal ke experience walon ka bhi resume ek hi page ka hota hai. Sirif PhD researchers ya scientists ka resume 1 page se zyada hota hai kyunki unko apni research ke bare mein baat karna hota hai. Company walon ke paas itna time nahi hota ki woh 2-3 page ka resume padhein. Bas baat khatam!

Resume ki zarurat kya hoti hai?

Jab bhi aap kisi job ke liye apply karte hai woh pehle aap se resume mangte hai.

Yeh aise hi nahin kiya jata hai. Resume bahut zaruri hota hai naukri ke liye kyunki

  • Resume ko dekh ke hi naukri dene wali company samajhti hai ki aap us job ke liye theek ho ya nahin
  • Resume dekh ke company wale yeh pata karte hai ki aapko interview ke liye bulana hai ya nahi
  • Jab interview hota hai to interview lene wala sawal resume ko hi dekh ke poochte hai

Isliye zaruri hai ki aap ek accha sa resume banayein , aisa resume jisko dekhte hi naukri dene wale aapko interview ke liye bula lein.

#Andar ki baat Tip 2

Agar aapke resume sabse alag aur badiya hai to naukri milne ke chance badhte hai

“Maine hazaron resume dekhe hai jeevan mein. Kuch ko chod ke sab ek jaise lagte hai. Jab mujhe koi resume dikhta hai jo acha bana hua hai aur jis mein lagta hai ki candidate ne kuch mehnat kari hai to main interview se pehle hi dimag bana leta hun ki is candidate ko select kar lo. Jisne resume banane mein itni mehnat kari hai woh acha candidate to hoga hi”.

Company wale aapke resume mein kya dekhte hai?

Ek CV pe recruiter 6 second lagate hai to CV mein wahi ho na chahiye jo woh dekhna chahte hai. To aapke resume aisa hona chahiye ki bas 6 seconds mein aapki quality chamak jaye aur aapka interview call aa jaye.

Aap interview mein resume leke jate ho aur pura job interview usi CV be hi adharit hota hai.

Company wale aapke resume yeh sab dekhna chahte hai

  • Jis bhi naukri ke liye apne apply kiya hai uske liye aap qualified hone chahiye
  • Agar aap fresher hai tab to company aapko train karegi par phir bhi job dene wala chahta hai ki resume mein nikal ke aye ki aap mehnat kar sakte ho aur

#Andar ki baat Tip 3

Acche resume se aap naukri dene wale ki zindagi asan kar rahe hai

Aap se zyada tension resume ki recruiter ko hoti hai. Kyunki kisi bhi naukri ke liye 50 se 100 resume aate hai aur us mein se kuch ko hi interview ke liye bulaya jata hai.

“Company recruit isliye karti hai kyunki unko logon ki zarurat hoti hai aur agar sahi candidate nahin milta to unka kaam rukta hai aur recruiter ko apne boss se sunna padta hai. Isliye accha resume banake aap naukri dene wale ki madat kar rahe ho”.

Resume kaise banate hai – Resume ya CV ka format

Main batata hoon aapko resume banane ka saral tarika.

Kuch log kehte hai ki resume ka ek hi format ya template hota hai par main yeh nahi manta. Har kisi ka resume alag hona chahiye kyunki hum sab alag alag log hai.

Resume banane ke teen step hai.

  1. Resume mein kya, kya likhe yeh pata karna
  2. Resume ka content kaise likhna hai yeh pata karna
  3. Resume formats – Computer mein MS Word / PDF resume banana

Resume mein kya kya likhte hai?

Maine kafi logon se baat kari hai resume ke bare mein aur ek cheez jo maine kafi zyada dekhi hai ki logon ko pata hi nahin hai ki resume mein kya likhna hai!

Dekho, yeh bat to sabko pata hai ki resume mein apne kya padhai kari hai aur agar aapke paas work experience hai to uske baare mein likhna chahiye par yeh kaafi nahi hai kyunki sab yahi to likh rahe hai.

Recruiter ya job dene wale ke paas itne resume aate hai ki jabtak apka resume alag nahin lagega tabtak aap ko interview ka call nahin ayega. Isliye aapko agar accha resume banana hai to aapko kuch aur likhna hoga.

