aloe_vera_ki_kheti

Aloe vera jisse gwarpatha ke naam se bhi jana jaata hai ek aisa plant hai jo na hi sirf medicinal purposes ke liye use kiya jata hai, balki yeh ek aisa plant hai jo aaj kal rozana istemaal hone waali cheezo mein bhi use kiya jaane laga hai jaise shampoo, conditioner, juice, sabun, toothpaste etc. Aloe vera farming ek badhta hua business hai jisme aap acha munafa kama sakte hain. Toh agar aap janana chahte hai ki aloe vera ki kheti kaise karein, aur usko market mein kaise beche toh yeh blog aloe vera farming business plan se related aapke saare sawalo ka jawab dega.

Aloe Vera kheti ki jaankari ek Expert se janane ke liye niche video par click kare.

Iss article mein hum aapko batayenge

Aloe vera ki kheti kya hoti hai

Aloe vera farming business kaise kare

Market ki jaankari

Aloe vera farming mein laagat

Aloe vera business ke liye loan

Aloe vera ki kheti se profit

Aloe vera juice business plan

Aloe vera business mein awasar

Aloe vera kheti se jude kuch sawaal

Ye article Aloe Vera Farm Owner Mr. Ishu Rana ki help se banaya gaya hai

Expert Consultant: Mr. Ishu Rana | Owner at Rana Agro Herbals |Address: Rohini Sector 17, Extension, Delhi-110042 | Phone: 9910001588, 9958943020

⇊ Ishu ji is video mein aloe vera kheti se jude mukhya sawalon ke jawab batayenge  ⇊ 

Aloe vera ki kheti kya hoti hai

Aloe vera ya ghritkumari ek aisa podha hota hai jo apni medicinal qualities ke liye famous hai. Aur ab yeh ek aisa plant ban chukka hai jo na hi sirf medicines mein par cosmetics mein, daily use kiye jaane wale products mein aur juices mein bhi aane laga hai. Aloe vera ki kheti ka matlab hai aloe vera ke baby plant ya beej lagakar use ugaana aur market mein bechkar munafa kamana. Aaj kal aloe vera ki badhti demand ki wajah se iska business ki india mein bahut achi growth dekhne ko mili hai.

Yeh ek aisa business hai jisme kam laagat hai aur munafa bhi asani se kamaya jaa sakta hai. Aur iss business ki khaas baat ye hai ki aap ye business ghar ke bageeche se bhi shuru kar sakte hain. Yeh business apko option deta hai ki aap ek saath ek se zyada business chala sake kyunki yeh business bilkul maintainance nahi maangta. Aap chahe toh aloe vera farming ke saath saath hi aloe vera juice business bhi khol sakte hain.

Aloe Vera Farming Business kaise kare

Agar aap aloe veraka business shuru karna chahte hain, toh aap yeh kaam do tarah se kar sakte hain.

  • Aap chahe toh Aloe vera ki kheti karke usse market mein bech sakte hain. Aap chahe toh aloe vera ki mandi mein jaakar bech sakte hain yaa phir kisi badi company se contract karke unko apna stock supply kar saktehain.
  • Agar aap aloe vera ke business se thoda extra munafa kamana chahte hain toh aap thodi aur investment karke aloe vera ka juice banana ka business shuru kar sakte hain.

In dono tareeko mein ek cheez common hai jo hai aloe vera ki kheti karna. Toh aaye ab janane hai ki kaise aap bhi aloe vera ki kheti kar sakte hain.

Aloe vera ki kheti kaise kare

Aloe vera ki kheti karne se pehle, aapko sahi jagah aur mitti ka chunaav karna hoga taaki apki fasal achhi ho.

Naturally, aloe vera ki kisi bhi anupjaau yani infertile land mein ugg sakta hai. iska matlab yeh hai ki aloe vera kisi bhi mitti mein ugaya jaa sakta hai. Lekin zyadatar isse Bulai Domat mitti (Soft Loam Soil) main ugaya jaata hai. Aloe vera ke beej bone ke liye sabse acha samay hota hai april-may ka, aur ye ek aisa podha hai jise zyada paani ki bhi zarurat nahi hoti.

Jagah ka chunav karte samay yeh dhyan rakhein ki aap uss jagah ki poori soil aur water testing karle. Soil testing mein neeche di gayi cheezo ko juror yaad rakhein

  • pH level
  • Organic carbon
  • Electrical conductivity
  • Phosphorus
  • Sulphur
  • Iron
  • Copper
  • Zinc etc.

Sahi aloe vera hybrid ho chunna bhi bahut zaruri hota hai. market mein aloe vera ke bahut prakaar ke hybrid available hai. Aap chahe toh neeche diye gaye hybride ka istemaal kar sakte hain.

  1. IEC 111269
  2. IEC 111271

Yeh aise hybrids hai jo bahut jaldi ugte hain aur inmein keede lagna ka bahut kam khatra hota hai. Kyonki ab humne jaan lia hai ki aloe vera ko ugaane se pehle kin baato ka dhyan rakhna chahiye, aayiye ab jante hai ki kaise aap aloe vera ki kheti kar sakte hain. Aloe vera ki kheti karneke liye aap neeche diye gaye steps follow kar sakte hain.

  1. Sabse pehle aap apne khet ki 2-3 baar jutaai karle aur apni bhoomi ko sankalp karle. Aloe vera ki kheti ke liye ek sankalp bhoomi ka hona bahut zaruri hai kyonki ye ek podha 3-5 saal tak lagatar aapko fasal deta rahega.
  2. Bhoomi sankalp ho jaane ke baad aap usko fertile banane ke liye gobar ki khaad daal sakte hain. Aapko apne 1 hectare ke khet mein 10-12 tonnes gobar ki khaad daalni hogi. Gobar ki khaad daalne ke baad apne khet mein pesticides chidakna na bhule, waise toh aloe vera ek aisa podha hai jisme keede lagne ke bahut kam chances hain, lekin hume koi risk nahi lena chahiye isliye pehle se hi 0.2% of malathion aqueous aur 0.2% dithane M-45 ka chidkaav kar sakte hain.
  3. Agar aap apni bhoomi ko aur upjaau yani ferlite banana chahte hain toh aap usmein urea bhi daal sakte hain. Urea ek tarah ka fertilizer hota hai. Aapko 1hectare ke khet ke liye lagbhag 100 kg urea ka istemaal karma hoga.
  4. Ek baar apki bhoomi aloe vera ki kheti ke liye upjau ho jaaye tab aapko oonchi keriya bana kar usmein aloe vera ke baby plan 2 metre ki doori par lagane honge. Har keri mein bhi 2 metre ki doori honi chahiye.
  5. Ek baar aapne aloe vera ka podha laga diya toh aapko usse zyada paani dene ki bhi zaruart nahi hai . Yeh kaam aap har mahine mein 1-2 baar kar sakte hain. Aloevera ke pdhe ke as-pas mitti daalte rahein.
  6. Aloe vera ki pehli fasal 9-11 mahine mein taiyar ho jaati hai. Aap iss fasal ke upar ke patte kaat sakte hai. Aapko yeh fasal jad se nahi kaatni hoti kyonki yehi firse ugti hai
  7. Agli fasal ke liye aap 45 dino ke baad purine patte mitti mein daal sakte hain. Pehli fasal ke baad har fasal 5-7 mahine mein taiyyar ho jaati hai. Ek baar aloe vera ka podha lagane ke baad aap 4-5 saal tak uska istemaal kar sakte hain.

Aloe vera kheti ke liye training kaha se le?

Agar aap chahte hain toh apni farming business shuru karne se pehle aap aloe vera ki kheti ki training le sakte hain par training zaruri nahi hai.

Training lekar kaam karne se galtiyon ki gunjaaish nahi hoti aur nuksaan hone ka risk khatam ho jata hai. Aap neeche diye gaye tareeko se training le sakte hain.