To isi baat pe main aapko resume banane ka pehla mantra deta hun

Resume banane ka pehla matra hai

“Jeevan mein jo kuch kiya hai, soch soch ke likh do”

Resume aapki zindagi ka saar hai. Aapko sochke woh baatein likhni hai jinse aapki khubiyan nikhar ke aayein. Par pehle sab kuch yaad karna hoga aapko aur bas likh dena hoga. Par yaad rakhna ki

  • Time laga ke aur soch ke likhna hai aapne
  • Koi cheez choti nahi hoti, kisi bhi cheez se apki khubiyan bahar nikal sakti hai
  • Jo bhi aap likhoge usi mein se hum cheezein nikaleinge aur resume mein daleinge

Resume mein kya likhna hai yeh samajhne ke liye yeh mazedar video dekhiye ↓↓↓

Zindagi mein aatm chintan bahaut zaruri hai. Jabtak aap socho ge nahi apne baare mein aur apni zindagi ke baare mein tabtak aap ki khubiyan bahar nahi aa payegi.

Is pehle mantra se jo kuch milega usse hum resume likhenge. Par pehle jaan lein ki resume mein kya kya bhaag hote hai.

Resume mein kaun kaun se section ya bhaag hote hai?

Jaise ki humne pehle baat ki hai, resume ka kabhi bhi ek format nahi ho sakta hai kyunki

• Sabki apni alag alag zindagi hoti hai to resume ka alag alag hi format hoga na
• Agar sabke resume mein ek hi baat likhi hogi to phir naukri dene wale kaise janega ki kaun acha hai aur kaun itna acha nahi

Isliye aapko resume ke bhagon ke bare mein ek baar sochna chahiye acchi tarah se.

Pehle baat karte hai ki fresher ke liye kya kya bhaag hone chahiye. Phir baat karte hai ki experience wale logon ke resume mein aur kya dala ja sakta hai.

Fresher resume format

Pehle baat karte hai ki freshers (Jinhone kahin kaam nahi kiya hai) unke resume ke format kya hona chahiye.

Yaad rakhein ki zaruri nahi hai ki har cheez aapne likhni hai. Maine sari cheezein likh di hai aur aap pe hai ki aap kinko rakhna chahte hai aur kinko nahin. 

Resume kaise banate hai aur resume format kaise banate hai jaane ke liye video dekhein ↓↓

1. Name aur contact information

Resume aapke hai to aapka naam hona chahiye aur contact information bhi

Contact information mein bas phone number aur Email address dalna chahiye. Yaad rakhein ki Email address professional hona chahiye, agar ajeeb sa hai jaise [email protected] ya [email protected] to yeh accha impression nahin banata.

Contact information mein address likhne ki zarurat nahi hai. Koi yeh nahi janana chahta ki aap kahan rehte ho, agar unko puchna hai to woh pooch lein ge.

2. Summary

Contact information ke baad aapko apni career ki summary likhni chahiye.

Summary ka matlab hota hai career ka saar. Yeh 2 ya 3 lines ka hona chahiye jisko padh kar samajh mein aa jaye ki aap ke resume mein kya likha hai. Main summary kaise likhte hai iske baare mein baad mein baat karta hun.

Kafi log objective likhte hai jo galat hai. Objective ke bare mein maine aur bataya hai agle section mein jahan main baat karta hun ki resume ya CV mein kya nahin dalna chahiye.

3. Education ya padhai

Yeh to har resume mein hona chahiye.

Is bhaag ka format aisa ho sakta hai

Year Course Institute University/Board Percentage
2018 MBA (Marketing) Postgraduate Institute University Name 70%
2016 B.A Graduation Institute University Name 60%
2013 12th Class XYZ School CBSE Board 80%
2011 10th Class ABC School ICSE Board 85%

 

Year – Kis saal aapne course ya class pass kari hai. Agar aap ka result nahi aya hai yaa aap abhi bhi course kar rahe hai to likhe 2018 (Expected) ya 2018 (Result awaited).

Tip – Recruiters pass hone ke saal se gap years ka pata har sakte hai. Agar kahin bhi gap hai to batana hoga ki kyu hai.

Course – Is mein aapko education ka course batana hai jaise B.A, BCom wagarah.