  • CSIR– Central Institute of Medicine and Aromatic Plants, yeh ek aisi organisation hai jo alag-alag samay par yeh training sessions karvate rehte hain. Yeh session state-wise conduct hote hai. Inn training session ki adhik jaankari ke liye aap yaha click kar sakte hain.
  • Agriculture Information – yeh ek aisi organisation hai jo 2-3 dino ke sessions conduct karti hai, inn sessions ke liye ye orgainsation fess bhi charge karti hai. Inn training sessions mein aapko aloe vera ke podho ki growth, harvesting aur marketing ke baare mein poori jaankari milegi. Ismein trained professionals jinke paas 12-15 saal ka experience hai, aapko pratical training denge. Iss orgainisation ke baare mein jaane ke liye yaha click kare.
  • Krishi Vibhag – sarkar ne farmers ki madad ke liye jagah jagah Krishi Vibhag khole hai jahan agriculture aur kheti se related har problem ka solution uplabhad hai. Inn centres mein alag alag type ki farming ke liye alag alag training bhi milti hai. Adhik jaankari ke liye aap apne district ke Krishi Vibhag Kendra se sampark kar sakte hain.
  • Online training – aap chahe toh bina kahi jaaye, apne ghar se hi aloe vera farming ki onlline training le sakte hain. online training ke baare mein adhik jaankari ke liye yaha click kare.

Market ki jaankari

Aloe vera kheti ke liye beej kahan se laaye?

Aloe vera farming ke liye saahi hybrid ke beej ka chunaav karna bahut jaruri hai. Aaj kal market mein bahut saare fraud suppliers bhi ghoom rahe hain jo ya toh mehenge beej bech rahe hain ya bekar hybrid ke beej bech rahe hain, jiski wajah se aapko nuksaan ho sakta hai. Isliye aloe vera ke beej ya babyplant khareedne ke samay aapko savdhaani se sahi beej ka hi chayan karna hoga.

Agar aapke paas koi bharosemand dealer ho jo aloe vera ke business se juda ho toh aap usse hi podhe khareede. Agar aap chahe toh achhe podhe khareedne ke liye  aur unki jaankari ke liye apne discrict ki Krishi Kalyan Vibhag se sampark kare. Aap wahan se har aloe vera ki khetike baare mein har tarah ki jaankari prart kar sakte hain. Aur bhi aisi kayi sanstha hain jo farmers ki madad karne ke liye khuli hain jaise India Plantation.  Humari raay hai ki jahan tak ho sake aapko sarkari nursery se hi aloe vera ke baby plant khareedne chahiye.
Iske alawa agar aap online aloe vera ke beech khareedna chahte hain toh yaha click kare.

Aloe vera kaha beche

Aloe vera ki kheti karne ke baad baari aati hai usse market mein bechkar munafa kamane ki. Aap chahe toh yeh kaam kayi tareeko se kar sakte hain.  Aloe vera ek aisa product hai jiski market har din badhti jaa rahi hai toh isliye isse market mein bechna zyada mushkil kaam nahi hoga. Aap neeche diye gaye tareeko se apna product market mein bech sakte hain.

  • Aap chahe toh badi companies jaise Patanjali, Dabur, Baithyanath mein as a dealer apne product ko wholesale mein bech sakte hain. Yeh companies ayurvedic aur herbal products banati hain aur isliye inhe fresh aloe vera ki zarurat humesha rehti hai.
  • Aaj kal humare consumers bahut zyada health conscious ho gaye hain. Ve har product mein natural aur herbal ingredients chahte hain. Cosmetic industry mein mein natural ingredients ki maang kaafi badh chuki hai. Toh agar aap chahe toh costemic brands se jud kar bhi aap achhi kamayi kar sakte hain. Aap in companies ko inke email dwara sampark kar sakte hain. 
  • Agar aap chote starr se shuruvat karna chahte hain toh aap market mein aloe vera juice bechne walo se bhi deal kar sakte hain. Ya phir thodi aurr investment karke apna aloe vera juice business bhi khol sakte hain. Aloe vera juice business ki jaankari ke liye yaha click kare
  • In tareeko ke alawa sabse asaan tareeka hai ki aap apni local market mein jaakar kisi sabziwaale ya kisi dealer se sampark kare aur directy apne customers ko beche.
  • Aap chahe toh ek nursery bhi laga sakte hain jahan se log apne gharo ke liye aloe vera ke podhe khareed sake

Aloe vera farming mein Laagat

Aloe vera ek aisa business hai jo kum laagat aur kum samay mein acha munfa ya profit kama ke de sakta hai. agar aap chote starr se yeh business shuru karna chahte hain toh aap chahe toh apne ghar ke bageeche se hi yeh business shuru kar sakte hain.

Aloe vera ka business shuru karte samay aapko zyada cheezo ki jarurat nahi hoti, aapko aloe vera ke baby plant, gobar ki khaad, kuch fertilizers jaise urea aur dithane , kuch farming se related tools jaise hal, scissors, axe, bucket etc ki zarurat hogi. Aloe vera ki kheti ki ek bahut achhi baat yeh hai ki iski fasal zyada paani nahi maangti, isliye aapko baar baar paani ka intezaam karne ki bhi zarurat nahi hai. Haan lekin iss baatka dhyan rakhien ki mahine mein ek baar aap aloe vera ki keriyo mein paani daalte rahe.

Humari yeh ray hai ki business shuru karne se phele aap in sab cheezo ka intezaam karke rakhein taaki apko achhi fasal ugaane mein koi dikkat na aaye. Agar aapko ek proper business shuru karna hai toh aapko neeche diye gayi cheezo ki zarurat hogi.

Material

Quantity

Shuruvaati laagat

Area

1-2 acres

Jagah aur situation par depend karta hai

Baby plant / seeds

10,000-11,000

Rs. 25,000-35,000

Gobar ki khaad 

10-15 tonnes

5,000

Labor, tools etc.

Jarurat ke anusaar

10,000

Total

 

40,000-50,000

Note: Yeh laagat har jagah par differ kar sakta hai.

Aloe vera business ke liye loan

Agar aap loan lekar apne aloe vera business ki shuruvat karna chahte hai, toh aapke pass ye saare options available hai:

  • Kisano ko National Bank for Rural Development and Agriculture (NABARD/NHB) dwara loan extend kiya jata hai lekin loan lene ke liye kisano ko ek report NABARD se approve karani padti hai. Loan ke amount ke processing ke liye in cases ko Nationalised banks ko recommend kiya jata hai.
  • National Horticulture Board bhi aloe vera farmers ko credit linked back- end subsidy ki form mein assistance provide karta hai. Subsidy ka amount total cost ka 20% hota hai (normal areas mein maximum amount 25 lakhs tak ka hota aur hilly areas mein 30 lakhs tak).
  • State Government bhi aloe vera farmers ko encourage karne ke liye subsidies provide karti hai. Compost ke liye subsidy maximum 400 trays ke liye di jati hai aur compost ki transportation ke liye 100% subsidy di jati hai.
  • Rashtriya Krishi Vikas Yojna mein bhi kisaano ko khet, tools etc ke liye Rs 80,000 diye jaate hain.

Sarkari loan

Aap chahe toh Startup India ke tehat sarkaar se loan le sakte hai. 
Iss organization me aisi scheme hai jo small scale businesses ko aage badhane mein madad karti hai, jiska naam hai Mudra scheme. Mudra loan sceme ek collateral free loan scheme hai jisme interest bhi kam charge hota hai. Iss scheme ke andar 3 tarah ke plans hai:

Mudra scheme ka funding support in chaar prakaar ka hota hai.

  • Micro Credit Scheme (MCS) , 1 lakh tak ke finance ke liye
  • Commercial Banks / Regional Rural Banks (RRBs) / Scheduled Co-operative Banks ke liye refinance scheme
  • Women Enterprise programme
  • Loan portfolio ka securitisation

Mudra scheme ke baaki mein aur jaankari ke neeche diye gaye link par click karein Mudra Loan Scheme

Bank Loan

Aap chahe toh bank se loan lekar bhi apne kaam ki shuruvat kar sakte hain. Bank loans kisi bhi small ya medium sized business ke liye kaafi important role play karta hai. Agar aapke pas apna khud ka investment nahi hai toh aap bank se loan sanction karwa sakte hain. Bank se loan sanction karwane ke liye aapko kuch cheezon ki requirements hongi jaise –