Institute – Yahan aap batayenge ki aapne kaun se college ya school se course kiya hai.

Tip – Agar aapka school ya college ka kafi naam hai to is section ko dalna chahiye. Agar nahin to aap University/Board wale section hi rakhein aur is section ko nikal dein.

Percentage – Yahan aapki total percentage ya grade kya hai woh likhna hai.

#TIP– Agar aapki acchi percentage nahi ayi hai to is section ko rakhein hi nahin. Yaad rakho ki resume aapka hai aur aap jo chaho dikha sakte jo.

Kuch baaton ka dhyan rakhe:

  • Jo qualification pehle puri kari hai usko pehle likho, matlab agar aap graduate ho to upar graduation phir 12th phir 10th.
  • Agar aapne apni class mein ya area mein top kiya hai (aap ranker ho) to aap ek aur column Achievement ka dal sakte hai jahan aap yeh baat keh sakte hai.
  • Agar apke kam marks bhi hai par aapke marks badh rahe hai to aap likh sakte ho. Matlab agar mere 10th mein 40%, 12th mein 55% aur graduation mein 60% hai to mujhe likhna chahiye kyuki recruiter dekhega ki maine zindagi mein improvement to kiya hai na
  • 10th class ke bare mein baat karna zaruri nahin hai agar aapke paas kafi work experience hai. Maine kafi saal pehle 10th kari thi aur iske baare mein baat karke mujhe kuch fayda nahi hai. Agar mere 10th mein number acche hote to to main ek baar soch sakta tha isko rakhne ka par aisa nahi hai to main nahin likhta apne resume mein

4. Professional courses

Agar padhai ke saath saath apne kuch courses ya certification kare hai to inko bhi likh dijiye. Professional courses ke kuch udaharan hai

Computer courses jaise

  • Completed CCC certification course by NIELIT
  • Completed Jetking Certified Hardware & Networking Engineer course with A grade
  • Successfully completed Post Graduate Program in Hardware and Networking from NIIT

English speaking course

Video editing course

Aur koi certification jaise

  • Data entry course
  • Tally
  • MS word
  • Web development

5. Co Curricular activities

Padhai ke alawa jo aapne kiya hai unko co curricular ya extra curricular activities kehte hai. Jaise khel kood, competitions mein bhag lena ya unko organize karna.

In activities se aapki qualities ya khoobiyan nikalke aati hai. Co curricular activities jo aap lik sakte hai resume mein woh hoti hai

Organization ya ayojan karwana

Agar aapne kisi bhi samaroh ko ayojit karwaya hai ya ayojan ki team ke bhaag rahe hai to isko dalna na bhulein. Ayojan karne mein aapka kaushal samne aata hai aur naukri dene wale ko pata chalta hai aapke

  • People management skills ya logon se kaam nikalwane ka kaushal
  • Karmathta aur mehnat karne ki bhawna
  • Team management skills ya team ke saath kaam karne ki bhawna
  • Pressure mein kaam karne ka kaushal

Yeh zaruri nahi hai ki aapne pure function ka ayojan karwaya hai, agar aap ayojan team ka bhag bhi hai to yeh bhi accha hai aur apko likhna chahiye.

Participation ya bhaag lena

Agar aapne kisi samaroh ya pratiyogita mein bhaag liya hai ya kuch jeeta hai to yeh bhi aap likh sakte hai.

Sports

Khel kood ya sports ke baare mein bhi aap dal sakte hai apne resume mein. Khel kood ke bare main pata nahin kyu yeh bhram hai logon ko ki yeh acchi cheez nahin hoti.

School, college, army aur kuch sarkari naukriyon mein sportsperson ka reservation hota hai ya sports khelne ka fayada milta hai.

Iska matlab hai ki sports agar aapne dala ho to accha rehta hai. Bhaag liya ho ya kuch jeeta ho yeh sab kuch likhna hai. Agar aap team ke captain the to yeh bhi likhiye.

6. Skills

Skills ya kaushal aisi cheezain hoti hai jo naukri ke liye zaruri hoti hai. Jaise computer ka kaushal ya koi software jo aapko aata hoga. Yeh skills jo certifications aapne like hai usmein se hi nikalne chahiye aur inki list banani chahiye. Skills kaise likhni chahiye yeh main aapko baad mein batata hun.

Samajik kaam (Social work ya volunteer experience)

Isko resume mein zarur dalna chahiye. Agar aapne koi bhi aisa kaam kiya hai jisse kisi samajh ki madat hui jaise

  • Bacchon ko padhana
  • Vridh ashram mein volunteer karna
  • Gareebon ke liye khana ya saman ikattha karna
  • Saaf safai karwana ilake ki

Aur bahaut kuch seva ya jan kalyan ka kaam kara ho sakta hai aapne jisko aapko is section mein likhna hai.

7. Internship

Agar aapne koi internship kari hai matlab aapne kisi company ke saath kaam kiya hai to iske liye aapko ek alag se section banana hoga jiska titek hoga ‘internship’

Internship ko aap work experience ke section mein bhi daal sakta hai kyunki aap company mein hi kaam karte hai aur isse apko kaam ka experience ho jata hai kafi.

Work experience resume format

Agar aap fresher nahin ho aur aapne kuch saal tak kaam kiya hai to fresher resume se aapke resume alag hoga.

1. Work experience

Kyunki aapke paas work experience hai isliye education se bhi pehle aapko ek section banana hoga work experience ka. Work experience ke section ko aap alag alag tareeke se likh sakte hai, alag alag formats mein par yaad rakhei ki kuch cheezon ko dalna zaruri hai jaise

  • Company ka naam
  • Aapka designation ya pad
  • Kabse kabtak apne kaam kiya hai us company mein
  • Aapne kya kiya aur uska kya fayda hua (Main iske baare mein aage batata hun)

Yaad rakhna hai ki jo latest job hai woh pehle dalni hai.

2. Awards aur achievements

Job karte hue agar aapko koi award ya puraskar mila hai to iska aap ek alag section bana sakte hai aur inko likh sakte hai.

Yaad rakhna hai ki ek work experience wale person ke resume ya CV mein yeh work experience wala section kafi zaruri hota hai aur isko kafi jagah deni chahiye. Agar ek page mein resume nahi pura ho pate to kuch aur cheezein nikal dein par work experience mein se kuch na ghataye kyunki yeh sabse zaruri hota hai agar aapko naukri chahiye.

Resume ka content kaise likhte hai?

Chalo ab humare sections to ban gaye aur yeh bhi pata chal gaya hai ki resume ke format kya hota hai aur usmein kya likha jata hai.

To ab baat karte hai ki resume mein kaise likhein aap apni uplabdhiyan.

Iske liye main aapko resume banane ka dusra mantra ya formula batata hun.

Yeh dhyaan dena hai ki bas yeh hi nahi likha ki aapne kya kya par yeh zaryr likhna hai ki jo kaam kiya uska kya fayada hua ya kya benifit hua.

Resume likhne ka mantra hai

“Applied ABC skill on PQR task to get XYZ result”

Ya hindi mein bolein to

“Apne kaushal ya skill ka istimal maine kara ek kaam mein aur uska yeh fayada hua”

Iske kuch udarhad lete hai

Galat Sahi
Organized Republic day function

 

26 January ko mohalle mein samaroh ka ayojan kiya

 

Headed team that organized Republic day function which was attended by 500 people and was appreciated by attendees.

26 January ka samaraoh ke ayojan samiti ka netritva kiya. Samaroh ko 500 log dekhne aye aur unhone uski prashansa kari

Did sales for company

Company ke liye sales kari

Exceeded sales targets every month gaining appreciation from bosses

Sales targets se zyada sales kari har mahine aur boss se prashansa payi har baar

Managed social media for company

Company ke like social management kiya

Innovative social management led to a 50% increase in page engagement and 20% increase in leads

Company ke social media pages ke management mein nayi pehal ki wajah se page engagement mein 50 % ki badhotri hui jisse 20% amdani badhi company ki

 

Apne jo kiya hai uski uplabdhi ke baare mein baat karna zaruri hai CV mein. Isi se pata chalege recruiter ya naukri dene wala ko ki aapka kausal hai kaam mein aur aapko naukri deni chahiye.