  • Aapki age limit 21-65 years ki honi chahiye
  • Aapko ek profit margin dikhani hogi jo bank ko trust provide karega. Profit kam se kam rs. 1,50,000 ki honi chahiye
  • Ek proper business plan dikhana hoga jo ki loan provider ko aapke business ke bare mein puri jaankari de sake

Aloe vera ki kheti se profit

Aloe vera farming ek aisa business ban chukka hai jiski demand dheere dheere badhti jaa rahi hai. Toh ek baat toh tay hai ki aloe vera farming business plan ek aisa business plan hai jisme kum investment hone ke karan acha munafa ho sakta hai.

Agar aap apne business ke pehle saal mein 50,000 tak ki investment karte hain jismein aap 1 hectare mein lagbhag 20,000-30,000 aloe vera plants ugaate hain toh aapko pehle saal mein hi lagbhag Rs. 2,00,000-3,00,000 tak ka munafa ho sakta hai. Aloe vera ka rate market mein rs 4-8 per plant hota hai. Yeh rate fix nahi hota, season aur demand ke hisaab se yeh rate upar neeche ho sakta hai.

Aloe vera ek aisa plant hai jisse aap ek baar laga kar 5 saal tak fasal nikal sakte hain. Aur to aur pehli fasal ke baad iske production mein 30-40% tak ki growth aa jati hai. Iska matlab 6 mahine mein hi agli fasal taiyar ho jati hai. Saal mein do baar fasal taiyar hone ki wajah se iska profit bhi almost dugna ho jata hai. Yaani pehle saal ke baad, agle har saal mein aap Rs. 4,00,000-5,00,000 tak ka munafa kama sakte hain.

Yeh munafa iss baat par bhi depend karta hai ki aap apna product kisi badi company mein bech rahe hain, kisi average company mein bech rahe hain ya local markets mein nech rahe hain. Har jagah profit margin differ karta hai.

Aloe vera juice business plan

Agar aap aloe vera ke business se zyada munafa kamana chahte hain toh aap thodi zyada investment karke apna khudh ka aloe vera juice plant set up kar sakte hain. Yeh aloe vera farming se thodi zyada investment maangta hai lekin isse ane wala profit bhi kayi zyada hai. Aloe vera juice business mein aap apna product direct market mein yakisi juice vendor ko naa bechkar khudh uska juice nikal kar wholesale mein ya retail mein bech sakte hain.

Iss business ko set karne ke liye aapko ek juice machine ki jarurat hogi. Aloe vera juice machine ke rates aap Indiamart par check kar sakte hain. Yeh machine aapko lagbhag Rs. 5,00,000-8,00,000 tak ki padh sakti hai. Iske alawa iss business mein koi aur khaas investment nahi hai.

Ab baat karte hai iss business se aane waale profit ki, dekha jaaye toh 1 litre aloe vera juice nikalne ke liye bhi 1 kg aloe vera ki jarurat nahi hoti. Kyonki raw material hi itna kam istemaal hota hai isliye iss business mein kam samay mein acha munafa hota hai. Agar aap retail mein apne aloe vera juice ki packing karke bechte hain toh iska market rate rs.130-150 per litre hai. Matlab aap pehle saal mein hi Rs. 8,00,000-10,00,000 tak ka munafa kama sakte hain.

Aloe vera business mein awasar

Aloe vera un chuninda medicinal plants mein se hai jiska istemaal ek se zyada industry mein kiya jata hai, isliye iski market duniya bhar mein badh rahi hai. Indian aloe vera market 2017 mein 163 crores ki thi aur yeh anumaan lagaya jaa raha hai ki 2023 tak yeh 270 crores tak pahuch jaayegi. Inn facts se yeh toh pakka hai ki iss business mein ache awasar mil sakte hai.