Yaad rakhna hai

  • Numbers bolte hai to apni uplabdhiyon mein humesha kuch numbers ya akde dalein
  • Agar koi akedein nahin mil rahe tab bhi jo kiya hai uska fayada darshain


MS Word mein resume kaise banaya jata hai?

Resume ka format ya sections bhi humko pata chal gaye aur kaise likhna hai woh bhi. Ab sawal yeh aata hai ki MS word mein resume kaise banaya jata hai.

Iske kaafi tarike hai

Online bahut sare websites hai jahan se aap resume ke template download kar sakte hai aur us template mein aap apna content dalke resume bana sakte hai.

Formats bane banaye resume hote hai jismein design aur section dono banaye hote hai. Template ko download karke MS word mein khol ke edit karna hota hai, matlab usmein diye gaye text ko delete karke jo text aapne likha hai usko dalna hota hai.

Maine kafi sare website dekhein hai aur unmein se sabse accha mujhe lagta hai Hloom.com.

resume format kaise kahan se download kareing hloom.com

Kafi sare sites aapko aise milenge jahan resume template ko download karne ke liye aapko kuch paise dene padte hai. Hloom.com pe aisa nahi hai.

Yahan click karke resume format dekhein

Yahan kafi sare alag alag resume ke formats hai.

resume formats hloom se kaise download karein

Pehle aapne jo format kagaz pe banaya hai usse milta julta format ko dhundho aur download kar lo. Yahan kafi sare resume ke format hai to usko select karo jiske sections aur format aapne jo likha hai waisa ho.

resume format template ko kaise download karein

Jab aap template pe click kareinge to ek naya page khulega. Us page pe right side pe chota as link hoga jo kehta hai Free. Us link pe click karein.

resume template download karne ke liye kahan click karna hai hloom.com pe

Jaise hi aap click kareige to resume MS word format mein download ho jayega. Aap download jahan hota hai wahan jake us template ko open kare ya browser mein hi neeche jake click karein.

Rangeen buttons pe click nahin karna hai, woh ads hai.

Jo template pasand aye usko download karke aur MA word mein kholke usmein apna content dal sakte hai aur resume bana sakte hai.

Jab aap template ko MS word mein open karenge to aapko dikhega ki har cheez ko edit kiya ja sakta hai. Bas purane text ko delete karein aur naya text type karein.

Pehle is template mein kuch button aur links hote hai unko delete kar do.

resume template ko edit karna

Agle page pe hloom.com ke credits likhe hote hai to inko bhi select karke delete karna mat bhoolna.

Phir aap sari information ko replace karke apna resume bana sakte hai. Agar kuch section naya hai to usko delete kar sakte hai.

Kafi sites aise hai jinpe template hota hai par download karne ke liye paise mangte hai.

Par kuch websites hai jahan se aap resume ke template free mein download kar sakte hai aur upar bataye gaye tarike se saralta se apne CV bana sakte hai.

Resume genius

Is website mein kafi layout hai resume ke jinko aap download kar sakte hai aur MS word mein edit kar sakte hai.

Is site se jab aap resume download karoge to ek zip file download hogi jis mein alag alag formats mileinge jinko aap edit karke resume bana sakte ho.

resume genius website se resume kaise download karein

Resume genius website pe jake resume templates dekhein aur download karein

Resume companion

Is website pe bhi kafi sare template hai jo aap download kar sakte ho aur apna resume bana sakte ho

Resume companion website se resume template download karein

Mujhe umeed hai ki aapko samajh mein aa gaya hoga ki ek accha resume ya CV kaise banaya jata hai.

Agar aapko koi bhi sawal hai to neeche comment karke puchein. Main personally har sawal ka jawab dunga.

Main aasha karta hun ki aapki acchi si naukri lag jaye.

Resume ke saath cover letter ki bhi zarurat hoti hai naukri ke like apply karne ke liye.

Cover letter kaise banaya jata hai yahan pata kare 

जब आशुतोष छोटा बच्चा था उसने कहीं पढ़ लिया की दुनिया के सबसे दिलचस्प लोगों को नहीं पता होता है की वह बड़े होंगे क्या बनेंगे। आशुतोष अब बड़े होने के बावजूद उसी सोच में अटका है।

LEAVE A REPLY

Please enter your comment!
Please enter your name here