Iss business mein ghata sirf tabhi hoga jab aap apne customers se fraud karenge. Dheere dheere sab log health aur quality conscious ho rahe hain, jis wajah se aloe vera jaise herbal ingredients ki demand bhi badh rahi hai. Toh agar aap apne customers ko sahi price par sahi product denge toh aapka nuksaan kabhi nahi hoga.

 Toh agar aap aloe vera ki kheti kar rahe hai toh aage chal kar aap apna business khol sakte hain jisme tarah tarah ke products jaise ki soaps, shampoos, toothbrush etc manufacture karke acha munafa kama sakte hai. Lekin iss business mein bahut zyada investment lagti hai aur isme kayi saari kanuni prakriya bhi badhjaati hain. Aap ke manufacturing unit khol ke khudh ko farmer se businessman bana sakte hain. Apne business ko ek naam aur label deke aap usse ek private limited company ke taur par bhi chala sakte hain.

Aloe vera ki kheti se jude kuch sawaal

Q.1)Aloe vera ke patte kis rate par bikte hain aur kitna munafa hota hai?

Ans.1)Aloe vera ka market rate jagah aur mausam par depend karta hai. Generally iska market price range Rs 3-8 per kilo ki hoti hai. Munafa ya profit ke baare mein zyada jaankari ke liye yaha click kare.

Q.2)Ek saal mein aloevera ki kitne patte nikalte hain?

Ans.2)Agar aap 1 acre mein aloe vera ki kheti kar rahe hain toh aap 12000- 15000 babyplants lagayenge, jiska matlabhai ki aap har saal 40,000-50,000 tonne ki fasal ugaayenge. agar aap 1 hectare mein aloe vera farming kar rahe hai toh yeh quantity dugni ho jaayegi.

Q.3)Aloe vera ka podha lagane ke baad pehli fasal kab taiyaar hogi?

Ans.3)Aloe vera ki pehli fasal 9-11 mahine mein ugg jaati hai. iske baare mein aur janane ke liye yaha click kare.

Q.4)Aloe vera ki kheti kis zameen mein ho sakti hai?

Ans.4)Aloe vera ek aisa podha hai jo kisi bhi zameen mein ug jata hai. yeh podha unupjaau zameen mein bhi ug jata hai. Lekin zyadatar isse Bulai Domat mitti (Soft Loam Soil) main ugaya jaata hai.

Q.5)Aloe vera ke podhe ka ugane ke baad size kya hoga?

Ans.5)Jab aaki fasal poori tarah se ugg jayegi aur jab aloe vera apne fully grown stage par pahuch jaayega tab uski height 3-4 feet ki ho sakti hai.

Q.6)Aloe vera kaha bech sakte hain?

Ans.6)Aloe vera ek aisa product hai jo kayi industries mein istemaal kiya jaata hai. Isliye iski market kaafi badi hai. Aloe vera ki market se judi jaankari ke liye yaha click kare.

Q.7)Kis type ka aloe vera baby plant lagana chahiye?

Ans.7)Sahi hybrid ka aloe vera baby plant chunna bahut Jaruri hai kyonki har hybrid ki badne ki speed alag hoti hai. aapko aisa hybrid chunna hoga jo kum samay mein badhe aur jismein keede bhi kam se kam lage. hybrids ke baare mein adhik jaankari ke liye yaha click kare

Humein umeed hai ke iss information se aapko kaafi had tak samajh aagaya hoga ki India mein aloe vera ki kheti ya aloe vera farming business  kaise shuru kar sakte hain. Humne puri kosish ki hai ke shuruwat se ant tak aapko aloe vera farming business plan se jude har sawal ka jawab mil jaye. Agar abhi bhi aapko kisi jankari ki jarurat ho toh comment mein jarur puchein. Hum aapki puri madad karenge.

She is a Bcom Hons. student of Shaheed Bhagat Singh College, University of Delhi. She is a senior member of Encode - the skill development society of SBSC, member of the Entrepreneur cell of SBSC and a member of Rotract Club Visioners League. She is a very positive person who always tries to contribute her bit towards the society She has also done a two month Digital Marketing internship with Josh Talks.

LEAVE A REPLY

Please enter your comment!
Please enter your name here